22 ఏళ్లుగా ఎదురు చూశారు..మరి ఇప్పుడు వస్తే వదిలేస్తారా..ఒక్క రోజులోనే 70000 వేల మంది బుక్ చేశారు

భారతీయ ఆటోమొబైల్ చరిత్రలో చెరగని ముద్ర వేసిన వాహనాలలో టాటా సియెర్రా (Tata Sierra) ఒకటి. 1991 నుంచి 2003 వరకు విక్రయించబడిన ఈ లెజెండరీ ఎస్‌యూవీ, మారుతి 800, హిందుస్థాన్ అంబాసడర్ మాదిరిగానే వినియోగదారులలో ఒక ప్రత్యేక అభిమానాన్ని సంపాదించుకుంది.

దాదాపు 22 సంవత్సరాల సుదీర్ఘ విరామం తర్వాత టాటా మోటార్స్ ఈ ఐకానిక్ కారును మోడ్రన్ టెక్నాలజీ, సరికొత్త రూపంతో భారత మార్కెట్‌లో తిరిగి విడుదల చేసింది. నవంబర్ 25న విడుదలైన ఈ న్యూ-జెన్ సియెర్రాపై కస్టమర్లలో భారీ అంచనాలు నెలకొన్నాయి. ఆ అంచనాలను నిజం చేస్తూ బుకింగ్‌ల విషయంలో ఈ కారు రికార్డులు సృష్టించడం ఖాయంగా కనిపిస్తోంది.

టాటా సియెర్రా కోసం అధికారిక బుకింగ్‌ల స్వీకరణ డిసెంబర్ 16న ప్రారంభమైంది. తొలి రోజే 70 వేలకు పైగా భారతీయ కస్టమర్లు కొత్త సియెర్రా కారును విజయవంతంగా బుక్ చేసుకున్నారు. ఇది టాటా మోటార్స్ మార్కెట్ ఆధిపత్యాన్ని సూచిస్తుంది. అయితే అత్యంత ముఖ్యమైన విషయం ఏమిటంటే మరో 1.35 లక్షల మంది కస్టమర్లు సియెర్రాను కొనుగోలు చేయడానికి తమ ఆసక్తిని (ఎక్స్‌ప్రెషన్ ఆఫ్ ఇంటరెస్ట్) తెలియజేసి, బుకింగ్ ప్రక్రియలను పూర్తి చేసే పనిలో ఉన్నారు.

ఈ గణాంకాలను బట్టి చూస్తే, రాబోయే రోజుల్లో సియెర్రా మొత్తం బుకింగ్‌ల సంఖ్య సులభంగా 2 లక్షలకు పైగా చేరుకుంటుందని టాటా మోటార్స్ పత్రికా ప్రకటనలో అధికారికంగా ధృవీకరించింది. ఈ స్థాయి స్పందన, సియెర్రా పట్ల భారతీయ వినియోగదారులకు ఉన్న బలమైన అనుబంధాన్ని తెలియజేస్తుంది. కస్టమర్లకు వాహనాల డెలివరీ జనవరి 15 నుంచి ప్రారంభం కానుంది.

కొత్త టాటా సియెర్రా పవర్ఫుల్, విభిన్నమైన మూడు ఇంజన్ ఆప్షన్లలో అందుబాటులో ఉంది. ఇది వివిధ రకాల వినియోగదారుల అవసరాలను తీరుస్తుంది. అవి 1.5 లీటర్ క్రయోజెక్ట్ డీజిల్ ఇంజన్, 1.5 లీటర్ TGDi హైపీరియన్ పెట్రోల్ ఇంజన్, ఇది మరింత మెరుగైన పనితీరును అందిస్తుంది. 1.5 లీటర్ NA రెవోట్రాన్ పెట్రోల్ ఇంజన్, ఇది సాధారణ వినియోగానికి అనుకూలంగా ఉంటుంది.

ట్రాన్స్‌మిషన్ (గేర్ బాక్స్) విషయానికి వస్తే, 6-స్పీడ్ మాన్యువల్, 6-స్పీడ్ ఆటోమేటిక్, అత్యంత అధునాతనమైన 7-స్పీడ్ డీసీఏ (DCA - డ్యూయల్ క్లచ్ ఆటోమేటిక్) వంటి ఆప్షన్లు ఇందులో అందించారు. ఇది సున్నితమైన డ్రైవింగ్ అనుభవాన్ని ఇస్తుంది.

సియెర్రా ఇంటీరియర్ టెక్నాలజీ, విలాసవంతమైన ఫీచర్ల కలయికగా ఉంది. ఇందులో అత్యంత ముఖ్యమైన ఆకర్షణ ఇంటీరియర్‌లోని ట్రై-స్క్రీన్ లేఅవుట్.. ముందు ప్రయాణీకుల సీటు ముందు 12.3 అంగుళాల డిస్‌ప్లే, వినోదం, సమాచారాన్ని అందిస్తుంది. సెంట్రల్ డాష్‌బోర్డ్‌లో 12.3 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, డ్రైవర్ కోసం 10.25 అంగుళాల డిజిటల్ ఇన్‌స్ట్రుమెంట్ క్లస్టర్ అందుబాటులో ఉంది.

ఈ ఫీచర్లతో పాటు, పనోరమిక్ సన్‌రూఫ్, ముందు భాగంలో వెంటిలేషన్ సౌకర్యంతో కూడిన సీట్లు, 12-స్పీకర్ల జేబీఎల్ (JBL) సౌండ్ సిస్టమ్, కీలెస్ ఎంట్రీతో కూడిన పుష్ బటన్ స్టార్ట్/స్టాప్ వంటి సౌకర్యాలు కూడా ఉన్నాయి.

సేఫ్టీ విషయంలో టాటా మోటార్స్ ఎప్పుడూ రాజీ పడదు. సియెర్రాలో సేఫ్టీకి అత్యధిక ప్రాధాన్యతనిచ్చారు. ఇందులో లెవెల్ 2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్) వంటి అత్యాధునిక భద్రతా ఫీచర్ ఉంది, ఇది ప్రమాదాలను నివారించడంలో సహాయపడుతుంది. దీనితో పాటు ట్రెండ్ సెట్టర్‌గా నిలుస్తూ, అన్ని వేరియంట్లలో స్టాండర్డ్‌గా 6 ఎయిర్‌బ్యాగ్‌లు, టైర్ ప్రెషర్ మానిటరింగ్ సిస్టమ్, 360డిగ్రీ కెమెరా వంటి కీలక సేఫ్టీ ఫీచర్లు కూడా అందించబడ్డాయి.

టాటా సియెర్రా ఎక్స్-షోరూమ్ ప్రారంభ ధర కేవలం రూ.11.49 లక్షలు మాత్రమే కావడం, టాప్ వేరియంట్ ధర రూ.21.49 లక్షలుగా ఉండటం ఈ భారీ బుకింగ్‌లకు ప్రధాన కారణం. ఈ ధరలో ఇన్ని అధునాతన ఫీచర్లు, సేఫ్టీని అందించడం వలన, ఈ కారు మార్కెట్‌లో విలువైన ఉత్పత్తిగా నిలిచింది. ఈ అనూహ్య విజయం మారుతి సుజుకి గ్రాండ్ విటారా, హ్యుందాయ్ క్రెటా, కియా సెల్టోస్ వంటి ప్రముఖ మిడ్ సైజ్ ఎస్‌యూవీలకు అమ్మకాల విషయంలో గట్టి పోటీని, తీవ్ర ఒత్తిడిని కలిగించనుంది.