28 కిమీల మైలేజ్ ఇచ్చే డిమాండ్ ఉన్న కారు ధరను సైలెంట్‌గా పెంచిన టయోటా.. ఎంత పెరిగిందంటే?

టయోటా (Toyota), మారుతి సుజుకి (Maruti Suzuki) మధ్య ఉన్న వ్యూహాత్మక భాగస్వామ్య ఒప్పందం వల్ల, ఈ రెండు బ్రాండ్లు ఒకదానికొకటి కార్లను రీబ్రాండింగ్ చేసి విక్రయిస్తున్న విషయం తెలిసిందే. ఈ ఒప్పందం ప్రకారం, మారుతి విక్రయించే ఫ్రాంక్స్ SUV ఆధారంగా టయోటా అర్బన్ క్రూయిజర్ టైజర్ (Urban Cruiser Taisor) పేరుతో అదే వాహనాన్ని మార్కెట్లోకి తీసుకొచ్చింది. లేటెస్ట్ డిజైన్, ఫీచర్లు, మైలేజ్ పరంగా సగటు వినియోగదారులకు సరిపోయేలా ఈ కారు రూపొందించబడింది. అయితే తాజా సమాచారం ప్రకారం, టయోటా టైజర్ SUV ధరలను రూ.2,500 వరకు పెంచింది. ఇది అన్ని వేరియంట్లకు వర్తించనుంది. పెట్రోల్, CNG రెండు ఫ్యూయల్ ఆప్షన్లలో లభిస్తున్న టైజర్ SUV ఇప్పుడు రూ. 7.77 లక్షల నుండి రూ.12.91 లక్షల (ఎక్స్-షోరూమ్) వరకు విక్రయించబడుతోంది. ఈ ధరల పెరుగుదలతో వినియోగదారులపై స్వల్ప ప్రభావం ఉండొచ్చు.

ధరలు పెరగకముందు టైజర్ ధర గతంలో రూ.7.74 లక్షల నుండి రూ.12.88 లక్షలకు ఎక్స్-షోరూమ్ ఉండేది. ఇదే సమయంలో అదే కారును బేస్‌గా తీసుకుని మార్కెట్లో ఉన్న మారుతి సుజుకి ఫ్రాంక్స్ SUV ధరలు రూ. 7.55 లక్షల నుండి రూ. 14.81 లక్షల (ఎక్స్-షోరూమ్) వరకు ఉన్నాయి. మొదటి వేరియంట్లలో రెండు కార్ల మధ్య పెద్దగా ధర తేడా లేకపోయినా, టాప్ వేరియంట్లలో స్పష్టమైన తేడా కనిపిస్తోంది.

ఫ్రాంక్స్ టాప్ మోడల్, అనేక అదనపు ఫీచర్లతో, ఎక్కువ ధరకు విక్రయించబడుతోంది. ఈ రెండు కార్లూ ఆధారంగా ఒకటే ఫ్రేమ్‌ను పంచుకున్నా, బ్రాండ్ ఇమేజ్, ఫీచర్లలో కొన్ని చిన్న మార్పులు, ధరల్లో వ్యత్యాసం కారణంగా వినియోగదారులు ఎంపికలో తేడా చూపుతారు. ధరలు స్వల్పంగా పెరగడం వల్ల కొనుగోలుదారులకు తక్కువ-మధ్య రేంజ్‌లో ప్రభావం పెద్దగా ఉండకపోయినా, టాప్ వేరియంట్‌ను ఎంచుకునే వారు ఈ మార్పును స్పష్టంగా గమనించవచ్చు.

టైజర్ భారత మార్కెట్లో మంచి గుర్తింపు తెచ్చుకుంటోంది. స్టైల్, మైలేజ్, డ్రైవింగ్ అనుభూతి.. మూడు విభాగాల్లో మెరుగైన అనుభూతిని అందిస్తుంది. ఈ కారు రెండు ప్రధాన పెట్రోల్ ఇంజిన్ ఆప్షన్లలో లభిస్తుంది. మొదటిది, 1.2 లీటర్ నేచురల్లీ ఆస్పిరేటెడ్ (NA) పెట్రోల్ ఇంజన్, ఇది 89 bhp పవర్, 113 Nm టార్క్ ఉత్పత్తి చేస్తుంది. ఇది నాలుగు సిలిండర్ల ఇంజన్ కావడం వల్ల సాఫీగా నడిచే అనుభూతిని అందిస్తుంది.

దీనికి 5-స్పీడ్ మాన్యువల్, 5-స్పీడ్ AMT గేర్‌బాక్స్ ఎంపికలు ఉన్నాయి. ఈ వేరియంట్లు 21.7 నుండి 22.8 కిలోమీటర్ల వరకు మైలేజ్‌ను అందించగలవు. ఇంకొక వైపు, డ్రైవింగ్‌కి మరింత పవర్ అవసరమయ్యే వినియోగదారుల కోసం 1.0 లీటర్ టర్బోచార్జ్డ్ పెట్రోల్ ఇంజిన్ ఉంది. ఇది 99 bhp పవర్, 148 Nm టార్క్‌ను ఉత్పత్తి చేస్తుంది. ఈ మూడుసిలిండర్ల టర్బో ఇంజన్ మాన్యువల్ గేర్‌బాక్స్‌తో 21.5 కిలోమీటర్ల మైలేజ్ ఇస్తుంది.

అయితే, దీని ఆటోమేటిక్ వేరియంట్ 20 కిలోమీటర్ల మైలేజ్‌ను అందిస్తుంది. ఇది ప్రత్యేకించి సిటీ ట్రాఫిక్‌లో డ్రైవింగ్ స్మూత్‌గా ఉంటుంది. ఈ రెండు పెట్రోల్ ఆప్షన్లతో పాటు, టయోటా టేకాన్ CNG వేరియంట్‌ను కూడా అందిస్తోంది. ఇది 1.2 లీటర్ ఇంజిన్ ఆధారంగా ఉండి, 28.51 కిలోమీటర్ల మైలేజ్‌ను అందిస్తుంది. ఇది తక్కువ ఇంధన వ్యయంతో ఎక్కువ ప్రయాణాలు చేయాలనుకునే వినియోగదారుల కోసం మెరుగైన ఆప్షన్‌గా నిలుస్తుంది.

ఈ కారులో అడ్వాన్స్‌డ్ ఫీచర్స్ చాలా ఉన్నాయి. కనెక్ట్ చేయబడిన కార్ టెక్నాలజీ, వైర్‌లెస్ యాపిల్ కార్‌ప్లే, ఆండ్రాయిడ్ ఆటో, ఆటోమేటిక్ క్లైమేట్ కంట్రోల్ సిస్టమ్, DRLలతో కూడిన ఆటోమేటిక్ LED హెడ్‌ల్యాంప్‌లు, 6-స్పీకర్ సౌండ్ సిస్టమ్, హెడ్-అప్ డిస్‌ప్లే, వెనుక AC వెంట్స్, 360-డిగ్రీ కెమెరా, పుష్-బటన్ స్టార్ట్/స్టాప్ వంటి మొదలగు అత్యాధునిక ఫీచర్స్ ఈ కారులో ఉన్నాయి.