లగ్జరీ కార్లకు సవాల్ విసురుతున్న టాటా.. కొత్తగా కర్వ్ కారు కొనేవాళ్లకు బ్లాక్ బస్టర్ ఫీచర్లు గ్యారెంటీ

ప్రముఖ ఆటోమొబైల్ సంస్థ టాటా మోటార్స్ (Tata Motors) తమ ఎస్‌యూవీ-కూపే శ్రేణిలో విడుదల చేసిన కర్వ్(Curvv) మోడల్‌కు సరికొత్త అప్‌డేట్‌ను అందించింది. అడ్వాన్సుడ్ ఎగ్జిక్యూటివ్ ఫీచర్లు, మెరుగైన ఇంజనీరింగ్ తో వచ్చిన ఈ కొత్త కర్వ్ (ICE, EV) వేరియంట్ల ఇంటీరియర్ స్పేస్ (Interior Space) గణనీయంగా పెరిగింది.

ఈ మార్పుల ద్వారా కస్టమర్లను మరింతగా ఆకర్షించడానికి టాటా ప్రయత్నిస్తోంది. లగ్జరీ కార్లలో మాత్రమే కనిపించే కొన్ని అరుదైన ఫీచర్లను కూడా కర్వ్‌లో చేర్చారు. మరి ఈ కొత్త ఫీచర్లు ఏంటి, దాని ధర ఎంత, ఈసారి అయినా కస్టమర్ల ఆదరణ దక్కుతుందా లేదా అనేది చూద్దాం.

టాటా మోటార్స్ ప్రయాణీకుల వాహనాల విభాగం, తమ కర్వ్ ఎస్‌యూవీలో కొత్త ఎగ్జిక్యూటివ్ ఫీచర్లను ప్రవేశపెట్టింది. ప్రత్యేకమైన ఇంజనీరింగ్ ద్వారా కారు లోపలి స్థలం (Interior Space) ను గణనీయంగా పెంచింది. ఇందులో R-కంఫర్ట్ సీట్లు(పాసివ్ వెంటిలేషన్ తో కూడినవి - భారతదేశంలోనే మొదటిసారి) అందించారు. వెనుక సీట్లలో కూర్చునే వారికి సెరినిటీ స్క్రీన్ సన్‌షేడ్‌లు (Serenity Screen Sunshades), వెనుక ఆర్మ్‌రెస్ట్‌లో ప్రత్యేక కప్ హోల్డర్‌లు జోడించారు.

డ్యాష్‌బోర్డ్‌లో తెల్లటి కార్బన్ ఫైబర్ ఫినిష్, లలిత్‌పూర్ గ్రే రంగులోని ప్లష్ లెదరైట్ సీట్లతో క్యాబిన్‌కు ప్రీమియం లుక్‌ను అందించారు. కారులో ట్విన్-జోన్ క్లైమేట్ ఎయిర్ కండిషనింగ్ (Twin-Zone Climate AC) ఫీచర్ కూడా చేర్చారు. ఇది సౌకర్యాన్ని మరింత పెంచుతుంది. కర్వ్ EV మోడల్‌లో ప్రయాణీకుల సౌకర్యానికి మరింత ప్రాధాన్యత ఇచ్చారు.

కర్వ్.ఇవి (Curvv.ev) ఎలక్ట్రిక్ కారులో వెనుక సీటు ప్రయాణీకుల కోసం ప్యూర్ కంఫర్ట్ ఫుట్‌రెస్ట్, ఎర్గోవింగ్ హెడ్‌రెస్ట్ సౌకర్యాలను అందించారు. ఇవి సాధారణంగా ఖరీదైన లగ్జరీ కార్లలో కనిపిస్తాయి. వాయిస్ ద్వారా కంట్రోల్ చేయగలిగే పెద్ద పనోరమిక్ సన్‌రూఫ్, మూడ్ లైటింగ్ ద్వారా పనిచేసే పవర్డ్ టెయిల్‌గేట్, 500 లీటర్ల సామర్థ్యం గల పెద్ద బూట్ స్పేస్ వంటి అనేక ఫీచర్లు ఇందులో ఉన్నాయి.

కర్వ్ పెట్రోల్/డీజిల్, ఎలక్ట్రిక్ పవర్‌ట్రైన్లలో లభిస్తుంది. ఈ కారు 1.2 లీటర్ హైపీరియన్ పెట్రోల్ డైరెక్ట్ ఇంజెక్షన్, రొవొట్రాన్ పెట్రోల్ ఇంజిన్ , 1.5 లీటర్ క్రయోజెంట్ డీజిల్ ఇంజిన్ ఆప్షన్లలో లభిస్తుంది. ఇవి మాన్యువల్, ఆటోమేటిక్ గేర్‌బాక్స్ ఆప్షన్లతో వస్తాయి. కర్వ్ EV రెండు రకాల బ్యాటరీ ఆప్షన్లలో లభిస్తుంది: 45 kWh బ్యాటరీ ఒక్కసారి పూర్తిగా ఛార్జ్ చేస్తే గరిష్టంగా 430 కి.మీ వరకు రేంజ్ ఇస్తుంది. 55 kWh బ్యాటరీ ఒక్కసారి పూర్తిగా ఛార్జ్ చేస్తే గరిష్టంగా 502 కి.మీ వరకు రేంజ్ ఇస్తుంది.

కొత్త ఫీచర్లు జోడించినప్పటికీ, కర్వ్ ధరలు సెగ్మెంట్‌లో పోటీ పడే విధంగానే ఉన్నాయి. సేఫ్టీ విషయంలో టాటా ఎప్పుడూ ముందుంటుంది. కర్వ్ (ICE) అకెంప్లిష్డ్' (Accomplished) వేరియంట్ రూ.14.55 లక్షల ప్రారంభ ధరతో లభిస్తుంది. కర్వ్ EV అకెంప్లిష్డ్, ఎంపవర్డ్ (Empowered) వేరియంట్లు రూ.18.49 లక్షల ప్రారంభ ధరతో లభిస్తాయి.

కర్వ్ కార్లు లెవెల్-2 ADAS (Advanced Driver Assistance Systems) తో వస్తాయి. అంతేకాకుండా, ఇది 5-స్టార్ భారత్ NCAP సేఫ్టీ రేటింగ్‌ను పొందింది, ఇది దాని అత్యుత్తమ నిర్మాణ నాణ్యతకు నిదర్శనం.

డ్రైవ్‌స్పార్క్ అభిప్రాయం : గతంలో విడుదలైన కర్వ్ కారుకు మార్కెట్లో ఆశించినంత ఆదరణ దక్కలేదు. అయితే, టాటా మోటార్స్ ఈసారి లగ్జరీ మరియు ఆకర్షణీయమైన ఫీచర్లతో దీన్ని ఎప్పటికప్పుడు అప్‌డేట్ చేస్తూ, కస్టమర్‌లను తమ వైపుకు మళ్లించడానికి ప్రయత్నిస్తోంది. ఈ కొత్త ఫీచర్లు అమ్మకాలను ఎంతవరకు పెంచుతాయో వేచి చూడాలి.