ఇండియాలో అత్యంత సురక్షితమైన కార్లు.. యాక్సిడెంట్ అవుతుందన్న భయం అవసరం లేదు!

ఇప్పటి కాలంలో కారు కొనడం అంటే కేవలం మైలేజ్, డిజైన్ లేదా టెక్నాలజీ మాత్రమే కాదు, భద్రత (Safety) కూడా అత్యంత కీలక అంశంగా మారిపోయింది. పాత కాలంలో కారు అంటే ఎంత తక్కువ పెట్రోల్ తాగుతుందో అనే ప్రశ్న మాత్రమే ఉండేది. కానీ ఇప్పుడు పరిస్థితి పూర్తిగా మారింది. కుటుంబం కోసం కారు కొనుగోలు చేసే వారు, యువత, లేదా ఆఫీస్ కమ్యూటింగ్ కోసం వాహనం తీసుకునే వారు, అందరూ ముందుగా క్రాష్ టెస్ట్ రేటింగ్ చూస్తున్నారు. ఒక కారు ఎంత ఆకర్షణీయంగా ఉన్నా, దానిలో కూర్చున్నవారి ప్రాణాలు సురక్షితంగా ఉండాలంటే దానికి బలమైన నిర్మాణం, సరైన ఎయిర్‌బ్యాగ్ సిస్టమ్, అంతర్జాతీయ ప్రమాణాలకు సరిపడే సేఫ్టీ ఫీచర్లు ఉండాలి.

అందుకే ఇప్పుడు భారతీయ వినియోగదారులు ఎన్ని స్టార్‌లు సాధించింది? అనే ప్రశ్న అడగడం అలవాటుగా చేసుకున్నారు. ఇది కేవలం ఇంధన కార్లకే పరిమితం కాదు, ఎలక్ట్రిక్ వాహనాలు(EVs) అదే ప్రమాణాల ఆధారంగా అంచనా వేయబడుతున్నాయి. ఎలక్ట్రిక్ కార్లు భవిష్యత్తు అయినా, వాటి సేఫ్టీ విషయంలో ప్రజలు అవగాహనతో వ్యవహరిస్తున్నారు. కొత్తగా ఈవీ కారు కొనాలనుకునే వారికోసం భారత్ NCAP క్రాష్ టెస్ట్‌లో సేఫ్టీ రేటింగ్ సాధించిన కార్లను కథణంలో చూద్దాం.

టాటా మోటార్స్‌ ఎలక్ట్రిక్ వాహన విభాగంలో టాటా పంచ్ EV, కంపెనీ ఎంట్రీ-లెవల్ ఎలక్ట్రిక్ SUV, భద్రతా పరంగా కూడా కొత్త ప్రమాణాలు సృష్టించింది. చిన్న సైజులో ఉన్నప్పటికీ, ఇది తన శక్తివంతమైన నిర్మాణ నాణ్యత, అద్భుతమైన ఫీచర్లు, అత్యుత్తమ సేఫ్టీ స్కోర్‌తో అందరినీ ఆకట్టుకుంటోంది. భారత్ NCAP క్రాష్ టెస్టుల్లో పంచ్ EV అద్భుత ఫలితాలను సాధించింది. ప్రయాణీకుల రక్షణలో 32 పాయింట్లలో 31.46 పాయింట్లు సాధించింది.

అలాగే పిల్లల రక్షణలో 49 పాయింట్లలో 45 పాయింట్లు సాధించింది. ఇది స్పష్టంగా ఈ కారు నిర్మాణ నాణ్యత ఎంత బలంగా ఉందో, టాటా మోటార్స్ సేఫ్టీ విషయంలో ఎటువంటి రాజీ పడదో చూపిస్తోంది. భద్రత పరంగా చూసుకుంటే, పంచ్ EVలో ప్రతి వేరియంట్‌లోనూ ఆరు ఎయిర్‌బ్యాగులు, యాంటీలాక్ బ్రేకింగ్ సిస్టమ్ (ABS), ఎలక్ట్రానిక్ స్టెబిలిటీ కంట్రోల్ (ESC) వంటి కీలక సేఫ్టీ ఫీచర్లు అందుబాటులో ఉన్నాయి.

టాటా హారియర్ EV భారత్ NCAP క్రాష్ టెస్టుల్లో అద్భుతమైన ఫలితాలను నమోదు చేసింది. పెద్దల భద్రత విభాగంలో 32లో 32 పాయింట్లు, పిల్లల భద్రతలో కూడా 49లో 45 పాయింట్లు సాధించి, ఐదు నక్షత్రాల రేటింగ్‌ను అందుకుంది. హారియర్ EV ఫ్రంటల్ ఆఫ్‌సెట్ డిఫార్మబుల్ బారియర్ టెస్ట్, సైడ్ మూవబుల్ డిఫార్మబుల్ బారియర్ టెస్ట్‌లలో కూడా 16లో 16 పాయింట్లు సాధించింది.

పర్ఫార్మెన్స్ పరంగా కూడా హారియర్ EV విశేషంగా ఉంది. టాటా మోటార్స్ ఈ SUVని రెండు బ్యాటరీ ప్యాక్‌లలో అందిస్తోంది, ఇది 65 kWh బ్యాటరీ ప్యాక్, దిగువ వేరియంట్లలో లభిస్తుంది. 75 kWh బ్యాటరీ ప్యాక్, ఇది టాప్-ఎండ్ వేరియంట్లలో ఉంటుంది, దీని ద్వారా మరింత ఎక్కువ రేంజ్ అందుతుంది. ఈ రెండు బ్యాటరీ ప్యాక్ ఎంపికలతో పాటు రెండు మోటార్ కాన్ఫిగరేషన్లు కూడా అందుబాటులో ఉన్నాయి.

మహీంద్రా BE 6 ఎలక్ట్రిక్ SUV అత్యాధునిక భద్రతా సాంకేతికతతో భారత్ NCAP క్రాష్ టెస్టుల్లో అగ్రస్థానంలో నిలిచింది. క్రాష్ టెస్ట్ ఫలితాలను పరిశీలిస్తే, మహీంద్రా BE 6 SUV వయోజన ప్రయాణీకుల రక్షణ పరీక్షలో 32 పాయింట్లలో 31.97 పాయింట్లు సాధించింది. ఈ ఫలితంతో BE 6 SUV A+ రేటింగ్ పొందింది, అంటే ఇది అత్యంత సురక్షితమైన ఎలక్ట్రిక్ కార్లలో ఒకటి అని అధికారికంగా నిర్ధారితమైంది.