ఎలక్ట్రిక్ కార్ల మార్కెట్‌లో విన్‌ఫాస్ట్ జోరు.. తొలి నెలలోనే టెస్లాను వెనక్కి నెట్టి 131 కార్లు డెలివరీ

భారతదేశంలో ఎలక్ట్రిక్ వాహనాల (EV) మార్కెట్లోకి కొత్తగా అడుగుపెట్టిన వియత్నాం కంపెనీ విన్‌ఫాస్ట్(VinFast) తొలి నెలలోనే సంచలనం సృష్టించింది. ఫెడరేషన్ ఆఫ్ ఆటోమొబైల్ డీలర్స్ అసోసియేషన్స్ (FADA) నివేదిక ప్రకారం.. విన్‌ఫాస్ట్ అక్టోబర్ 2025లో ఏకంగా 131 ఎలక్ట్రిక్ కార్లను డెలివరీ చేసింది.

భారత మార్కెట్‌లో పూర్తిస్థాయిలో కార్యకలాపాలు ప్రారంభించిన తొలి నెలలోనే ఈ మైలురాయిని చేరుకోవడం కంపెనీ వేగవంతమైన వృద్ధికి, భారతీయ వినియోగదారుల నుంచి లభిస్తున్న బలమైన ఆదరణకు నిదర్శనం. అంతేకాకుండా అక్టోబర్‌లో విన్‌ఫాస్ట్ కార్ల విక్రయాలు అదే నెలలో అమ్ముడైన టెస్లా (Tesla) కార్ల సంఖ్యను అధిగమించడం విశేషం.

వియత్నాంకు చెందిన ఎలక్ట్రిక్ వాహన తయారీ సంస్థ విన్‌ఫాస్ట్, భారత మార్కెట్‌లో అక్టోబర్ 2025లో గణనీయమైన విజయాన్ని నమోదు చేసింది. ఫాడా (FADA) నివేదిక ప్రకారం.. విన్‌ఫాస్ట్ అక్టోబర్ నెలలో ఏకంగా 131 ఎలక్ట్రిక్ కార్లను విక్రయించింది. ఈ అక్టోబర్ నెలలో పండుగ సీజన్ కలిసి రావడంతో, ఆటోమొబైల్స్ డిమాండ్ పెరిగింది.

ఈ 131 కార్ల విక్రయం, అదే నెలలో అమ్ముడైన టెస్లా కార్ల విక్రయాలను అధిగమించింది. టెస్లా ప్రస్తుతం దిగుమతులపై ఆధారపడి ప్రధాన మెట్రో నగరాలకు పరిమితమై ఉండగా, విన్‌ఫాస్ట్ వేగంగా తన మౌలిక సదుపాయాలను మరియు స్థానిక ఉనికిని పెంచుకుంటోంది. ఈ ప్రారంభ వేగంతో 2025లో ఇప్పటివరకు విన్‌ఫాస్ట్ మొత్తం 204 వాహనాలను భారత్‌లో విక్రయించగలిగింది.

విన్‌ఫాస్ట్ భారత మార్కెట్‌లో తన ఉనికిని వేగంగా పెంచుకోవడానికి వ్యూహాత్మకంగా అడుగులు వేస్తోంది. ప్రస్తుతం విన్‌ఫాస్ట్ డీలర్‌షిప్ నెట్‌వర్క్ ఢిల్లీ, ముంబై, చెన్నై, బెంగళూరు, హైదరాబాద్ వంటి ప్రధాన నగరాలతో సహా 24 ప్రాంతాలలో ఉంది. కంపెనీ 2025 సంవత్సరం చివరి నాటికి దేశంలోని 27 నగరాల్లో మొత్తం 35 డీలర్‌షిప్‌లకు తమ నెట్‌వర్క్‌ను విస్తరించాలని లక్ష్యంగా పెట్టుకుంది.

2025 ప్రారంభంలో భారత మార్కెట్లోకి అడుగుపెట్టిన విన్‌ఫాస్ట్ VF6, VF7 అనే రెండు ఎలక్ట్రిక్ ఎస్‌యూవీ మోడళ్లను విడుదల చేసింది. ఆలస్యంగా విడుదలైనప్పటికీ, ఈ కార్లకు వినియోగదారుల నుంచి మంచి స్పందన లభిస్తోంది. విన్‌ఫాస్ట్ ఎస్‌యూవీలు మధ్యశ్రేణి EV సెగ్మెంట్‌లో పోటీతత్వ ధరలతో, ప్రీమియం ఫీచర్లను అందిస్తున్నాయి.

VinFast VF6 ప్రారంభ ధర రూ. 16.49 లక్షలు (ఎక్స్-షోరూమ్). VinFast VF7: ప్రారంభ ధర రూ. 20.89 లక్షలు (ఎక్స్-షోరూమ్). VF6 ఎర్త్ వేరియంట్ 130 kW గరిష్ట పవర్, 250 Nm టార్క్ అందిస్తుంది. ఇది మంచి రియర్ సస్పెన్షన్, మల్టిపుల్ డ్రైవ్ మోడ్‌లు, 12.9-అంగుళాల ఇన్ఫోటైన్‌మెంట్ స్క్రీన్, పవర్డ్ డ్రైవర్ సీట్, ఆటోమేటిక్ క్లైమేట్ కంట్రోల్, క్రూయిజ్ కంట్రోల్ వంటి అధునాతన ఫీచర్లను కలిగి ఉంది.

కంపెనీ అందించే అడ్వాన్సుడ్ టెక్నాలజీ, సౌకర్యం, సేఫ్టీ ఫీచర్లు కొనుగోలుదారులను తమ వైపుకు ఆకర్షిస్తున్నాయి. విన్‌ఫాస్ట్ ప్రవేశం భారత ఎలక్ట్రిక్ ప్యాసింజర్ వాహనాల మార్కెట్‌లో వేగవంతమైన పరిణామాన్ని సూచిస్తుంది. అక్టోబర్ 2025లో భారతీయ EV మార్కెట్ సంవత్సరానికి 57.5% వృద్ధిని ప్రదర్శించింది.

టాటా మోటార్స్, మహీంద్రా, ఎంజీ మోటార్ వంటి మార్కెట్ నాయకులతో పాటు, విన్‌ఫాస్ట్ కూడా సరసమైన ధరల్లో ప్రీమియం EVలను అందించే ముఖ్యమైన ఆటగాడిగా ఎదిగింది. ధర, ఫీచర్లు, స్థానిక మార్కెట్ వ్యూహాలను ఎలా ఉపయోగించుకోవచ్చో విన్‌ఫాస్ట్ నిరూపించింది.