టెస్లా తొలి ఎలక్ట్రిక్ కారు భారత్‌లో లాంచ్.. మోడల్ Y ధర తెలిస్తే షాక్! ఎంతంటే?

అమెరికాకు చెందిన ప్రముఖ ఎలక్ట్రిక్ వాహన తయారీ సంస్థ టెస్లా (Tesla), భారత మార్కెట్లోకి అడుగుపెట్టాలని ఎంతో కాలంగా ఎదురుచూస్తున్న విషయం తెలిసిందే. తాజాగా ఈ రోజు భారత మార్కెట్లోకి అధికారికంగా ప్రవేశించింది. తన తొలి ఎలక్ట్రిక్ కారుగా టెస్లా మోడల్ Y‌ ను భారతదేశంలో లాంచ్ చేసింది. కంపెనీ తాజా వెబ్‌సైట్ సమాచారం ప్రకారం, మోడల్ Y ధరలు ప్రీమియం సెగ్మెంట్ వినియోగదారులను ఆకర్షించే విధంగా ఉన్నాయి. టెస్లా మోడల్ వై (Tesla Model Y) భారత వినియోగదారుల కోసం రెండు వేరియంట్లలో లభించనుంది. మొదటిది RWD (రియర్ వీల్ డ్రైవ్) వేరియంట్, దీని ప్రారంభ ధర రూ. 59.89 లక్షలుగా నిర్ణయించారు. ఇది దేశీయ ప్రీమియం ఎలక్ట్రిక్ కార్ల విభాగంలో ప్రధాన ఆకర్షణగా నిలిచే అవకాశముంది.

ఇక మరోవైపు, లాంగ్ రేంజ్ వేరియంట్ మరింత శక్తివంతమైన బ్యాటరీ సామర్థ్యంతో వస్తుంది. దీని ధర రూ. 67.89 లక్షలు. ఎక్కువ దూరాలను కేవలం ఒకే ఛార్జ్‌తో ప్రయాణించాలనుకునే వారికి బెస్ట్. ఇది టెస్లా భారతదేశంలో ప్రవేశపెడుతున్న మొదటి మోడల్ కావడంతో, బ్రాండ్ పరంగా కూడా ఇది ప్రత్యేకతను సంతరించుకుంది. టెస్లా మోడల్ Y డిజైన్, టెక్నాలజీ, పెర్ఫార్మెన్స్ పరంగా గ్లోబల్ మార్కెట్లో ఇప్పటికే తన స్థానం సంపాదించుకుంది.

అదే నాణ్యతను ఇప్పుడు భారత వినియోగదారుల ముందుకు తీసుకురావడం, టెస్లా భారత EV రంగంలో కీలక మార్పులకు నాంది పలుకుతుందనే అంచనాలు కలుగజేస్తోంది. ప్రీమియం సెగ్మెంట్‌లో ధరలు ఉన్నప్పటికీ, టెస్లా మోడల్ Y అందించే టెక్నాలజీ, డిస్టింక్ట్ డిజైన్, ఆటోనామస్ ఫీచర్లపై ఆధారపడి మార్కెట్‌లో మంచి స్పందన లభించే అవకాశాలు స్పష్టంగా కనిపిస్తున్నాయి. టెస్లా మోడల్ Y భారతదేశంలోకి ప్రవేశించడంతో, ఈ గ్లోబల్ ఎలక్ట్రిక్ SUVపై ఆసక్తి మరింత పెరిగింది.

శక్తివంతమైన బ్యాటరీ, దీర్ఘ శ్రేణి, మరియు అంతర్జాతీయ ప్రమాణాలతో ఇది ముందుకు వస్తోంది. Tesla Model Y రియర్ వీల్ డ్రైవ్(RWD) వేరియంట్‌ గురించి మాట్లాడితే, ఇది ఒక్కసారి పూర్తిగా ఛార్జ్ చేసిన తర్వాత సుమారు 500 కిలోమీటర్లు ప్రయాణించగలదని టెస్లా ప్రకటించింది. ఇక, లాంగ్ రేంజ్ వేరియంట్ అయితే మరింత మెరుగైన రేంజ్‌ను కలిగి ఉంది, ఇది ఒకే ఛార్జ్‌తో 622 కిలోమీటర్ల వరకు ప్రయాణించగలదని తెలుస్తుంది.

ఈ గణాంకాలు అంతర్జాతీయంగా పాటించే WLTC ప్రమాణాల ప్రకారం ఇవ్వబడ్డాయి, ఇవి గ్లోబల్ మార్కెట్లోని వాస్తవిక డ్రైవింగ్ పరిస్థితులను ప్రతిబింబిస్తాయి. ధరల పరంగా చూస్తే, టెస్లా మోడల్ Y ఇతర దేశాల్లో తక్కువ ధరకే లభ్యమవుతోంది. ఉదాహరణకు, అమెరికాలో దీని ప్రారంభ ధర $44,990, చైనాలో 263,500 యువాన్లు, జర్మనీలో 45,970 యూరోల*గా ఉంది. కానీ భారత మార్కెట్లో మాత్రం మోడల్ Y అధిక ధరకు వస్తోంది.

దీని వెనుక ప్రధాన కారణాలుగా దిగుమతి సుంకాలు, సుదూర లాజిస్టిక్స్ ఖర్చులు, మరియు సంబంధిత పన్నులు నిలుస్తున్నాయి. ఈ కారణాల వల్ల, భారతదేశంలో టెస్లా మోడల్ Y గ్లోబల్ స్థాయిలో చూస్తే అత్యంత ఖరీదైన మార్కెట్లలో ఒకటిగా నిలిచింది. అయినప్పటికీ, టెస్లా బ్రాండ్ ప్రతిష్ఠ, EV టెక్నాలజీలో ఉన్న ఆధిపత్యం, లాంగ్ రేంజ్ వంటి అంశాలు, టెస్లా మోడల్ Yను భారత మార్కెట్లోని ప్రీమియం వినియోగదారులకు ఆకర్షణీయంగా నిలిపే అవకాశముంది.