ఇంత తక్కువ ధరలో 75 ఫీచర్లు.. ఇలా ఇవ్వడం ఒక్క టాటాకే సాధ్యం.. సెల్టోస్, క్రెటాలు షెడ్డుకే

టాటా మోటార్స్(Tata Motors) తమ బ్రాండ్‌ను బలోపేతం చేసుకుంటూ సరికొత్త సియెర్రా (Sierra) ఎస్‌యూవీని భారత మార్కెట్‌లోకి విడుదల చేసింది. దీని ప్రారంభ ధర రూ.11.49లక్షలు (ఎక్స్-షోరూమ్)గా నిర్ణయించారు. ఈ ధర ఈ సెగ్మెంట్‌లోని హ్యుందాయ్ క్రెటా (Hyundai Creta), కియా సెల్టోస్ (Kia Seltos), మారుతి గ్రాండ్ విటారా వంటి కార్లకు గట్టి పోటీ ఇవ్వడానికి అనువుగా ఉంది.

ఈ 5-డోర్ల ప్రీమియం ఎస్‌యూవీ కోసం కస్టమర్లు ఆసక్తిగా ఎదురుచూస్తున్నారు. డిసెంబర్ 16వ తేదీ నుంచి దీని బుకింగ్‌లు ప్రారంభమవుతాయి. డెలివరీలు మాత్రం కొత్త సంవత్సరం కానుకగా, 2026 జనవరి 15వ తేదీ నుంచి మొదలవుతాయని కంపెనీ ప్రకటించింది. కొత్త సియెర్రా ఆధునిక డిజైన్ ప్లాట్‌ఫారమ్‌పై రూపొందించారు. ఇది పాత సియెర్రా ఐకానిక్ డిజైన్ అంశాలను కొత్త టెక్నాలజీతో మిళితం చేస్తుంది.

తన విభాగంలో 19 అంగుళాల అలాయ్ వీల్స్‌ను ఇస్తున్న మొట్టమొదటి కారు ఇదే. ఈ పెద్ద వీల్స్ కారుకు స్టైలిష్ లుక్ ఇస్తాయి. అలాగే రోడ్డుపై అద్భుతమైన పట్టు ఇస్తాయి. కఠినమైన రోడ్ల కోసం సస్పెన్షన్‌ను ప్రత్యేకంగా ట్యూనింగ్ చేశారు. సియెర్రా లోపలి భాగంలో అతి పెద్ద పనోరమిక్ సన్‌రూఫ్‌‎ను అందించారు.

దీని కొలతలు 1525 మి.మీ.X 925 మి.మీ. వరకు ఉన్నాయి. ఇది వెనుక సీటు దాటి C-పిల్లర్ వరకు విస్తరించి ఉంటుంది. ఇది కారు లోపల చాలా వెలుతురును ఇస్తుంది. లోపలి భాగం మరింత విశాలంగా, విలాసవంతంగా ఉన్న అనుభూతిని ఇస్తుంది.

టెక్నాలజీ పరంగా సియెర్రా చాలా అడ్వాన్స్‌డ్‌గా ఉంది. ఇందులోని థియేటర్ ప్రో ట్రిపుల్ స్క్రీన్ డాష్‌బోర్డ్ ఎస్‌యూవీ సెగ్మెంట్‌లో విప్లవాత్మకం.ఇందులో 12.3 అంగుళాల డిజిటల్ ఇన్‌స్ట్రుమెంట్ క్లస్టర్, 12.3 అంగుళాల సెంట్రల్ ఇన్ఫోటైన్‌మెంట్ టచ్‌స్క్రీన్, ముందు సీట్లో కూర్చునే ప్రయాణికుడి కోసం ప్రత్యేకంగా మరో 12.3 అంగుళాల డిస్‌ప్లే ఉంటాయి. ఇది కారు లోపల ప్రీమియం, భవిష్యత్తు లుక్‌ను ఇస్తుంది.

సాధారణంగా లగ్జరీ కార్లలో కనిపించే ఫీచర్‌ను టాటా సియెర్రా ఈ సెగ్మెంట్‌కు తీసుకొచ్చింది. సియెర్రాలో AR (Augmented Reality) హెడ్స్-అప్ డిస్‌ప్లే ఉంది. ఇది భారతదేశంలో తయారైన ICE (ఇంటర్నల్ కంబషన్ ఇంజిన్) వాహనాలలో మొట్టమొదటిది. ఇది డ్రైవర్‌కు కావాల్సిన నావిగేషన్ సమాచారాన్ని నేరుగా ముందున్న అద్దంపై చూపిస్తుంది. ఇందులో 19 స్మార్ట్ విజువల్స్ నాలుగు వేర్వేరు డ్రైవింగ్ మోడ్‌లు ఉంటాయి.

డాల్బీ అట్మాస్ (Dolby Atmos) సౌండ్‌తో కూడిన 12-స్పీకర్ల JBL ఆడియో సిస్టమ్ ఉంది. సోనిక్‌షాఫ్ట్ అనే ప్రత్యేకమైన సౌండ్‌బార్ ఇంటీరియర్‌కు మరింత స్టైల్‌ను జోడిస్తుంది. సియెర్రా, టాటా మోటార్స్ అడ్వాన్స్‌డ్ iRA కనెక్టెడ్ కార్ యాప్‌తో వస్తుంది.

ఇందులో మొత్తం 75 ఇంటెలిజెంట్ ఫీచర్లు ఉన్నాయి. వీటిలో ఐదు ఫీచర్లు ఇండియన్ కాంపాక్ట్ ఎస్‌యూవీ సెగ్మెంట్‌లో మొదటిసారిగా పరిచయం చేయబడ్డాయి. ఈ యాప్ స్మార్ట్ అలర్ట్‌లు ప్రయాణాన్ని సులభతరం చేసే సదుపాయాలను అందిస్తుంది.

సియెర్రా, అధునాతన టెక్నాలజీ, మెరుగైన డిజైన్, డ్రైవింగ్ సౌలభ్యం కలయికగా వచ్చింది. సెగ్మెంట్‌లోనే మొదటి ఫీచర్లు బెస్ట్-ఇన్-క్లాస్ అనుభవాన్ని ఇస్తాయి. ఈ ఫీచర్లు ఖచ్చితంగా సెల్టోస్, క్రెటా వంటి ఇతర ఎస్‌యూవీలకు గట్టి సవాల్ విసురుతాయని మార్కెట్ నిపుణులు అంచనా వేస్తున్నారు.