టాటా బంపర్ ఆఫర్: కార్లపై రూ.2 లక్షల తగ్గింపు.. డిమాండ్ పెరగకముందే షోరూమ్‌కు పరిగెత్తండి

టాటా మోటార్స్ (Tata Motors) పండుగ సీజన్‌‌లో వినియోగదారులను ఆకట్టుకునే ప్రయత్నం చేస్తోంది. దేశంలోనే ప్రముఖ కార్ల తయారీ సంస్థగా పేరుగాంచిన టాటా మోటార్స్, తమ ప్యాసింజర్ వాహనాలపై భారీ స్థాయిలో ఆఫర్‌లను ప్రకటించింది. టాటా కార్లను కొనుగోలు చేసే వారికి రూ.2 లక్షల వరకు ప్రత్యేక ప్రయోజనాలు లభించనున్నాయి. ఈ ఆఫర్‌లు సెప్టెంబర్ 30, 2025 వరకు అందుబాటులో ఉంటాయని కంపెనీ స్పష్టంగా తెలిపింది. ఇప్పటికే కేంద్ర ప్రభుత్వం జీఎస్టీ సంస్కరణలు అమలు చేయడంతో కార్ల ధరల్లో తగ్గింపులు వచ్చాయి. దానికి తోడు టాటా మోటార్స్ అదనంగా నగదు తగ్గింపులు, ఎక్స్ఛేంజ్ బోనస్‌లు, పండుగ ఆఫర్‌లు వంటి బెనిఫిట్స్‌ను వినియోగదారులకు అందిస్తోంది. దీంతో ఈ పండుగ కాలం టాటా కస్టమర్లకు డబుల్ ఆనందం ఇచ్చేలా మారింది.

ముఖ్యంగా, ఈ ఆఫర్‌లు టాటా మోటార్స్‌లోని విభిన్న మోడల్స్, వాటి వేరియంట్ల ఆధారంగా మారుతూ ఉంటాయి. ప్రతి కస్టమర్‌కు తమ అవసరాలకు తగ్గట్టు ఒక ప్రత్యేక ఆఫర్ దొరకేలా కంపెనీ ప్లాన్ చేసింది. మరోవైపు, ఈ అన్ని ఆఫర్‌లు దేశవ్యాప్తంగా ఉన్న టాటా మోటార్స్ అధీకృత డీలర్‌షిప్‌ల ద్వారా లభిస్తాయని స్పష్టం చేసింది. సెలబ్రేషన్ టైమ్‌లో కొత్త కారు కొనాలనుకునే వారికి ఇది ఒక గొప్ప అవకాశంగా మారనుంది.

ధరలు తగ్గడం, అదనపు డిస్కౌంట్లతో టాటా మోటార్స్ ప్యాసింజర్ వాహనాలపై మార్కెట్ డిమాండ్ మరింత పెరిగే అవకాశముందని నిపుణులు భావిస్తున్నారు. పండుగ సీజన్‌కి ఇంత పెద్ద ఆఫర్ ఇవ్వడం ద్వారా టాటా మోటార్స్ తమ సేల్స్‌ను గణనీయంగా పెంచుకోవాలని లక్ష్యంగా పెట్టుకున్నట్లు కనిపిస్తోంది. టాటా మోటార్స్ తన పండుగ సీజన్ ఆఫర్‌లను టియాగో, టిగోర్, పంచ్, ఆల్ట్రోజ్, హారియర్, నెక్సాన్, కర్వ్, సఫారీ వంటి ప్రముఖ మోడళ్లపై ఇస్తోంది.

టియాగో కొనుగోలు చేసేవారికి సెప్టెంబర్ 20 వరకు మొత్తం రూ.1.20 లక్షల వరకు ప్రయోజనాలు లభిస్తాయి. ఇందులో రూ.75,000 వరకు ఎక్స్-షోరూమ్ ధర తగ్గింపు, రూ.45,000 విలువైన అదనపు నగదు తగ్గింపు ఉన్నాయి. GST 2.0 అమలు తర్వాత, టియాగో ధర రూ.4.57 లక్షల నుండి ప్రారంభమవుతుంది, ఇది సెగ్మెంట్‌లో మంచి విలువను అందిస్తుంది. అలాగే, టిగోర్ కాంపాక్ట్ సెడాన్‌పై రూ.1.11 లక్షల వరకు ఆఫర్ లభిస్తుంది.

ఇందులో ఎక్స్-షోరూమ్ ధరపై రూ.81,000 వరకు తగ్గింపు, అదనంగా రూ.30,000 విలువైన ప్రత్యేక బెనిఫిట్స్ ఉన్నాయి. పంచ్ మోడల్‌కి GST 2.0 అమలు తర్వాత మొత్తం రూ.1.08 లక్షల వరకు ధర తగ్గింపు లభించగా, అదనంగా కంపెనీ రూ.50,000 వరకు ప్రత్యేక ప్రయోజనాలను కూడా అందించింది. కాంపాక్ట్ SUV టాటా నెక్సాన్ కొనుగోలు చేసేవారికి గరిష్టంగా రూ.2 లక్షల వరకు ప్రయోజనాలు లభిస్తున్నాయి.

ఇందులో జీఎస్టీ 2.0 ప్రకారం రూ.45,000 అదనపు బెనిఫిట్‌లతో కలిపి మొత్తం ఎక్స్-షోరూమ్ ధర రూ.1.55 లక్షల వరకు తగ్గింది. టాటా కర్వ్ కొనుగోలుదారులకు మొత్తం రూ.1.07 లక్షల వరకు ఆదా అవకాశాలు ఉన్నాయి. ఇందులో GST 2.0 తరువాత ధరపై రూ.67,000 తగ్గింపు, అదనంగా రూ.40,000 విలువైన ప్రత్యేక ప్రయోజనాలు పొందవచ్చు. ఆల్ట్రోజ్ మొత్తం రూ.1.76 లక్షల వరకు ఆదాతో లభిస్తోంది.

ఇందులో ఎక్స్-షోరూమ్ ధరపై రూ.1.11 లక్షల తగ్గింపు, అదనంగా రూ.65,000 విలువైన బెనిఫిట్స్ వినియోగదారులకు అందుబాటులో ఉన్నాయి. ప్రీమియం SUV మోడళ్లు హారియర్ మరియు సఫారీ కూడా ఆఫర్‌లలో భాగంగా లభిస్తున్నాయి. వీటిలో ప్రారంభ ఎక్స్-షోరూమ్ ధరలు వరుసగా రూ.1.44 లక్షలు, రూ.1.48 లక్షలు తగ్గాయి, దీని ద్వారా ఈ మోడళ్లు కూడా ఎక్కువగా ఆకర్షణీయంగా మారాయి.