627 కిలోమీటర్ల రేంజ్‌ టాటా కారు బుకింగ్ తేదీ వచ్చేసింది.. ధర, ఫీచర్స్, ఇతర వివరాలు ఇవే!

దేశీయ ప్రముఖ కార్ల తయారీ కంపెనీ టాటా మోటార్స్ (tata motors) మార్కెట్‌లో ఓ కొత్త అధ్యాయాన్ని ప్రారంభించబోతోంది. దేశవ్యాప్తంగా అనేక మంది వినియోగదారులు టాటా కొత్త ఎలక్ట్రిక్ SUV అయిన హారియర్ EV కోసం ఆసక్తిగా ఎదురుచూస్తున్నారు. ఈ వేచి ఉండే సమయంలో, టాటా మోటార్స్ హారియర్ EV రియర్-వీల్ డ్రైవ్ (RWD) వేరియంట్ల ధరలను అధికారికంగా ప్రకటించింది. ఈ కొత్త హారియర్ EV RWD వెర్షన్ మొత్తం ఐదు వేర్వేరు ట్రిమ్‌లలో లభిస్తుంది. ఈ వేరియంట్లన్నీ వినియోగదారుల విభిన్న అవసరాలకు తగ్గట్లు రూపొందించబడ్డాయి. కొత్త డిజైన్, లేటెస్ట్ టెక్నాలజీ, మెరుగైన పనితీరు, ఆర్ధిక ప్రయోజనాలు ఇవన్నీ ఈ ఎలక్ట్రిక్ SUVని ప్రత్యేకంగా నిలబెడుతున్నాయి.

హారియర్ ఈవీ వేరియంట్ల వారీగా ధరల గురించి చూసినట్లయితే అడ్వెంచర్ 65 అనే ఎంట్రీ-లెవెల్ వేరియంట్ ధర రూ. 21.49 లక్షలుగా నిర్ణయించబడింది. కొంచెం మెరుగైన ఫీచర్లు కోరుకునే వారికి అడ్వెంచర్ S 65 అనే వేరియంట్ రూ. 21.99 లక్షలకు కొనుగోలు చేయడానికి లభిస్తోంది. మరింత సౌకర్యాల కోసం ఫియర్‌లెస్ ప్లస్ 65 వేరియంట్‌ను కస్టమర్లు రూ. 23.99 లక్షలకు కొనుగోలు చేయవచ్చు.

75 కిలోవాట్-ఆవర్ బ్యాటరీతో కూడిన వెర్షన్ అయిన ఫియర్‌లెస్ ప్లస్ 75ను రూ. 24.99 లక్షలకు అందుబాటులోకి తెచ్చారు. ఎలక్ట్రిక్ టెక్నాలజీలో అత్యుత్తమ అనుభూతిని కోరుకునే వారికి ఎంపవర్డ్ 75 వేరియంట్ రూ. 27.49 లక్షల ఎక్స్-షోరూమ్ ధరతో అందుబాటులో ఉంది. ఈ ధరల ప్రకటనతో పాటు, దీని బుకింగ్‌లు జులై 2 నుండి ప్రారంభం కానున్నాయి. ఈ మోడల్‌తో ఎలక్ట్రిక్ వాహనాల విభాగంలో టాటా కీలకమైన అడుగు వేసింది.

ఇవన్నీ రియర్-వీల్ డ్రైవ్ ఆప్షన్ వేరియంట్ ధరలు. టాటా మోటార్స్ హారియర్ EV AWD (ఆల్ వీల్ డ్రైవ్) వేరియంట్‌ల ధరలను అధికారికంగా జూన్ 27న వెల్లడించింది. ఇప్పటికే భారీగా ఆసక్తి కలిగిన ఈ ఎలక్ట్రిక్ SUVని బుకింగ్ చేసుకోవాలనుకునే వినియోగదారులు టాటా అధికారిక వెబ్‌సైట్ లేదా సమీప డీలర్‌షిప్‌ను సందర్శించవచ్చు. హారియర్ EV AWD కోసం డెలివరీలు కూడా కొద్ది రోజుల్లో ప్రారంభం కానున్నట్లు సమాచారం.

ఈ కొత్త కారు శక్తివంతమైన పవర్‌ట్రెయిన్‌తో రానుంది. ఇది రెండు బ్యాటరీ ప్యాక్‌లతో 65 కిలోవాట్-ఆవర్ (kWh), 75 కిలోవాట్-ఆవర్ (kWh) అందుబాటులో ఉంది. ఈ బ్యాటరీ కాంబినేషన్‌తో హారియర్ EV ఒకసారి పూర్తి ఛార్జ్‌పై అత్యధికంగా 627 కిలోమీటర్ల రేంజ్‌ను అందించగలదు. అంటే దూర ప్రయాణాలకూ ఇది అత్యంత అనుకూలంగా మారనుంది. ఈ రేంజ్ అందించే కారు వలన కస్టమర్లు ఛార్జింగ్ కోసం ఇబ్బంది పడాల్సిన అవసరం ఉండదు.

పెర్ఫార్మెన్స్ పరంగా చూస్తే, హారియర్ ఈవీ కేవలం 6.3 సెకన్లలో 0 నుండి 100 కిలోమీటర్ల వేగాన్ని చేరుకోవడం దీని ప్రత్యేకత. ఇది హారియర్ EVని కేవలం ఫ్యామిలీ SUV మాత్రమే కాకుండా, స్పోర్టీవ్ డ్రైవింగ్ ఎక్స్‌పీరియన్స్ కోసం కూడా సిద్ధంగా ఉన్నదని చెప్పవచ్చు. దీనిలో 5 సీటింగ్ కెపాసిటీ ఉంది. ఎక్స్‌టీరియర్ ఆకట్టుకోవడంతో పాటు ఇంటీరియర్‌ను కూడా చాలా ఆకర్షణీయంగా తీర్చిదిద్దారు.

లోపల 14.53-అంగుళాల నియో QLED ఇన్ఫోటైన్‌మెంట్ సిస్టమ్, ఎంటర్‌టైన్‌మెంట్ కోసం డాల్బీ అట్మోస్ సెటప్‌తో 10-స్పీకర్ JBL ఆడియో సిస్టమ్‌తో వస్తుంది. ఇంకా, ఈ-వాలెట్ ఆటో పార్క్ అసిస్ట్, డిజిటల్ కీ, విండో సన్‌బ్లైండ్‌లు, యాంబియంట్ లైటింగ్, సన్‌రూఫ్, వెంటిలేటెడ్ ఫ్రంట్ సీట్లు వంటి వాటిని కలిగి ఉంటుంది. అలాగే సేఫ్టీ కోసం 7 ఎయిర్‌బ్యాగ్‌లు, లెవల్ 2 ADAS, TPMS, హిల్-హోల్డ్ అసిస్ట్ వంటి ఫీచర్స్ దీనిలో ఉన్నాయి.