రూ.10లక్షల లోపు కీ-లెస్ ఎంట్రీ, పుష్-బటన్ స్టార్ట్ కార్లు... తక్కువ ధరలో బెస్ట్ కార్లు ఇవే

కొన్నేళ్లుగా ఆధునిక కార్లలో తప్పనిసరిగా ఉన్న అనేక అంశాలు కనుమరుగై, వాటి స్థానంలో కొత్త ఫీచర్లు వచ్చాయి. గత కొన్నేళ్లుగా కార్లలో అందుబాటులో ఉన్న ఫీచర్లలో కీ-లెస్ ఎంట్రీ, పుష్-బటన్ స్టార్ట్ ముఖ్యమైనవి. కీ-లెస్ ఎంట్రీ వల్ల తాళం చెవితో డోర్ తెరవడానికి బదులుగా డిజిటల్ కీతో సులభంగా కారులోకి ఎంటర్ అవ్వొచ్చు. అదే సమయంలో పుష్-బటన్ స్టార్ట్ ఫీచర్ వల్ల ఇంజిన్‌ను ఒక బటన్ నొక్కడం ద్వారా స్టార్ట్ చేయవచ్చు. రూ. 10 లక్షల లోపు ధరలో ఈ రెండు ఫీచర్లను అందించే కార్లు ఏవో చూద్దాం.

టాటా పంచ్
ఇది భారతదేశంలో అత్యధికంగా అమ్ముడవుతున్న కార్లలో ఒకటి. 2024లో భారతదేశంలో అత్యధికంగా అమ్ముడైన కారు పంచ్. ఇది ఒక మైక్రో ఎస్‌యూవీ. టాటా మోటార్స్ చిన్న ఎస్‌యూవీ అయిన పంచ్ టాప్-ఎండ్ వేరియంట్లలో కీ-లెస్ ఎంట్రీ, పుష్-బటన్ స్టార్ట్ ఉన్నాయి. వీటి ధర ఎక్కువగా ఉన్నప్పటికీ వాటి ఎక్స్-షోరూమ్ ధర రూ. 10 లక్షల లోపు ఉంటుంది.

హ్యుందాయ్ ఎక్స్‌టర్
రూ. 10 లక్షల లోపు ధరలో హైటెక్ ఫీచర్లతో కూడిన కార్ల జాబితాలో చేరిన మరో మైక్రో ఎస్‌యూవీ ఎక్స్‌టర్. హ్యుందాయ్ ఎంట్రీ లెవల్ ఎస్‌యూవీ టాప్ వేరియంట్లలో కీ-లెస్ ఎంట్రీ, పుష్-బటన్ స్టార్ట్ వంటి ఫీచర్లను అందిస్తుంది. ప్రస్తుతం హ్యుందాయ్ ఎక్స్‌టర్ ఎక్స్-షోరూమ్ ధర రూ. 6.21 లక్షల నుండి రూ. 10.51 లక్షల వరకు ఉంది.

రెనాల్ట్ కైగర్
ఫ్రెంచ్ బ్రాండ్ అయిన రెనాల్ట్ భారత మార్కెట్లో అమ్ముతున్న మూడు కార్లలో కైగర్ ఒకటి. ఈ మధ్యనే కంపెనీ కైగర్ సబ్ 4 మీటర్ ఎస్‌యూవీ ఫేస్‌లిఫ్ట్ వెర్షన్‌ను విడుదల చేసింది. రూ. 10 లక్షల లోపు ధరలో కీ-లెస్ ఎంట్రీ, పుష్-బటన్ స్టార్ట్ ఆఫర్ చేసే కార్లలో ఇది ఒకటి. 2025 కైగర్ ధర రూ. 6.29 లక్షల(ఎక్స్-షోరూమ్) నుండి ప్రారంభమవుతుంది.

మారుతి సుజుకి స్విఫ్ట్
భారతదేశంలో నంబర్ 1 కార్ల తయారీదారు అయిన మారుతి అత్యధికంగా అమ్ముడవుతున్న కార్లలో స్విఫ్ట్ ఒకటి. గత సంవత్సరం ఇండో-జపనీస్ కార్ల తయారీదారు స్విఫ్ట్ నాలుగో తరం వెర్షన్‌ను విడుదల చేసింది. మారుతి సుజుకి ఈ అడ్వాన్సుడ్ ఫీచర్లను పాపులర్ హ్యాచ్‌బ్యాక్ ZXI, ZXI ప్లస్ వేరియంట్లలో అందిస్తుంది. ఈ రెండు వేరియంట్‌ల ఎక్స్-షోరూమ్ ధర కూడా రూ. 10 లక్షల లోపే ఉంది.

మారుతి సుజుకి బాలెనో
మారుతి సుజుకి విడుదల చేసిన ప్రీమియం హ్యాచ్‌బ్యాక్ బాలెనో. స్విఫ్ట్ నుండి అప్‌గ్రేడ్ అయ్యి ఒక ప్రీమియం హ్యాచ్‌బ్యాక్ సొంతం చేసుకోవాలనుకునేవారికి బాలెనో ఒక మంచి ఆప్షన్. ఇందులో కూడా కీ-లెస్ ఎంట్రీ, పుష్-బటన్ స్టార్ట్ ఫీచర్లు ఉన్నాయి. ప్రస్తుతం బాలెనో ఎక్స్-షోరూమ్ ధర రూ. 6.74 లక్షల నుండి ప్రారంభమవుతుంది. రూ. 10 లక్షల లోపు ధర ఉన్న టాప్ వేరియంట్లలో ఈ ఫీచర్లు అందుబాటులో ఉన్నాయి.

టయోటా గ్లాంజా
మారుతి సుజుకి బాలెనో టయోటా రీబ్రాండెడ్ మోడల్ టయోటా గ్లాంజా. ఈ రెండు ప్రీమియం హ్యాచ్‌బ్యాక్‌ల డిజైనింగ్‌లో స్వల్ప మార్పులు ఉన్నప్పటికీ, ఫీచర్ల జాబితాలో తేడాలు లేవు. బాలెనో ప్లాట్‌ఫారమ్‌పై ఆధారపడిన గ్లాంజా టాప్ వేరియంట్లలో కూడా పుష్-బటన్ స్టార్ట్ సిస్టమ్ అందుబాటులో ఉంది. వీటి ధర కూడా రూ. 10 లక్షల లోపే ఉంది.

వీటితో పాటు, టాటా నెక్సాన్‌లో కూడా కీ-లెస్ ఎంట్రీ, పుష్-బటన్ స్టార్ట్ ఫీచర్లు ఉన్నాయి.. కానీ వాటి ఎక్స్-షోరూమ్ ధర రూ. 10 లక్షలకు పైగా ఉంటుంది. కాబట్టి, రూ. 10 లక్షల లోపు ధరలో ఈ అడ్వాన్సుడ్ ఫీచర్లతో ఒక కారు కొనాలనుకునేవారు పైన పేర్కొన్న కార్లలో ఒకదాన్ని ఎంచుకోవచ్చు.