బైక్ కొనే బదులు ఈ కారు కొనచ్చు.. 31 కి.మీ మైలేజ్.. భారీగా పెరిగిన అమ్మకాలు

భారత మార్కెట్లో ప్రీమియం హ్యాచ్‌బ్యాక్‌లలో ఎప్పటికప్పుడు మంచి పోటీ నెలకొంటుంది. ఈ విభాగంలో మారుతి సుజుకి బాలెనో, టయోటా గ్లాంజా మోడళ్లకు ప్రత్యేకమైన డిమాండ్ ఉంది. బాలెనో ఇప్పటికే తనకంటూ ఓ ప్రత్యేక గుర్తింపును తెచ్చుకున్నప్పటికీ, అదే మోడల్‌ను రీబ్యాడ్జ్ చేసి టయోటా గ్లాంజా (Toyota Glanza) పేరుతో కూడా అమ్మకం చేయడం రెండు కంపెనీలకూ లాభదాయకంగా మారింది. గ్లాంజా గురించి చెప్పుకుంటే, ఇది డిజైన్, ఫీచర్లు, పనితీరు పరంగా బాలెనోతో సమానమైనదే అయినా, టయోటా బ్రాండ్ నమ్మకం దానిని మరింత ప్రత్యేకంగా నిలబెడుతుంది. అందుకే ప్రీమియం హ్యాచ్‌బ్యాక్ కొనుగోలు చేయాలనుకునే కస్టమర్లు టయోటా గ్లాంజాను కూడా ప్రధానంగా పరిగణిస్తున్నారు.

ఇటీవల విడుదలైన అమ్మకాల గణాంకాలు కూడా ఈ విషయాన్నే నిరూపిస్తున్నాయి. ఆగస్టు 2025లో టయోటా 5,102 గ్లాంజా కార్లను విక్రయించింది. ఇదే సమయంలో గత సంవత్సరం, అంటే ఆగస్టు 2024లో అమ్ముడైన గ్లాంజా సంఖ్య 4,624 మాత్రమే. అంటే, కేవలం ఒక్క ఏడాదిలోనే గ్లాంజా అమ్మకాలు గణనీయంగా పెరిగాయి. మొత్తంగా 478 యూనిట్ల పెరుగుదలతో అమ్మకాలు దాదాపు 10 శాతం వృద్ధి సాధించాయి.

ఈ వృద్ధి సాధారణ సంఖ్య కాదని చెప్పొచ్చు. ఎందుకంటే, భారత మార్కెట్లో హ్యాచ్‌బ్యాక్ సెగ్మెంట్‌లో పోటీదారులు మరింతగా ఉన్నా, గ్లాంజా తన స్థిరమైన డిమాండ్‌ను కొనసాగిస్తూ ముందుకు సాగుతోంది. ఒకవైపు టయోటా బ్రాండ్ విలువ, మరోవైపు మారుతి సుజుకి టెక్నాలజీ కలయిక.. ఈ రెండు అంశాలే గ్లాంజా విజయానికి ప్రధాన కారణాలు. పండుగ సీజన్ రాకతో గ్లాంజా అమ్మకాలు మరింతగా పెరగే అవకాశముంది.

ఆగస్టు 2025 అమ్మకాల నివేదికలో టయోటా గ్లాంజా తన స్థానాన్ని మరింత బలపరుచుకుంది. ఈ నెల టాప్ 10 హ్యాచ్‌బ్యాక్‌ల జాబితాలో గ్లాంజా 6వ స్థానంలో నిలిచింది. పోటీ గట్టిగా ఉన్న ఈ విభాగంలో టాప్ 5 స్థానాలను వరుసగా మారుతి సుజుకి వ్యాగన్ ఆర్, బాలెనో, స్విఫ్ట్, ఆల్టో, టాటా టియాగో ఆక్రమించాయి. ఈ జాబితాలో గ్లాంజా 6వ స్థానాన్ని దక్కించుకోవడం, మార్కెట్లో దీని స్థిరమైన డిమాండ్‌కు నిదర్శనం.

ధరల విషయానికి వస్తే, టయోటా గ్లాంజా ప్రస్తుతం రూ. 6.39 లక్షల ఎక్స్-షోరూమ్ ధరతో బేస్ వేరియంట్‌ను అందిస్తుంది. అదే సమయంలో టాప్ వేరియంట్ ధర రూ. 9.15 లక్షలుగా ఉంది. ఈ ధరలు టయోటా ఇండియా అధికారిక వెబ్‌సైట్‌లో జాబితా చేయబడ్డాయి. అంటే, కస్టమర్లకు సౌకర్యవంతమైన ప్రైస్ రేంజ్‌లో ప్రీమియం ఫీచర్లను అందిస్తోందని చెప్పొచ్చు. మైలేజీ విషయంలో కూడా గ్లాంజా తన క్లాస్‌లో అత్యుత్తమంగా నిలుస్తోంది.

పెట్రోల్-మాన్యువల్ వేరియంట్లు లీటరుకు 22.35 కి.మీ, పెట్రోల్-AMT వేరియంట్లు లీటరుకు 22.94 కి.మీ మైలేజీని అందిస్తాయి. అంటే, సిటీ డ్రైవింగ్, హైవే డ్రైవింగ్ రెండింటికీ ఈ కారు మంచి ఆప్షన్‌గా మారుతోంది. మరింత మైలేజీ కోరుకునే వినియోగదారుల కోసం టయోటా CNG వేరియంట్‌ను కూడా అందిస్తోంది. సిఎన్‌జి (CNG) ఆప్షన్‌‌లో 1.2 లీటర్ ఇంజిన్ను ఉపయోగించారు. అయితే, సిఎన్‌జి మోడ్‌లో పనిచేసేటప్పుడు దీని పనితీరు కొంత భిన్నంగా ఉంటుంది.

ఇంజిన్ గరిష్టంగా 6,000 ఆర్‌పిఎమ్ వద్ద 57 kW పవర్ను ఉత్పత్తి చేస్తుంది. అలాగే, 4,300 ఆర్‌పిఎమ్ వద్ద 98.5 Nm టార్క్ను అందిస్తుంది. మైలేజీ విషయానికి వస్తే, గ్లాంజా సిఎన్‌జి వేరియంట్ మరింత ఆకర్షణీయంగా నిలుస్తోంది. టయోటా అధికారికంగా పేర్కొన్న ప్రకారం, ఈ వెర్షన్ కిలో సిఎన్‌జికి 30.61 కిలోమీటర్ల మైలేజీని అందిస్తుంది. అంటే, ఆర్థికంగా ప్రయాణించాలనుకునే కస్టమర్లకు ఇది ఒక అద్భుతమైన ఎంపిక అవుతుంది.