టాటా-మహీంద్రాకు మరో పోటీదారు వచ్చేస్తున్నాడు.. రేపే అడుగుపెడుతున్న విన్‌ఫాస్ట్ VF6, VF7 ఎలక్ట్రిక్ కార్లు

వియత్నాంకు చెందిన ప్రముఖ ఆటోమొబైల్ బ్రాండ్ విన్‌ఫాస్ట్ (Vinfast) ఇప్పుడు తన దృష్టిని భారత మార్కెట్‌పై కేంద్రీకరించింది. మన దేశంలో ఆటోమొబైల్ రంగం వేగంగా ఎదుగుతోందని గమనించిన ఈ కంపెనీ, భారత వినియోగదారుల కోసం తన కొత్త మోడళ్లను పరిచయం చేయడానికి సిద్ధమైంది. ఈ క్రమంలో, సెప్టెంబర్ 6న విన్‌ఫాస్ట్ VF6, VF7 అనే ఎలక్ట్రిక్ SUVలను ఘనంగా ఆవిష్కరించనుంది. ఈ రెండు కార్లు ఆకర్షణీయమైన డిజైన్‌తో పాటు ఆధునికతను ప్రతిబింబించే డజన్ల కొద్దీ ఫీచర్లను కలిగి ఉండటం విశేషం. ఇప్పటికే ఈ ఏడాది ప్రారంభంలో జరిగిన భారత్ మొబిలిటీ గ్లోబల్ ఎక్స్‌పోలో వీటిని ప్రదర్శించగా, సందర్శకుల నుండి మంచి స్పందన లభించింది. ఇప్పుడు అధికారిక లాంచ్ కోసం ముహూర్తం ఖరారు కావడంతో, భారత EV మార్కెట్లోకి విన్‌ఫాస్ట్ అడుగుపెడుతోంది.

మరొక ముఖ్య విషయం ఏమిటంటే, ఈ మోడళ్లకు ప్రీ-బుకింగ్‌లు ఇప్పటికే ప్రారంభమయ్యాయి. ఆసక్తి కలిగిన కస్టమర్లు కేవలం రూ. 21,000 అడ్వాన్స్ చెల్లించి ఆర్డర్ చేసుకునే అవకాశం ఉంది. ఈ లాంచ్‌తో భారత ఎలక్ట్రిక్ SUV విభాగంలో పోటీ మరింత ఉత్కంఠభరితంగా మారనుంది. దేశంలో పండుగ వాతావరణం మొదలైన నేపథ్యంలో ఈ కార్లు అమ్మకాల పరంగా కస్టమర్ల నుంచి మంచి ఆదరణ సంపాదిస్తాయని కంపెనీ అంచనా వేసింది.

Vinfast VF6: VF6 ఎలక్ట్రిక్ SUV ధర రూ. 18 లక్షల నుంచి రూ. 24 లక్షల (ఎక్స్-షోరూమ్) మధ్యగా ఉండొచ్చని అంచనా. ఈ మోడల్ ఎర్త్, విండ్ అనే రెండు వేరియంట్లలో విడుదల కానుంది. శక్తివంతమైన పవర్‌ట్రెయిన్‌తో రాబోతున్న ఈ కారు 59.6 kWh బ్యాటరీ ప్యాక్‌ను కలిగి ఉంటుంది. ఒకసారి పూర్తి ఛార్జ్ చేస్తే సుమారు 381 నుండి 399 కిలోమీటర్ల వరకు రేంజ్ ఇవ్వగలదని భావిస్తున్నారు.

బయటి డిజైన్ విషయానికి వస్తే, VF6 SUV ఆధునిక లుక్‌తో ఆకట్టుకునేలా రూపకల్పన చేయబడింది. ఇందులో LED హెడ్‌లైట్లు, LED DRLలు, అలాగే స్టైలిష్ 19-అంగుళాల అల్లాయ్ వీల్స్ ఉండే అవకాశం ఉంది. ఇంటీరియర్‌లో 5 సీటింగ్ లేఅవుట్‌తో ప్రయాణికులకు సౌకర్యవంతమైన అనుభవం ఇవ్వగలదని చెప్పవచ్చు. 12.9-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్ ఆకట్టుకునేలా ఉంటుంది.

ఇంకా, డిజిటల్ ఇన్‌స్ట్రుమెంట్ క్లస్టర్, డ్యూయల్-జోన్ క్లైమేట్ కంట్రోల్, రియర్ AC వెంట్స్ వంటి ఆధునిక సౌకర్యాలు ఇందులో అందుబాటులోకి రానున్నాయి. భద్రత విషయంలో కూడా VF6 SUV సమానంగా ఆకర్షిస్తుంది. ఇందులో 6 ఎయిర్‌బ్యాగులు, లెవెల్-2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్), అలాగే 360-డిగ్రీ కెమెరా లాంటి అత్యాధునిక సాంకేతికతలు ఉండే అవకాశం ఉంది.

Vinfast VF7: విన్‌ఫాస్ట్ VF7 ఎలక్ట్రిక్ SUV ప్రీమియం సెగ్మెంట్‌ను లక్ష్యంగా చేసుకుని భారత మార్కెట్‌లో అడుగుపెట్టబోతోంది. దీని ధర సుమారు రూ. 35 లక్షలు (ఎక్స్-షోరూమ్)గా ఉండొచ్చని అంచనా. ఈ SUV మూడు వేరియంట్లలో ఎర్త్, విండ్, స్కైలలో అందుబాటులో రానుంది. శక్తివంతమైన 75.3 kWh బ్యాటరీ ప్యాక్‌తో ఇది మరింత ప్రభావవంతమైన డ్రైవింగ్ అనుభవాన్ని ఇవ్వబోతోంది.

పూర్తి ఛార్జ్ చేసినప్పుడు సుమారు 431 నుండి 450 కిలోమీటర్ల వరకు రేంజ్ అందిస్తుందని కంపెనీ చెబుతోంది. డిజైన్ పరంగా VF7 SUV చాలా స్టైలిష్‌గా ఉండబోతోంది. ఇందులో LED హెడ్‌ల్యాంప్‌లు, LED DRLలు, ఆధునిక ఫ్లష్ డోర్ హ్యాండిల్స్, ఆకర్షణీయమైన 19-అంగుళాల డ్యూయల్-టోన్ అల్లాయ్ వీల్స్ లాంటి ఫీచర్లు ఉండే అవకాశం ఉంది.

కాబిన్‌లోకి వెళ్తే, 15-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, విశాలమైన అనుభూతిని కలిగించే పనోరమిక్ గ్లాస్ రూఫ్, అలాగే ఆధునిక వైర్‌లెస్ ఫోన్ ఛార్జర్ వంటి సౌకర్యాలు ఈ కారుకు ప్రత్యేక ఆకర్షణగా నిలుస్తాయి. భద్రతా పరంగా కూడా VF7 బలంగా నిలుస్తోంది. ఇందులో 8 ఎయిర్‌బ్యాగులు, ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్), అలాగే డ్రైవింగ్‌లో మరింత నమ్మకం కలిగించే 360-డిగ్రీ కెమెరా వంటి సాంకేతికతలు ఉండనున్నాయి.