సేల్స్‌లో నంబర్ 1 కారు.. భారీగా కొనుగోలు చేస్తున్నారు.. టాటాకు బంగారు గుడ్డు లాంటిది!

భారత ఆటోమొబైల్ రంగంలో తన ప్రత్యేక స్థానం సంపాదించిన టాటా మోటార్స్ (Tata Motors), మళ్లీ ఒకసారి వినియోగదారుల దృష్టిని ఆకర్షించింది. కంపెనీ తన అత్యంత ప్రజాదరణ పొందిన SUV టాటా నెక్సాన్ (Nexon) సిరీస్‌లో కొత్త మైలురాయిని చేరుకుంది. దేశంలో భద్రతకు కొత్త ప్రమాణాలు సృష్టించిన ఈ SUV, ఇప్పుడు మరింత ఆధునికతతో ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్) అనే అత్యాధునిక టెక్నాలజీని సొంతం చేసుకుంది. టాటా మోటార్స్ తెలిపిన ప్రకారం, నెక్సాన్‌లో జోడించబడిన ఈ ADAS టెక్నాలజీ డ్రైవింగ్‌ను మరింత సురక్షితంగా, స్మార్ట్‌గా, సౌకర్యవంతంగా మారుస్తుంది. ఈ సిస్టమ్‌లో లేన్ డిపార్చర్ వార్నింగ్, ఫార్వర్డ్ కొలిజన్ అలర్ట్, ఆటోమేటిక్ ఎమర్జెన్సీ బ్రేకింగ్, బ్లైండ్ స్పాట్ డిటెక్షన్ వంటి అత్యాధునిక ఫీచర్లు ఉండే అవకాశం ఉంది.

ఇవి రహదారులపై ప్రమాదాల అవకాశాలను తగ్గించి, డ్రైవర్‌కు తక్షణ హెచ్చరికలు ఇస్తాయి. నెక్సాన్ గురించి మాట్లాడితే, ఇది భారతదేశంలో భద్రతా విప్లవానికి సంకేతంగా నిలిచిన కారు. దేశంలో మొదటిసారిగా GNCAP, BNCAP రెండింటి నుంచి కూడా 5-స్టార్ సేఫ్టీ రేటింగ్‌లు పొందిన SUV‌గా టాటా నెక్సాన్ తన ప్రత్యేకతను కొనసాగిస్తోంది. ఇది కేవలం టాటా మోటార్స్‌కే కాకుండా భారతీయ ఆటోమొబైల్ పరిశ్రమకు కూడా గర్వకారణంగా మారింది.

భద్రత మాత్రమే కాదు, అమ్మకాల పరంగానూ నెక్సాన్ తన సత్తాను నిరూపిస్తోంది. సెప్టెంబర్ 2025లో ఒక్క నెలలోనే 22,500 యూనిట్లకు పైగా విక్రయాలు నమోదు చేసి, టాటా మోటార్స్‌కి మరో మైలురాయి సృష్టించింది. ఈ రికార్డు నెక్సాన్‌కి ఉన్న ప్రజాదరణను, వినియోగదారుల నమ్మకాన్ని స్పష్టంగా చూపిస్తుంది. ఈ విజయాన్ని పురస్కరించుకుని, టాటా మోటార్స్ వినియోగదారులకు ప్రత్యేక గిఫ్ట్‌గా కొత్త రెడ్ DARK ఎడిషన్‌ను కూడా పరిచయం చేసింది.

ఈ ఎడిషన్ పెట్రోల్, డీజిల్,CNG వేరియంట్లలో అందుబాటులో ఉండి, ధర రూ.12.44 లక్షల నుండి ప్రారంభమవుతుంది. రెడ్ DARK ఎడిషన్ ప్రత్యేకత ఏమిటంటే, ఇది నెక్సాన్‌కి మరింత స్పోర్టీ, రగ్డ్ లుక్ ఇస్తుంది. దాని గ్లాసీ రెడ్ ఆకర్షణతో పాటు డార్క్ థీమ్ ఇంటీరియర్ కాంబినేషన్ SUVకి ప్రీమియం ఫీల్‌ను అందిస్తుంది. మొత్తం మీద, నెక్సాన్ ఇప్పుడు భద్రత, టెక్నాలజీ, డిజైన్, పనితీరు అన్నీ కలిపిన పరిపూర్ణ SUVగా నిలిచింది.

అలాగే, టాటా నెక్సాన్ ఇప్పుడు మరింత స్మార్ట్‌గాను, భద్రత పరంగా అత్యున్నత స్థాయిలోనూ మారింది. డ్రైవర్, ప్రయాణికుల భద్రతను దృష్టిలో పెట్టుకుని, కంపెనీ ఈ SUVలో ADAS (Advanced Driver Assistance Systems) అనే అత్యాధునిక సాంకేతిక వ్యవస్థను ప్రవేశపెట్టింది.ఈ వ్యవస్థలో భాగంగా జోడించబడిన ఫీచర్లు వాహన నియంత్రణను మరింత మెరుగుపరుస్తాయి, ప్రమాదాలను ముందుగానే నివారించే సామర్థ్యాన్ని పెంచుతాయి.

ముఖ్యంగా Autonomous Emergency Braking(AEB) ఫీచర్ వాహనం ముందు అడ్డంకి లేదా వేరే వాహనం కనిపించిన వెంటనే ఆటోమేటిక్‌గా బ్రేక్‌లు అప్లై చేస్తుంది, తద్వారా ఢీకొట్టే ప్రమాదాన్ని తగ్గిస్తుంది. అలాగే Forward Collision Warning(FCW) ఫీచర్ ద్వారా ముందున్న వాహనంతో గల దూరం తగ్గినప్పుడు డ్రైవర్‌కి తక్షణ హెచ్చరిక ఇస్తుంది. Lane Keep Assist డ్రైవర్ గమనించకుండా లేన్‌ను దాటి వెళ్తే వాహనాన్ని తిరిగి సరైన దారిలోకి మళ్లించడంలో సహాయపడుతుంది.