ఈ పొట్టి ఎలక్ట్రిక్‌ కారు చాలా గట్టిదీ.. బెత్తడంతా ఉన్నాకానీ, ఫర్ఫామెన్స్‌లో భళా.. త్వరలో లాంచ్!

ప్రస్తుతం భారత ఆటోమొబైల్ రంగం విశ్వవ్యాప్తంగా ఆకర్షణగా మారింది. ఇతర దేశాలతో పోలిస్తే ఇండియా మార్కెట్ వేగంగా వృద్ధి చెందుతుండటంతో, ప్రపంచవ్యాప్తంగా పేరుపొందిన ఆటోమొబైల్ కంపెనీలు ఇక్కడ తమ వ్యాపారాన్ని విస్తరించేందుకు పెద్ద ఎత్తున పెట్టుబడులు పెట్టేందుకు ముందుకు వస్తున్నాయి. ఇదే తరహాలో ఇప్పుడు వియత్నాంకు చెందిన ప్రముఖ ఎలక్ట్రిక్ వాహన తయారీ సంస్థ విన్‌ఫాస్ట్ (VinFast) కూడా భారత మార్కెట్లో తన సత్తా చాటడానికి రంగంలోకి దిగింది. ఇప్పటికే ఈ కంపెనీ సెప్టెంబర్ నెలలో తన తొలి రెండు ఎలక్ట్రిక్ SUVలను VF6, VF7 అధికారికంగా ఆవిష్కరించింది. ఇవి ఆధునిక డిజైన్, ప్రీమియం ఫీచర్లు, గట్టి బ్యాటరీ పనితీరు కారణంగా ప్రపంచవ్యాప్తంగా మంచి స్పందనను అందుకుంటున్నాయి.

ఇప్పుడు, విన్‌ఫాస్ట్ తన ప్రయాణంలో మరో కీలక దశను ప్రారంభించింది. కంపెనీ తాజాగా భారత మార్కెట్లో తన మొదటి బ్యాచ్ వాహనాల డెలివరీలను ప్రారంభించింది. ఇది సంస్థకు, వినియోగదారులకు రెండింటికీ ఒక పెద్ద మైలురాయిగా చెప్పుకోవచ్చు. అయితే, విన్‌ఫాస్ట్ ఇంతటితో ఆగిపోనుంది కాదు. భారత మార్కెట్లో మరింత బలమైన స్థానం సంపాదించడానికి కంపెనీ ఇప్పటికే తన తదుపరి మోడల్‌పై పనులు ప్రారంభించింది.

తాజా సమాచారం ప్రకారం, విన్‌ఫాస్ట్ త్వరలో VF3 అనే ఎలక్ట్రిక్ హ్యాచ్‌బ్యాక్ కారును భారత మార్కెట్లోకి తీసుకురావడానికి సిద్ధమవుతోంది. ఈ కారు ప్రత్యేకంగా నగరాల్లో రోజువారీ ప్రయాణాలకు అనుకూలంగా ఉండే విధంగా రూపుదిద్దుకుంటోంది. చిన్న సైజ్, తక్కువ ఖర్చు, మంచి రేంజ్‌తో ఈ VF3 ఎలక్ట్రిక్ కార్ భారత వినియోగదారులకు మరింత చేరువ కావడమే కాకుండా, మధ్యతరగతి కుటుంబాల కోసం సరసమైన ఎలక్ట్రిక్ ఎంపికగా నిలవవచ్చని అంచనాలు ఉన్నాయి.

విన్‌ఫాస్ట్ త్వరలో భారత మార్కెట్లోకి తీసుకురాబోతున్న కొత్త ఎలక్ట్రిక్ హ్యాచ్‌బ్యాక్ VF3, స్మార్ట్ సైజ్‌తో పాటు అద్భుతమైన పనితీరును కలిగి ఉండేలా రూపొందించబడింది. ఈ కారు చిన్నగా కనిపించినా, దీని టెక్నాలజీ మాత్రం పెద్ద SUVలకు ఏమాత్రం తగ్గదు. విన్‌ఫాస్ట్ VF3 లో 18.64 కిలోవాట్‌గంటల(kWh) బ్యాటరీ ప్యాక్‌ను అమర్చారు. ఇది పూర్తిగా ఛార్జ్ చేస్తే 215 కిలోమీటర్ల వరకు రేంజ్ అందిస్తుంది. నగర ప్రయాణాలకు ఇది చక్కగా సరిపోతుంది.

ట్రాఫిక్ పరిస్థితుల్లో కూడా ఇది చాలా సౌకర్యంగా, సమర్థవంతంగా పనిచేస్తుంది. దీని గరిష్ట వేగం గంటకు 100 కి.మీ. కాగా, 0 నుండి 50 కి.మీ. వేగాన్ని కేవలం 5.3 సెకన్లలోనే చేరుకుంటుంది. అంటే, ఇది కాంపాక్ట్ సిటీ కార్ అయినప్పటికీ వేగం విషయంలో అద్భుతమైన రెస్పాన్స్ ఇస్తుంది. అంతేకాకుండా, ఇది సాధారణ హ్యాచ్‌బ్యాక్‌లతో పోలిస్తే నాలుగు సీట్ల లేఅవుట్ కలిగి ఉంటుంది.

క్యాబిన్‌లోని స్పేస్‌ను చాలా తెలివిగా డిజైన్ చేయడం వల్ల ప్రయాణీకులు సౌకర్యవంతంగా కూర్చొని ప్రయాణించగలుగుతారు. అదనంగా, వెనుక భాగంలో 285 లీటర్ల బూట్ స్పేస్ ఉండడం వల్ల రోజువారీ అవసరాలకు లేదా చిన్న ట్రిప్‌లకు సరిపడా లగేజ్‌ను తీసుకెళ్లవచ్చు. విన్‌ఫాస్ట్ VF3 భారత్‌లోని వినియోగదారులకు సరసమైన ధరలో అందుబాటులో ఉండే ఎలక్ట్రిక్ కార్‌గా మారే అవకాశం ఉంది.

తాజా సమాచారం ప్రకారం, ఈ కారును ఫిబ్రవరి 2026లో దేశీయ మార్కెట్లో అధికారికంగా లాంచ్ చేయనున్నారు. దీని ఎక్స్-షోరూమ్ ధర రూ.7.50 లక్షల నుండి రూ.10 లక్షల మధ్య ఉండవచ్చని అంచనా. లాంచ్ అయిన వెంటనే VF3 మార్కెట్లో ఉన్న MG కామెట్ EV, టాటా టియాగో EV వంటి మోడళ్లతో పోటీ పడనుంది. ధర, డిజైన్, రేంజ్ విషయాల్లో విన్‌ఫాస్ట్ VF3 ఆకర్షణీయంగా ఉండవచ్చని పరిశ్రమ నిపుణులు భావిస్తున్నారు.