టాటా సియోరా సంచలనం.. లీటరుకు 29.9 కి.మీ మైలేజ్..ఇండియా బుక్ ఆఫ్ రికార్డ్స్‎లో స్థానం

టాటా మోటార్స్ ఇటీవల భారతీయ మార్కెట్‌లో విడుదల చేసిన సియెరా ఎస్‌యూవీ ఇప్పటికే పెద్ద సంచలనం సృష్టిస్తోంది. అసలైన సియెరా లక్షణాలను నిలుపుకుంటూ, కొత్త కాలానికి అనుగుణంగా హైటెక్ ఎస్‌యూవీగా వచ్చిన ఈ కారు, తొలి ప్రయాణంలోనే ఒక చారిత్రక ఘనతను సాధించింది.

భారతీయ ఆటోమోటివ్ రంగంలో ఎప్పటికీ గుర్తుండిపోయే ఈ ఘనత సియెరాను ఇండియా బుక్ ఆఫ్ రికార్డ్స్‌లో చేర్చింది. 12 గంటల పాటు జరిగిన కంట్రోల్డ్ ఎండ్యూరెన్స్ రన్‌లో లీటరుకు 29.9 కిలోమీటర్ల సర్టిఫైడ్ మైలేజ్‌ను సాధించడం ద్వారా సియెరా మునుపటి రికార్డులన్నింటినీ అధిగమించింది.

సియెరా ఈ రికార్డును NATRAX (National Automotive Test Tracks), ఇండోర్ వద్ద సాధించింది. నవంబర్ 30, 2025 న ఉదయం 7 గంటల నుంచి సాయంత్రం 7 గంటల వరకు జరిగిన ఈ ఎండ్యూరెన్స్ రన్‌ను పిక్సెల్ మోషన్ టీమ్ పూర్తి చేసింది. డ్రైవర్లను మార్చడానికి మాత్రమే చిన్న విరామాలు తీసుకున్నారు.

మైలేజీని గరిష్టంగా పెంచడానికి, టెస్ట్ సమయంలో సగటున 65-70 కిలోమీటర్ల స్థిరమైన వేగాన్ని కొనసాగించారు. ఇంజిన్‌ను అత్యంత సమర్థవంతమైన ఆర్‌పీఎం పరిధిలో పనిచేయడానికి ఈ స్థిరమైన వేగం సహాయపడుతుంది. దీని ఫలితంగా సాధారణ రోడ్డు పరిస్థితుల కంటే మైలేజ్ గణనీయంగా మెరుగుపడుతుంది. ఈ మైలేజ్ టెస్ట్ కోసం టాటా సియెరా 12 గంటల్లో సుమారు 800 కిలోమీటర్లు ప్రయాణించింది.

ఈ రికార్డు సాధించడంలో ప్రధాన పాత్ర పోషించింది టాటా సియెరా 1.5 లీటర్ హైపీరియన్ పెట్రోల్ ఇంజిన్. ఈ అసాధారణ మైలేజ్ రికార్డు వెనుక ఉన్న అసలు హీరో టాటా సియెర్రా 1.5 లీటర్ హైపీరియన్ పెట్రోల్ ఇంజన్. ఈ అత్యాధునిక ఇంజన్ టెక్నాలజీ కేవలం ఇంధన సామర్థ్యాన్ని మాత్రమే కాకుండా, సున్నితమైన డ్రైవింగ్ అనుభవాన్ని, శక్తిని కూడా అందిస్తుంది.

హైపీరియన్ ఇంజన్ ముఖ్య లక్షణాల విషయానికి వస్తే.. అడ్వాన్స్‌డ్ కంబషన్ సిస్టమ్, టార్క్-రిచ్ పెర్ఫార్మెన్స్ బ్యాండ్, లో ఫ్రిక్షన్ ఆర్కిటెక్చర్. ఈ టెక్నికల్ అంశాలు 12 గంటల పాటు నిరంతరంగా నడిపినా కూడా ఇంజన్ స్థిరమైన, సమర్థవంతమైన పనితీరును కొనసాగించడానికి సహాయపడ్డాయి.

ఈ రికార్డుపై స్పందించిన టాటా మోటార్స్ చీఫ్ ప్రొడక్ట్ ఆఫీసర్ మోహన్ సావర్కర్.. హైపీరియన్ ఇంజన్ పెట్రోల్ పవర్‌ట్రైన్ల సామర్థ్యాన్ని పెంచే లక్ష్యంతో రూపొందించబడిందని, ఈ రికార్డు దానికి నిదర్శనమని తెలిపారు.

ఇదే NATRAX ట్రాక్‌పై సియెర్రా మరో అద్భుత ప్రదర్శనలో గంటకు 222 కిలోమీటర్ల టాప్ స్పీడ్‌ను కూడా నమోదు చేసింది. ఈ రెండు రికార్డులు (మైలేజ్, టాప్ స్పీడ్) హైపీరియన్ ఇంజన్ సామర్థ్యాన్ని, పవర్ ను ఒకేసారి రుజువు చేశాయి.

సియెర్రాను మొత్తం 7 వేరియంట్లలో విడుదల చేశారు. దీని ప్రారంభ ఎక్స్-షోరూమ్ ధర రూ.11.49 లక్షలు. ఈ కారులో కనెక్టెడ్ లైటింగ్, పనోరమిక్ సన్‌రూఫ్, డిజిటల్ ఇన్‌స్ట్రుమెంటేషన్, ఎలక్ట్రికల్‌గా అడ్జస్ట్ చేయగల సీట్లు, మల్టీ డ్రైవర్-అసిస్ట్ సిస్టమ్స్ వంటి అనేక ఫీచర్లు ఉన్నాయి.

ఈ కారు బుకింగ్‌లు డిసెంబర్ 16 నుంచి ప్రారంభమై, డెలివరీలు 2026 జనవరి మధ్యలో మొదలవుతాయి. అకంప్లిష్డ్, అకంప్లిష్డ్ ప్లస్ అనే రెండు టాప్ వేరియంట్ల ధరలు మాత్రమే ఇంకా ప్రకటించాల్సి ఉంది.