ఫ్యామిలీకి 360 డిగ్రీల నుంచి రక్షణ అందించే 7 సీటర్ కారు.. 6 ఎయిర్‌బ్యాగ్‌లతో ఫుల్ సేఫ్టీ

జపాన్‌కు చెందిన ప్రముఖ ఆటోమొబైల్ దిగ్గజం టయోటా (Toyota), భారత మార్కెట్లోకి అడుగుపెట్టిన నాటి నుంచి కొత్త కొత్త మార్గాల్లో వినియోగదారులకు దగ్గరవుతోంది. మారుతి సుజుకితో కుదుర్చుకున్న భాగస్వామ్యంతో రీబ్యాడ్జ్ మోడళ్లను పరిచయం చేస్తూ గ్లాంజా, రుమియన్, టైజర్ వంటి కార్లను అందించింది. ఈ మోడళ్లు తక్కువ సమయంలోనే దేశీయ వినియోగదారుల మనసులను గెలుచుకుని, టయోటాకు ఒక స్థిరమైన మార్కెట్‌ను తెచ్చిపెట్టాయి. అయితే, ప్రస్తుత కాలంలో కారు ఎంపికలో కేవలం లుక్స్, మైలేజ్, ధర మాత్రమే కాదు, భద్రత (సేఫ్టీ) కూడా అత్యంత ప్రాధాన్యతను సంతరించుకుంది. రోడ్డు ప్రమాదాల సంఖ్య పెరుగుతున్న నేపథ్యంలో ప్రతి వాహన తయారీదారు తమ కస్టమర్లకు మరింత సురక్షితమైన ప్రయాణ అనుభవాన్ని అందించేందుకు కొత్త సేఫ్టీ ఫీచర్లను పరిచయం చేస్తున్నారు.

ఈ జాబితాలో టయోటా కూడా వెనుకబడకుండా తన మోడళ్లలో భద్రతా ప్రమాణాలను పెంచుతూ ముందుకు సాగుతోంది. తాజాగా, టయోటా తన ప్రాచుర్యం పొందిన MPV రుమియన్‌(rumion)కు గాను ఒక కీలక నిర్ణయం తీసుకుంది. ఇప్పటి వరకు కొన్ని వేరియంట్లలో మాత్రమే లభ్యమైన 6 ఎయిర్‌బ్యాగ్ సౌకర్యాన్ని ఇకపై అన్ని వేరియంట్లలో స్టాండర్డ్‌గా అందించనున్నట్టు ప్రకటించింది. అంటే, రుమియన్ ఎలాంటి వేరియంట్ ఎంచుకున్నా, కస్టమర్‌కు పూర్తి స్థాయి సేఫ్టీ ఫీచర్లు లభ్యమవుతాయి.

ఇదే సమయంలో ఈ మార్పు రుమియన్‌ను తన సెగ్మెంట్‌లో మరింత ప్రత్యేకంగా నిలబెట్టనుంది. ఎందుకంటే, సాధారణంగా బడ్జెట్-ఫ్రెండ్లీ MPV కార్లలో ఇంత హై లెవెల్ సేఫ్టీ స్టాండర్డ్‌గా ఇవ్వడం అరుదు. ముందు, వెనుక, పక్కదారి నుండి వచ్చే ఢీకొనుళ్లలోనూ ఈ ఎయిర్‌బ్యాగ్స్ ప్రయాణికులను రక్షించే విధంగా పనిచేస్తాయి. ఫలితంగా, కుటుంబ ప్రయాణాలకు రుమియన్ మరింత నమ్మకమైన ఎంపికగా మారబోతోంది.

టయోటా రుమియన్‌కు తీసుకొచ్చిన ఈ తాజా అప్‌డేట్ భద్రతాపరంగా ఒక పెద్ద మైలురాయిగా చెప్పుకోవచ్చు. ఇప్పటి వరకు ఎంచుకున్న వేరియంట్‌పై ఆధారపడి ఎయిర్‌బ్యాగ్‌ల సంఖ్య మారుతూ ఉండేది. కానీ ఇప్పుడు మాత్రం, అన్ని వేరియంట్లలో డ్యూయల్ ఫ్రంట్, సైడ్, కర్టెన్ షీల్డ్ ఎయిర్‌బ్యాగ్‌లు స్టాండర్డ్‌గా లభిస్తున్నాయి. దీని వలన ప్రయాణీకులు అన్ని వైపుల నుండి రక్షణ పొందుతూ 360-డిగ్రీల భద్రతా వలయం లాంటి అనుభూతి పొందుతారు.

అంతేకాకుండా, టాప్-స్పెక్ V వేరియంట్‌లో ఇప్పుడు టైర్ ప్రెజర్ మానిటరింగ్ సిస్టమ్(TPMS) ఉంది. దీంతో టైర్‌లో గాలి తగ్గినా వెంటనే డ్రైవర్‌కు అలర్ట్ వస్తుంది. అయితే, ఈ రెండు ఫీచర్ల మినహా వాహనంలో ఇతర అప్‌గ్రేడ్‌లను ప్రవేశపెట్టలేదు. కొత్త 6 ఎయిర్‌బ్యాగ్‌లతో పాటు వెహికల్ స్టెబిలిటీ కంట్రోల్, హిల్ హోల్డ్ అసిస్ట్, EBDతో కూడిన ABS, బ్రేక్ అసిస్ట్, ఐసోఫిక్స్ చైల్డ్ సీట్ మౌంట్స్ వంటి ఫీచర్లు స్టాండర్డ్‌గా ఉంటాయి.

అంతే కాదు, టయోటా తన కస్టమర్లకు 3 సంవత్సరాలు లేదా 1,00,000 కి.మీ.ల ప్రామాణిక వారంటీను అందిస్తోంది. ఇంకా ఎక్కువకాలం నమ్మకంతో ఉపయోగించాలనుకుంటే, కేవలం కొంత అదనపు చార్జీతో 5 సంవత్సరాలు లేదా 2,20,000 కి.మీ.ల పొడిగించిన వారంటీ సదుపాయాన్ని కూడా కొనుగోలు చేయవచ్చు. పైగా 24x7 రోడ్‌సైడ్ అసిస్టెన్స్ను కూడా అందిస్తోంది. ఈ ఫీచర్ ద్వారా ఎప్పుడైనా అత్యవసర పరిస్థితుల్లో కస్టమర్లకు వెంటనే సహాయం లభిస్తుంది.

ఇది కుటుంబ ప్రయాణాలకు ప్రాధాన్యత ఇచ్చే కస్టమర్లను మరింత ఆకర్షించే అవకాశం ఉంది.టయోటా రూమియన్ ప్రస్తుతం ధర రూ. 10.44 లక్షల నుండి ప్రారంభమవుతుంది. మరిన్ని ఎయిర్‌బ్యాగ్‌లతో వచ్చే 7-సీటర్ MPVని కొనుగోలు చేయాలనుకునే వారి కోసం బుకింగ్‌లు, ఎంపికలు ఆన్‌లైన్‌లో, దేశవ్యాప్తంగా ఉన్న టయోటా డీలర్‌షిప్‌లలో అందుబాటులో ఉన్నాయి.