కొండలైనా, గుట్టలైనా అవలీలగా ఎక్కేస్తుంది.. ఇది కారు కాదు పవర్ హౌస్.. ఆఫ్ రోడ్ కింగ్ ధర ఎంతో తెలుసా ?

ఎలక్ట్రిక్ వెహికల్ ప్రపంచంలో రారాజులా వెలుగొందుతున్న టాటా ఫ్యామిలీలో పెద్దన్న స్థానాన్ని పొందిన టాటా హారియర్ ఈవీ అందరి మనసుల్లో స్థానం సంపాదించుకుంది. ఈ మధ్య కాలంలో కొండలు ఎక్కుతున్న దాని వీడియో బయటకు రావడంతో ఆఫ్-రోడ్ అభిమానుల గుండెల్లో కూడా ఈ కారు కరెంటు షాక్ ఇచ్చినంత పని చేసింది.

ఇప్పుడు టాటా తన ఆల్-వీల్ డ్రైవ్ సిస్టమ్ అయిన QWD వేరియంట్ ధరను వెల్లడించింది. ఈ వేరియంట్ ఎక్స్-షోరూం ధర రూ.28.99 లక్షల నుండి ప్రారంభమవుతుంది. ఆన్-రోడ్ ధర దాదాపు రూ.32 లక్షల వరకు ఉంటుందని అంచనా. రియర్ వీల్ డ్రైవ్ మోడల్ ఎక్స్-షోరూం ధర రూ.21 లక్షల నుండి మొదలవుతుంది.

ఈ కారులో 12.3అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 360 డిగ్రీ కెమెరా, V2L రివర్స్ ఛార్జింగ్, లెవెల్ 2 ADAS, ఆటో పార్క్ అసిస్ట్, పనోరమిక్ సన్‌రూఫ్ వంటి అదిరిపోయే ఫీచర్లు ఉన్నాయి. టాటా హారియర్ ఈవీ ఒక్కసారి ఛార్జ్ చేస్తే 627 కిలోమీటర్ల వరకు నడుస్తుందని కంపెనీ చెబుతోంది. ఈ సెగ్మెంట్‌లో AWD సిస్టమ్‌తో మార్కెట్‌లోకి వస్తున్న ఏకైక మోడల్ కూడా టాటా హారియర్ ఈవీ కావడం విశేషం.

టాటా హారియర్ ఈవీ పవర్, కెపాసిటీ రెండింటినీ చూపించడానికి టాటా కంపెనీ 'క్వాడ్ డే ఎక్స్‌పీరియన్స్' పేరుతో ఒక ఈవెంట్‌ను నిర్వహించింది. ఇది జనాల దృష్టిని బాగా ఆకర్షించింది. ఈ కార్యక్రమంలో కారు ఆఫ్-రోడింగ్ కెపాసిటీ, ఇతర స్టంట్‌లు ప్రదర్శించారు. రాళ్లు నిండిన దారిలో ఆఫ్-రోడింగ్, నిటారుగా ఉన్న కొండలు ఎక్కడం, ట్యాంకును లాగడం, బురద, నీటితో నిండిన దారుల్లో ప్రయాణించడం వంటివి ఇందులో ఉన్నాయి.

ఆఫ్-రోడింగ్‌కు ఈ వాహనాన్ని సిద్ధం చేసే అనేక ప్రత్యేక ఫీచర్లు ఇందులో ఉన్నాయి. కొత్త 540 డిగ్రీ కెమెరా ఫంక్షన్, 360 డిగ్రీ సరౌండ్ వ్యూ మానిటర్ సిస్టమ్‌లో అదనంగా ఒక కొత్త యాంగిల్‌ను ఇస్తుంది. ఇది కారు కింద ఏం ఉందో చూపిస్తుంది. ఈ కొత్త యాంగిల్ ట్రాన్స్‌పరెంట్ మోడ్‌లో పనిచేస్తుంది. ఇది ఆఫ్-రోడ్ పరిస్థితుల్లో పెద్ద గుంతలు, ఇతర అడ్డంకులను జాగ్రత్తగా దాటడానికి డ్రైవర్‌కు సాయపడుతుంది.

ఆఫ్-రోడ్‌లో మాత్రమే కాదు, సేఫ్టీలోనూ టాటా హారియర్ ఈవీ అదుర్స్. భారత్ NCAP క్రాష్ టెస్ట్‌లో ఇది ఫైవ్-స్టార్ రేటింగ్‌ను సాధించింది. అడల్ట్ సేఫ్టీలో 32కి 32 పాయింట్లు వచ్చాయి. పిల్లల భద్రతలో 49కి 45 పాయింట్లు లభించాయి. ఫ్రంటల్ ఆఫ్‌సెట్ డిఫార్మబుల్ బారియర్ టెస్ట్‌లో, సైడ్ మూవబుల్ డిఫార్మబుల్ బారియర్ టెస్ట్‌లో కూడా 16కి 16 పాయింట్లు వచ్చాయి.

పిల్లల సేఫ్టీలో డైనమిక్ స్కోర్, CRS ఇన్‌స్టాలేషన్ స్కోర్ కూడా హారియర్ ఈవీలో అద్భుతంగా ఉన్నాయని గుర్తించారు. వెహికల్ అసెస్‌మెంట్ స్కోర్‌లో హారియర్ ఈవీకి 13కి 9 పాయింట్లు వచ్చాయి. ప్రస్తుతం టాటా వాహనాల సేఫ్టీ ప్రమాణాలను ఇది నిలబెట్టడం ప్రశంసనీయం.

టాటా హారియర్ ఈవీలో రెండు బ్యాటరీ ప్యాక్ ఆప్షన్లు, రెండు మోటార్ కాన్ఫిగరేషన్ ఆప్షన్లను టాటా అందిస్తోంది. ఎలక్ట్రిక్ ఎస్‌యూవీ తక్కువ వేరియంట్‌లలో 65 kWh బ్యాటరీ ప్యాక్ ఉపయోగించగా, టాప్ వేరియంట్‌లలో 75 kWh బ్యాటరీ ప్యాక్ అమర్చారు.

ఈ బ్యాటరీ ప్యాక్ ఆప్షన్‌లో RWD, QWD అనే రెండు మోటార్ కాన్ఫిగరేషన్లు ఉంటాయి. హారియర్ ఈవీ QWD వేరియంట్లు 391 bhp పవర్, 504 Nm టార్క్‌ను ఉత్పత్తి చేస్తాయి. RWD వేరియంట్ల పర్ఫార్మెన్స్ వివరాలను కంపెనీ ఇంకా బయటపెట్టలేదు. 75 kWh బ్యాటరీ ప్యాక్ ఉన్న RWD వేరియంట్‌లు ఒక్కసారి ఛార్జ్ చేస్తే 627 కిలోమీటర్ల రేంజ్ ఇస్తాయని కంపెనీ చెబుతోంది.

డ్రైవ్‌స్పార్క్ అభిప్రాయం: టాటా హారియర్ ఈవీ QWD లాంచ్ భారత ఎలక్ట్రిక్ ఎస్‌యూవీ మార్కెట్‌లో ఒక కొత్త ట్రెండ్‌ను సెట్ చేస్తుంది. ముఖ్యంగా, దాని ఆఫ్-రోడింగ్ కెపాసిటీ, లేటెస్ట్ ఫీచర్లు, 5-స్టార్ సేఫ్టీ రేటింగ్ కస్టమర్లను బాగా ఆకర్షిస్తాయి. ఈ ధర వద్ద ఇది చాలామందికి అందుబాటులోకి వస్తుంది. ఇది ఎలక్ట్రిక్ వాహనాల స్వీకరణను మరింత పెంచుతుంది.