టాటా వారి మిడిల్ క్లాస్ గిఫ్ట్.. పంచ్ పైన ఏకంగా రూ.1.75లక్షల డిస్కౌంట్..ఈ సారి స్టాక్ అంతా ఖాళీ అవ్వాల్సిందే

భారతదేశంలో ఎలక్ట్రిక్ వాహనాల (EV) అమ్మకాల్లో టాటా మోటార్స్ ఇతర కంపెనీలైన ఎంజీ (MG), మహీంద్రా (Mahindra) కంటే చాలా ముందుంది. ప్రస్తుతం టియాగో, టిగోర్, నెక్సాన్ వంటి ఆరు ఈవీ మోడళ్లను మార్కెట్లో విక్రయిస్తున్న టాటా, పోటీదారులను మరింత దూరం వెనుకకు నెట్టడానికి తమ పూర్తి ఎలక్ట్రిక్ వాహన శ్రేణిపై ఇయర్ ఎండ్ ఆఫర్‌లను ప్రకటించింది. ఈ ఆఫర్లలో భాగంగా టాటా అత్యధికంగా అమ్ముడవుతున్న మోడల్‌లలో ఒకటైన పంచ్ ఈవీ పై ఏకంగా రూ.1.75 లక్షల వరకు భారీ తగ్గింపును డిసెంబర్ నెల కోసం సిద్ధం చేసింది.

టాటా మోటార్స్ ప్రకటించిన ఈ రూ.1.75 లక్షల తగ్గింపు ఆఫర్‌లో రూ.60,000 క్యాష్ డిస్కౌంట్ (నగదు తగ్గింపు)తో పాటు, రూ.50,000 ఎక్స్ఛేంజ్ బోనస్ కూడా అందిస్తోంది. పంచ్ ఈవీ మొత్తం 19 వేరియంట్‌లలో లభిస్తుంది. ఈ ఆఫర్ అన్ని వేరియంట్లపై అందుబాటులో ఉండటం కొనుగోలుదారులకు అత్యంత అనుకూలమైన విషయం.

ప్రస్తుతం టాటా పంచ్ ఈవీ ఎక్స్-షోరూమ్ ధర రూ.9.99 లక్షల నుంచి రూ.14.44 లక్షల వరకు ఉంది. ఈ భారీ డిస్కౌంట్‌ను వినియోగించుకోవడం ద్వారా, కొనుగోలుదారులు తమకు నచ్చిన ఈవీని తక్కువ ధరకే ఇంటికి తీసుకువెళ్లవచ్చు.

టాటా పంచ్ ఈవీని కంపెనీ అడ్వాన్సడ్ కనెక్టెడ్ టెక్నాలజీ అయిన ఇంటెలిజెంట్ ఎలక్ట్రిక్ వెహికల్ (Acti.EV) ప్లాట్‌ఫామ్‌పై నిర్మించారు. ఈ ఎస్‌యూవీ స్టాండర్డ్ రేంజ్, లాంగ్ రేంజ్ అనే రెండు మోడళ్లలో లభిస్తుంది. స్టాండర్డ్ రేంజ్ మోడల్‌లో 25kWh బ్యాటరీ ఉంటుంది, ఇది 82 bhp పవర్, 114 Nm టార్క్‌ను ఉత్పత్తి చేస్తుంది. ఇక లాంగ్ రేంజ్ మోడల్‌లో పెద్ద 35kWh బ్యాటరీ ప్యాక్ ఉంటుంది. ఇది 122 bhp పవర్, 190 Nm టార్క్‌ను అందిస్తుంది.

పంచ్ ఈవీ రేంజ్ వివరాలు చూస్తే, స్టాండర్డ్ రేంజ్ వేరియంట్‌కు 265 కిలోమీటర్లు, లాంగ్ రేంజ్ వేరియంట్‌కు 365 కిలోమీటర్ల క్లెయిమ్డ్ రేంజ్ లభిస్తుంది. ఈ ఎస్‌యూవీ కేవలం 9.5 సెకన్లలో 0 నుంచి 100 కిలోమీటర్ల వేగాన్ని అందుకోగలదు. దీని గరిష్ట వేగం గంటకు 140 కిలోమీటర్లు.

ఛార్జింగ్ విషయంలో కూడా ఇది చాలా వేగంగా ఉంటుంది. 7.2 kW ఏసీ ఫాస్ట్ ఛార్జర్ ఉపయోగించి లాంగ్ రేంజ్ వెర్షన్‌ను కేవలం 5 గంటల్లోనే పూర్తిగా ఛార్జ్ చేయవచ్చు. అయితే, ACFC లేని పాత ఛార్జింగ్ పద్ధతిలో ఫుల్ ఛార్జ్ చేయడానికి దాదాపు 13.5 గంటల సమయం పడుతుంది.

పంచ్ ఈవీ డిజైన్ చూడటానికి నెక్సాన్ ఈవీ చిన్న వెర్షన్ లాగా కనిపిస్తుంది. ముందు భాగంలో కనెక్టెడ్ ఎల్‌ఈడీ డీఆర్‌ఎల్‌లు, క్లోజ్-ఆఫ్ గ్రిల్, సన్నని ఎల్‌ఈడీ హెడ్‌ల్యాంప్‌లు ప్రధాన ఆకర్షణగా నిలుస్తాయి.

ఇంటీరియర్‌లో ఆండ్రాయిడ్ ఆటో, ఆపిల్ కార్‌ప్లే కనెక్టివిటీతో కూడిన కొత్త 10.25 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, టూ-స్పోక్ స్టీరింగ్ వీల్, 360-డిగ్రీ కెమెరా, వెంటిలేటెడ్ ఫ్రంట్ సీట్లు, సన్‌రూఫ్, 6 ఎయిర్‌బ్యాగ్‌లు వంటి సేఫ్టీ ఫీచర్లను అందిస్తున్నారు. ఇన్ని ఫీచర్లు ఉన్నాయి కాబట్టే టాటా పంచ్ అమ్మకాలు భారీగా ఉన్నాయి.