ఒకప్పుడు మార్కెట్‌ను ఏలిన టాటా కారు.. ఇప్పుడు కొత్త రూపంలో! ఏ వేరియంట్‌ ఎంతంటే?

టాటా మోటార్స్ (Tata Motors) ఎంతో ప్రతిష్టాత్మకంగా తిరిగి తెచ్చిన సియెర్రా (Sierra) ఇప్పుడు భారత మార్కెట్లో కొత్త ఊపును రాబట్టే మోడల్‌గా నిలుస్తోంది. నవంబర్ 26, 2025న అధికారికంగా లాంచ్ చేసిన ఈ కాంపాక్ట్ SUV, కేవలం పేరు మాత్రమే కాదు.. అదే వారసత్వాన్ని కొత్త డిజైన్, ఆధునిక టెక్నాలజీ, ప్రీమియం ఫీచర్లతో మరో దశకు తీసుకెళ్లిన మోడల్‌గా అందరినీ ఆకర్షిస్తోంది. ప్రారంభ ధరను రూ.11.49 లక్షలుగానే నిర్దేశించినప్పటికీ, ఇప్పుడు టాటా సియెర్రా మిగతా వేరియంట్‌ల ధరలను కూడా కంపెనీ వెల్లడించింది. సియెర్రా మొత్తం 7 వేరియంట్‌లలో స్మార్ట్+, ప్యూర్, ప్యూర్+, అడ్వెంచర్, అడ్వెంచర్+, అకంప్లిష్డ్, అకంప్లిష్డ్+ లలో లభిస్తుంది. ఈ వేరియంట్‌లను చూస్తేనే టాటా ఈ మోడల్‌ను విభిన్న రకాల కస్టమర్ల అవసరాలకు అనుగుణంగా రూపొందించినట్లు తెలుస్తోంది.

కొత్తగా బయటపడ్డ వివరాల ప్రకారం, సియెర్రా ప్యూర్ మరియు ప్యూర్+ ట్రిమ్‌లు రూ.12.99 లక్షల నుండి ప్రారంభమవుతాయి. ఈ ట్రిమ్‌లు సరళమైన, ఫీచర్లతో కూడిన, అలాగే బడ్జెట్‌కు అనుగుణంగా ఉండే SUV కోసం ఎదురుచూస్తున్న వారికి మంచి ఆప్షన్‌గా నిలుస్తాయి. అలాగే మరింత అడ్వెంచర్ కోరుకునే డ్రైవర్‌ల కోసం రూపొందించిన అడ్వెంచర్, అడ్వెంచర్+ ట్రిమ్‌లు కూడా ఇప్పుడు ధరలతో వచ్చాయి. ఇవి రూ.15.29 లక్షల నుండి మొదలవుతాయి.

ఈ వేరియంట్‌లు డిజైన్, ఆఫ్-రోడ్ సామర్థ్యం, ఫీచర్ల పరంగా మరింత రగ్గడ్‌గా, మరింత సామర్థ్యవంతంగా ఉండేలా తయారు చేసినట్టు వెల్లడైంది. అయితే, అందరిలో ఆసక్తి రేపుతున్న అకంప్లిష్డ్, అకంప్లిష్డ్+ ట్రిమ్‌ల ధరలను మాత్రం టాటా ఇంకా వెల్లడించలేదు. పైనుండే ప్రీమియం స్థాయిలో ఉండే ఈ వేరియంట్‌లు మరింత అధునాతన ఫీచర్లు, సేఫ్టీ, టెక్నాలజీతో వచ్చే అవకాశం ఉన్నందున చాలామంది వినియోగదారులు వాటి ధర వివరాల కోసం ఎదురుచూస్తున్నారు.

టాటా సియెర్రా కొత్త తరానికి తగ్గట్టుగా రూపొందించబడింది అన్న మాట ఇది చదివితే మరింత స్పష్టంగా తెలుస్తుంది. ఎందుకంటే ఈ SUV ఆధారపడింది టాటా మోటార్స్ రూపొందించిన నూతన ఆర్గోస్ ఆర్కిటెక్చర్‌పై. ఈ ప్లాట్‌ఫారమ్‌నే సియెర్రా ప్రత్యేకతగా నిలబడేలా చేసింది. పెట్రోల్, హైబ్రిడ్, CNG, ఇంకా భవిష్యత్తులో ఆల్-వీల్-డ్రైవ్ సెటప్‌లను కూడా సపోర్ట్ చేసేలా ఈ ఆర్కిటెక్చర్‌ను తయారు చేయడం టాటా ఇంజినీరింగ్‌లో జరిగిన పెద్ద పరిణామం.

ఇంజిన్ ఆప్షన్‌ల విషయానికి వస్తే, సియెర్రా ఒకే సెగ్మెంట్‌లో అరుదుగా కనిపించే మూడు 1.5-లీటర్ వేరియంట్లను అందిస్తోంది. 105 bhp నేచురల్లీ ఆస్పిరేటెడ్ పెట్రోల్ యూనిట్.. స్మూత్ డ్రైవింగ్, విశ్వసనీయ పనితీరును కోరుకునే వారికి సరైన ఎంపిక. రెండవది, 158 bhp టర్బోచార్జ్డ్ పెట్రోల్ ఇంజిన్.. మరింత పవర్, మరింత డ్రైవింగ్ థ్రిల్ కోరుకునే వారి కోసం. ఇదే ఇంజిన్ టాటా కర్వ్ కూపే-SUVలో కూడా కనిపించిందని గుర్తు చేస్తుంది.

మూడవది, 116 bhp డీజిల్ ఇంజిన్.. దూర ప్రయాణాలు చేసే వారికి, మైలేజ్, టార్క్‌ను ప్రాధాన్యత ఇచ్చే వినియోగదారులకు ఇదొక మంచి ఆప్షన్. ట్రాన్స్‌మిషన్ ఎంపికలూ విస్తృతంగానే ఉన్నాయి. 6-స్పీడ్ మాన్యువల్, 6-స్పీడ్ ఆటోమేటిక్, ఇంకా మరింత ప్రీమియం అనుభూతి ఇచ్చే 7-స్పీడ్ DCT.. ఇలా విభిన్న డ్రైవింగ్ స్టైల్స్‌కు తగ్గట్టుగా ఆప్షన్‌లు అందుబాటులో ఉన్నాయి. ప్రస్తుతం సియెర్రా ఫ్రంట్-వీల్-డ్రైవ్ (FWD) సెటప్‌తోనే వస్తోంది.

అయినా, ఆఫ్-రోడ్ ప్రియులు, అడ్వెంచర్ డ్రైవింగ్ అభిమానులు ఆశపడే ఆల్-వీల్-డ్రైవ్ (AWD) వెర్షన్ కోసం టాటా ఇప్పటికే ప్లాన్ చేసింది. 2027 నాటికి AWD సిస్టమ్‌ను అధికారికంగా మార్కెట్లోకి తీసుకురావాలని టాటా తెలిపింది. టాటా సియెర్రా కొత్త బాహ్య డిజైన్‌ని చూస్తే, ఇది కేవలం ఆధునికంగా కనిపించడం మాత్రమే కాదు, 1990లలో భారత రోడ్లపై చక్రాలు గిర్రున తిప్పిన అసలు సియెర్రాకు ఇచ్చిన గౌరవం స్పష్టంగా కనిపిస్తుంది.