అదేంటి పొలంలో వాడే యూరియాను డీజిల్ కార్లలో ఎందుకు పోస్తారు.. లేకపోతే కారు స్టార్ట్ అవ్వదా?

ఈ మధ్యకాలంలో కొత్త డీజిల్ కార్లలో యూరియా పోస్తున్నారని తరచుగా వింటూ ఉంటాం. చాలామందికి అది వ్యవసాయంలో వాడే యూరియానే అనుకుంటారు. కానీ, నిజానికి ఆటోమొబైల్స్‌లో వాడే యూరియా కాస్త వేరుగా ప్రత్యేకంగా ఉంటుంది. అసలు డీజిల్ కార్లలో యూరియా ఎందుకు పోస్తారు, దాని పని ఏంటి అనేది ఈ వార్తలో తెలుసుకుందాం.

డీజిల్ ఇంజిన్ల నుండి వచ్చే పొగలో చాలా హానికరమైన వాయువులు ఉంటాయి. వాటిలో అత్యంత ప్రమాదకరమైనది నైట్రోజన్ ఆక్సైడ్. ఈ వాయువు వాతావరణాన్ని కలుషితం చేస్తుంది. మనుషుల ఆరోగ్యానికి కూడా చాలా ప్రమాదకరం. దీన్ని నియంత్రించడానికి, కార్లలో సెలెక్టివ్ క్యాటలిటిక్ రిడక్షన్ అనే టెక్నిక్‌ను వాడతారు. ఈ SCR సిస్టమ్‌లో యూరియా ఒక ముఖ్యమైన పాత్ర పోషిస్తుంది.

SCR సిస్టమ్ అనేది ఒక ఎగ్జాస్ట్ ట్రీట్‌మెంట్ సిస్టమ్. ఇది డీజిల్ ఇంజిన్ నుండి బయటకు వచ్చే నైట్రోజన్ ఆక్సైడ్ వాయువును తగ్గిస్తుంది. ఇందులో ప్రత్యేకంగా ఆడ్‌బ్లూ లేదా డీజిల్ ఎగ్జాస్ట్ ఫ్లూయిడ్ అనే ద్రవాన్ని పోస్తారు. ఇది 32.5% యూరియా, 67.5% డిస్టిల్డ్ వాటర్‌తో తయారవుతుంది.

కారు నడుస్తున్నప్పుడు, ఎగ్జాస్ట్ నుండి వాయువులు బయటకు వస్తాయి కదా, అప్పుడు ఈ యూరియా ఆ వాయువులతో కలిసి నైట్రోజన్ ఆక్సైడ్‌ను హానికరమైనవి కాని వాయువులుగా మారుస్తుంది. అంటే, నైట్రోజన్, నీటి ఆవిరిగా మారుస్తుంది.

మీ డీజిల్ కారులో SCR టెక్నిక్ ఉంటే, దానికి ఎప్పటికప్పుడు యూరియా నింపడం చాలా అవసరం. ఒకవేళ యూరియా అయిపోతే, మీ కారు స్టార్ట్ అవ్వదు లేదా కారు పనితీరుపై ప్రభావం పడుతుంది. ఇంజిన్ వార్నింగ్ లైట్ కూడా వెలుగుతుంది. అందుకే సరైన సమయంలో యూరియా నింపడం ముఖ్యం. చాలా కార్లలో దీని కోసం ప్రత్యేకంగా ఒక ట్యాంక్, ఇండికేటర్ ఉంటాయి. అవి యూరియా లెవెల్‌ను చూపిస్తాయి.

ఒక లీటరు యూరియా (AdBlue) ధర సుమారు రూ.50-రూ.70 ఉంటుంది. ఇది ప్రతి 7,000 నుండి 10,000 కిలోమీటర్లకు ఒకసారి నింపాల్సి రావచ్చు. సాధారణంగా ఒక ట్యాంకులో 10 నుండి 20 లీటర్ల వరకు యూరియా పడుతుంది. కాబట్టి, తర్వాతిసారి మీ డీజిల్ కారులో యూరియా నింపాల్సిన అవసరం వస్తే, అది కేవలం ఒక ద్రవం మాత్రమే కాదు, పర్యావరణ పరిరక్షణలో మీరు కూడా ఒక భాగం అని గుర్తుంచుకోండి.

డ్రైవ్‌స్పార్క్ అభిప్రాయం: ఆటోమొబైల్ రంగంలో వస్తున్న ఈ సాంకేతిక మార్పులు పర్యావరణ పరిరక్షణకు చాలా సహాయపడుతున్నాయి. డీజిల్ కార్లలో యూరియా వాడకం వల్ల కాలుష్యం తగ్గుతుంది. దీని గురించి అందరికీ అవగాహన ఉండాలి, ఎందుకంటే ఇది మన ఆరోగ్యం, పర్యావరణం రెండింటికీ మంచిది.

డ్రైవ్‌స్పార్క్‌ తెలుగు వెబ్‌సైట్ ఆటోమొబైల్‌కి సంబంధించిన తాజా వార్తలను అందిస్తుంది. వివిధ సోషల్ మీడియాల ద్వారా సరికొత్త వార్తలను ఎప్పటికప్పుడు యూజర్లకు చేరవేస్తుంది. తాజా కార్ల వార్తలు, బైక్ వార్తలు, టెస్ట్ డ్రైవ్ రివ్యూల వీడియోల కోసం మా Facebook, Instagram, YouTube పేజీలతో కనెక్ట్ అవ్వండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు. ధన్యవాదాలు.