కారు కావాలంటే ఏళ్ల తరబడి ఆగాలా? షోరూం వాళ్ళ మాటలు నమ్మకండి.. మీ జేబులు ఖాళీ చేయడానికి ఇదో స్కెచ్

కొత్త కారు కొనాలనుకునే వారు షోరూమ్‌కి వెళ్లగానే డీలర్లు చెప్పే మొదటి మాట వెయిటింగ్ పీరియడ్. కారు బుక్ చేసిన తర్వాత చేతికి రావడానికి నెలలు, ఒక్కోసారి ఏళ్ల తరబడి వేచి చూడాల్సి వస్తోంది. డిమాండ్ ఎక్కువగా ఉండటం వల్లే ఈ ఆలస్యం అని మనం అనుకుంటాం. కానీ దీని వెనుక కంపెనీలు, డీలర్లు ఆడే ఒక పెద్ద మైండ్ గేమ్ ఉందని మీకు తెలుసా? కస్టమర్లను ఊరించడం ద్వారా తమ బ్రాండ్ వాల్యూను పెంచుకోవడానికి కంపెనీలు చేసే కొన్ని గమ్మత్తైన విన్యాసాల గురించి ఇప్పుడు తెలుసుకుందాం.

కార్ల కంపెనీలు మార్కెట్లో ఒక కృత్రిమ డిమాండ్‌ను సృష్టించడానికి ఈ వెయిటింగ్ పీరియడ్‌ను ఒక ఆయుధంగా వాడుకుంటాయి. నిజానికి ఫ్యాక్టరీలు తమ పూర్తి సామర్థ్యంతో పని చేస్తే కార్లను వేగంగా డెలివరీ చేయవచ్చు. కానీ, ఉద్దేశపూర్వకంగానే ఉత్పత్తిని నియంత్రించడం ద్వారా మార్కెట్లో ఒక హైప్ క్రియేట్ చేస్తారు. ఈ కారు కోసం వేల మంది లైన్లో ఉన్నారు అనే భావన కస్టమర్లలో ఆ కారుపై నమ్మకాన్ని, క్రేజ్‌ను పెంచుతుంది. ఇది ఒక పకడ్బందీ మార్కెటింగ్ వ్యూహం.

వేరియంట్లలో వివక్ష: మీరు గమనిస్తే తక్కువ ధరకు వచ్చే బేస్ వేరియంట్లకే వెయిటింగ్ పీరియడ్ ఎక్కువగా ఉంటుంది. ఎందుకంటే కంపెనీలు వీటిని తక్కువ సంఖ్యలో తయారు చేస్తాయి. అదే ఎక్కువ ఫీచర్లు ఉండి, ఎక్కువ లాభం వచ్చే టాప్ వేరియంట్లు అయితే వెంటనే దొరుకుతాయి. కస్టమర్ విసిగిపోయి, ఎలాగోలా కారు కావాలనే ఆత్రుతతో.. వద్దనుకున్నా ఎక్కువ డబ్బు ఖర్చు చేసి టాప్ వేరియంట్ వైపు మొగ్గు చూపేలా ఈ వెయిటింగ్ పీరియడ్లు ప్రోత్సహిస్తాయి.

డీలర్ల మాయాజాలం: డెలివరీ విషయంలో డీలర్ల పాత్ర కూడా కీలకమే. ఎవరైతే కంపెనీ ఇచ్చే ఇన్సూరెన్స్, అదనపు యాక్సెసరీస్, ఎక్స్‌టెండెడ్ వారంటీ వంటి వాటికి అంగీకరిస్తారో.. వారికే డీలర్లు ప్రాధాన్యతనిస్తారు. "సార్.. మీరు ఇవన్నీ తీసుకుంటే వచ్చే నెలలోనే కారు ఇప్పించగలం" అని ఆశ చూపిస్తారు. ఏమీ వద్దు అనుకునే సామాన్య కస్టమర్‌ను కావాలనే వెయిటింగ్ లిస్ట్‌లో చివరన ఉంచుతారు. దీనివల్ల డీలర్‌కు అదనపు ఆదాయం లభిస్తుంది.

ధరల పెంపుకు సులువైన మార్గం: ఒక కారు కోసం ఆరు నెలలు లేదా ఏడు నెలల పాటు వేచి చూస్తున్న కస్టమర్, మధ్యలో కంపెనీ ధరలు పెంచినా సరే బుకింగ్ క్యాన్సిల్ చేసుకోడు. ఇంతకాలం ఆగింది ఇందుకేనా? అని సరిపెట్టుకుని అదనపు ధర చెల్లించి కారు తీసుకుంటాడు. ఇది కంపెనీలకు సేఫ్ గేమ్. ఉదాహరణకు, మహీంద్రా థార్ రాక్స్ లాంచ్ అయినప్పుడు దాని కొన్ని వేరియంట్లకు ఏకంగా 18 నెలల వెయిటింగ్ పీరియడ్ ఉండేది. ముఖ్యంగా తక్కువ ధర ఉన్న MX1 వేరియంట్ కోసమే జనం ఎక్కువగా వేచి చూడాల్సి వస్తోంది.

కస్టమర్లకు తమ బుకింగ్ ఏ స్టేజీలో ఉందో డిజిటల్‌గా ట్రాక్ చేసే సదుపాయం లేకపోవడం డీలర్లకు వరంగా మారింది. ఒకరు క్యాన్సిల్ చేసిన కారును ఇతరులకు ఇవ్వకుండా, ఎవరి దగ్గర ఎక్కువ డబ్బులు గుంజవచ్చో చూసి వారికి కేటాయిస్తున్నారు. అందుకే కారు కొనేటప్పుడు కేవలం వెయిటింగ్ పీరియడ్ చూసి మురిసిపోకుండా, డీలర్లతో గట్టిగా బేరసారాలు ఆడటం చాలా ముఖ్యం.