ఈ కంపెనీ పేరు ఒక్కటే చాలు, జనం షోరూమ్‌కి రావడానికి! దేశీయంగానే కాదు.. గ్లోబల్ గాను సింహం

టయోటా కిర్లోస్కర్ మోటార్ (TKM) క్రమంగా వినియోగదారుల నమ్మకాన్ని పెంచుకుంటూ, భారతీయ ఆటోమొబైల్ రంగంలో తన స్థానాన్ని మరింత పటిష్టం చేసుకుంటోంది. మారుతున్న ప్రజల ఇష్టాలకు అనుగుణంగా తన మోడళ్లలో కొత్త ఫీచర్స్‌ను జోడిస్తూ, అదే సమయంలో కొత్త కార్లను విడుదల చేస్తుంది. అమ్మకాల పరంగా క్రమంగా పుంజుకుంటుంది. తాజాగా జూన్ 2025 నెలకు సంబంధించిన సేల్స్ వివరాలను కంపెనీ వెల్లడించింది. దీని ప్రకారం, టయోటా గత నెలలో మొత్తం 28,869 యూనిట్ల అమ్మకాలను ను నమోదు చేసింది. ఇది 2024 జూన్‌లో నమోదైన 27,474 యూనిట్ల అమ్మకాలతో పోలిస్తే సుమారుగా 5 శాతం వృద్ధిని సూచిస్తోంది. ఈ వృద్ధి కంపెనీ ఉత్పత్తులపై కొనసాగుతున్న డిమాండ్‌కు, స్థిరమైన బ్రాండ్ ఇమేజ్‌కి నిదర్శనం.

దేశీయంగా వినియోగదారుల నుంచి టయోటాకు మంచి ఆదరణ లభిస్తుంది. దీనికి నిదర్శనంగా జూన్‌లో ఈ మొత్తం అమ్మకాల్లో 26,453 యూనిట్లు దేశీయ మార్కెట్లోనే అమ్ముడుపోయాయి. అంటే, భారత వినియోగదారులు టయోటా కార్లను విశేషంగా ఆహ్వానిస్తున్నారని చెప్పాలి. టయోటా ఇన్నోవా, ఫార్చ్యూనర్ వంటి మోడళ్లకు ఉండే అపారమైన ఆదరణ ఈ విజయానికి ముఖ్య కారణం. ఇదే సమయంలో 2,416 యూనిట్లు విదేశీ మార్కెట్లకు ఎగుమతి అయ్యాయి.

ఈ గణంకాలను చూసినట్లయితే గ్లోబల్ మార్కెట్లోనూ టయోటా భారత్ నుంచి వాహనాలను ఉత్సాహంగా సరఫరా చేస్తూ అంతర్జాతీయ వ్యాపారానికి విశేష మద్దతు ఇస్తోంది. ఇక క్యాలెండర్ సంవత్సరంలోని తొలి ఆరు నెలల్లో టయోటా సేల్స్ మరింతగా బలపడిపోయాయి. 2025 జనవరి నుంచి జూన్‌కి (అర్ధసంవత్సరానికి) మొత్తం 1,74,885 యూనిట్ల అమ్మకాలు నమోదవడం, ఈ బ్రాండ్‌కు వినియోగదారుల మీద ఉన్న విశ్వాసం ఎంత గొప్పది అనేది రుజువుచేస్తోంది.

ఇది గత సంవత్సరం ఇదే కాలంలో (జనవరి-జూన్ 2024) నమోదైన 1,50,250 యూనిట్లతో పోలిస్తే దాదాపు 16 శాతం వృద్ధిని సూచిస్తోంది. వినియోగదారుల నమ్మకాన్ని మరింత పెంచుతూ, పలు కొత్త మోడళ్లను పరిచయం చేస్తూ కంపెనీ ఈ విజయం సాధించింది. ప్రధానంగా జూన్ నెలలో ఒక కీలక అడుగు వేశారు. ప్రఖ్యాత ఫార్చ్యూనర్ SUV, లెజెండర్ మోడళ్లను 48-వోల్ట్ మైల్డ్-హైబ్రిడ్ కాన్ఫిగరేషన్లతో ప్రారంభించడం టయోటాకు పెద్ద అప్‌డేట్ అయింది.

టయోటా ప్రకారం, ఈ అప్‌డేట్ అయిన ఫార్చ్యూనర్ వినియోగదారుల నుంచి ప్రారంభదశలోనే మంచి ఆదరణ సంపాదించింది.పెరుగుతున్న ఫ్యూయల్ ఖర్చులు, పర్యావరణంపై ఆందోళనలు ఈ హైబ్రిడ్ కార్లకు మరింత ఆదరణను అందిస్తున్నాయి. ఇప్పుడు భారత మార్కెట్లో అర్బన్ క్రూయిజర్ హైరైడర్ ఈ బ్రాండ్‌కు అత్యధికంగా అమ్ముడయ్యే మోడళ్లలో ఒకటిగా నిలిచింది. ఇది మారుతీ సుజుకీ గ్రాండ్ విటారా వలే అదే ప్లాట్‌ఫామ్‌పై నిర్మించబడింది.

రెండు వాహనాలు తేలికపాటి హైబ్రిడ్, సీఎన్‌జీ, బలమైన హైబ్రిడ్ వేరియంట్లలో లభ్యమవుతూ, విభిన్న సెగ్మెంట్లను ఆకర్షిస్తున్నాయి. టయోటా దృష్టి ఇప్పుడు భారత్‌లో ఎలక్ట్రిక్ విభాగం పట్ల పడింది. కంపెనీ తన తొలి పూర్తి ఎలక్ట్రిక్ మోడల్ అర్బన్ క్రూయిజర్ BEVను మార్కెట్లోకి తీసుకురావడానికి ప్రణాళికలు సిద్ధం చేస్తోంది. ఈ కొత్త మిడ్‌సైజ్ ఈ-SUVకు వచ్చే సెప్టెంబర్‌లో అమ్మకానికి రావాల్సిన మారుతి సుజుకి e-Vitaraతో అనేక అంశాలతో సమానంగా ఉంటుందని అంచనా.

కావున, ఈ క్యాలెండర్ సంవత్సరం ముగిసేలోపు టయోటా భారత వినియోగదారులకు సరికొత్త ఎలక్ట్రిక్ కారును అందించబోతోందని విశ్లేషకులు నమ్ముతున్నారు. అర్బన్ క్రూయిజర్ BEV రెండు ప్రత్యేక బ్యాటరీ ప్యాక్‌లలో అందుబాటులో ఉండనుంది. ఇది పూర్తి ఛార్జ్‌తో దాదాపు 500 కిలోమీటర్ల కంటే ఎక్కువ దూరం ప్రయాణం చేయవచ్చని అంచనా. ఈ విధంగా, టయోటా భారత ఆటోమొబైల్ పరిశ్రమలో తన బలాన్ని మరింత పెంచుకునే దిశలో అడుగులు వేస్తోంది.