రోడ్డుపై ఇంధ్రభవనం లాంటి కారు.. ఎలాంటి రోడ్డు అయినా దూసుకుపోతుంది.. సేల్స్‌లో 174% గ్రోత్

టయోటా (Toyota) భారతీయ ఆటోమొబైల్ మార్కెట్లో తనదైన దూకుడు కొనసాగిస్తోంది. నమ్మకమైన క్వాలిటీ, దీర్ఘకాలిక పనితీరు, మంచి రీసేల్ విలువ వంటి కారణాలతో టయోటా కార్లకు ఎప్పటికప్పుడు ఒక ప్రత్యేక స్థానం ఉంటుంది. ఈ నేపథ్యంలో, అక్టోబర్ నెలలో టయోటా కార్ల మొత్తం అమ్మకాలు మరింత వేగం పుంజుకోవడం బ్రాండ్‌కు పెద్ద బూస్ట్‌గా నిలిచింది. పండుగల సీజన్‌ ఎప్పుడూ భారతీయ కార్ల మార్కెట్‌కు కీలకమైన సమయం. ఈసారి కూడా దసరా, దీపావళి కొనుగోలు ఉత్సాహం టయోటా అమ్మకాలపై స్పష్టంగా ప్రతిఫలించింది. హ్యాచ్‌బ్యాక్ గ్లాంజా వంటి బడ్జెట్ ఫ్రెండ్లీ కార్ల నుండి, ప్రీమియం సెగ్మెంట్‌లోకి వచ్చే హైలాండర్, ఫార్చ్యూనర్, ల్యాండ్ క్రూయిజర్ వంటి భారీ మోడళ్ల వరకు అన్నింటికీ డిమాండ్ పెరిగింది.

ప్రత్యేకంగా టయోటా ల్యాండ్ క్రూయిజర్(Toyota Land Cruiser) పనితీరు గమనిస్తే, సెప్టెంబర్ నెలలో కేవలం 27 యూనిట్లు మాత్రమే అమ్ముడైన ఈ SUV, అక్టోబర్‌లో పండుగ వేళ 74 యూనిట్ల సేల్స్‌ను నమోదు చేయడం గమనార్హం. ఇది కేవలం వృద్ధి కాదు, ఏకంగా 174 శాతం గ్రోత్‌ను సాధించిన అద్భుతమైన పెరుగుదల. ఇంత భారీ సెగ్మెంట్‌లో ఇలాంటి స్పైక్ రావడం మార్కెట్లో ల్యాండ్ క్రూయిజర్‌కు ఉన్న డిమాండ్‌ను స్పష్టంగా తెలియజేస్తుంది.

సారాంశంగా చెప్పాలంటే, పండుగల సీజన్ టయోటాకు సేల్స్ పరంగా పెద్ద ఊపునిచ్చింది. బడ్జెట్ కార్ల నుండి లగ్జరీ SUVs వరకు విస్తరించిన లైనప్ మొత్తం డిమాండ్ సమానంగా పెరగడం, బ్రాండ్ భారతీయ కస్టమర్లలో ఎంతగానో నమ్మకాన్ని సంపాదించుకుందని మరోసారి రుజువు చేస్తోంది. ముందున్న నెలల్లో కూడా ఈ ఊపు కొనసాగుతుందేమో అనే ఆసక్తి ఇప్పుడు అందరిలోనూ ఉంది. పాత మోడల్‌తో పోలిప్తే 2025 మోడల్ కొత్తగా రావడం బాగా కలిసివచ్చింది.

టయోటా ల్యాండ్ క్రూయిజర్ 2025 మోడల్ భారత మార్కెట్లోకి వచ్చిన తర్వాత, ఇది లగ్జరీ, హార్డ్‌కోర్ ఆఫ్-రోడ్ సామర్థ్యాలను ఒకేసారి అందించే ప్రీమియం SUVగా మరింత గుర్తింపు తెచ్చుకుంది. ఈ మోడల్‌లో టయోటా తన అత్యాధునిక ఇంజినీరింగ్‌ను ఉపయోగించడం వల్ల, పనితీరు నుండి రగ్గడ్ టెర్రైన్ హ్యాండ్లింగ్ వరకు అన్ని అంశాల్లో ఇది తన తరగతిలో ముందంజలో నిలుస్తుంది. ఇందులో 3.3-లీటర్ V6 డీజిల్ ఇంజిన్ అమర్చబడింది.

ఈ ఇంజిన్ 309hp పవర్‌ను ఉత్పత్తి చేస్తుంది. భారీ పరిమాణం కలిగిన ఈ SUVకి తగిన శక్తిని సరఫరా చేసే ఈ ఇంజిన్, 10-స్పీడ్ ఆటోమేటిక్ గేర్‌బాక్స్‌తో కలిసి పనిచేస్తుంది. ఈ కాంబినేషన్ హైవే పై వేగవంతమైన రేస్పాన్స్‌ను మాత్రమే కాదు, కఠినమైన ఆఫ్-రోడ్ ట్రైల్‌లలో కూడా అద్భుతమైన టార్క్ డెలివరీని అందిస్తుంది. టయోటా ప్రసిద్ధ 4x4 సిస్టమ్ ఈ వాహనాన్ని అన్ని రకాల భూభాగాల్లో నమ్మకంగా నడిపేలా చేస్తుంది.

ఇసుక, రాళ్లు, మంచు, మట్టి... ఏదైనా సరే, ల్యాండ్ క్రూయిజర్ అదుపులోకి తెచ్చే సామర్థ్యాన్ని కలిగి ఉంటుంది. 2025 మోడల్ ZX వేరియంట్‌తో పాటు మరింత కఠినమైన పరిస్థితుల కోసం రూపొందించిన GR-S వేరియంట్‌లో కూడా అందుబాటులో ఉంది. GR-S వేరియంట్ ప్రత్యేకంగా ఆఫ్-రోడ్ ప్రేమికులను దృష్టిలో ఉంచుకుని రూపొందించబడింది. మెరుగైన సస్పెన్షన్, అధునాతన ట్రాక్షన్ మోడ్‌లు, ఆఫ్-రోడ్ డెడికేటెడ్ ట్యూనింగ్ దీనిలో ఉన్నాయి.

ఈ అన్ని ప్రీమియం ఫీచర్లు, ఆఫ్-రోడ్ ప్రతిభకు తగ్గట్లుగానే, ల్యాండ్ క్రూయిజర్ 2025 భారత మార్కెట్లో రూ. 2.41 కోట్లు (ఎక్స్-షోరూమ్) ధరతో లభిస్తుంది. ఇది ఓ హై-ఎండ్ లగ్జరీ SUV అయినప్పటికీ, దీని పనితీరు, విశ్వసనీయత, ఆఫ్-రోడ్ సామర్థ్యం ఇవన్నీ కలిపి ఈ కారును భారతీయ మార్కెట్లో ప్రత్యేక స్థాయిలో నిలబెడుతున్నాయి.