వోక్స్‌వ్యాగన్ టెర్రా.. చిన్న SUV.. పెద్ద ఫీచర్లు - మార్కెట్‌లో దుమ్మురేపడం ఖాయం!

జర్మన్ కార్లంటే చాలా మందికి ప్రత్యేకమైన అభిమానం ఉంటుంది. వోక్స్‌వ్యాగన్ అమ్మకాల గణాంకాలు పరిశీలిస్తే ఇది స్పష్టంగా తెలుస్తుంది. ఇప్పుడు ఈ బ్రాండ్ నుండి రాబోతున్న ఒక చిన్న SUV టెర్రా. పోలోను ఆధారంగా చేసుకుని సబ్-కాంపాక్ట్ SUVగా ఈ టెర్రాను విడుదల చేయాలని వోక్స్‌వ్యాగన్ యోచిస్తోంది. అయితే ఇది వెంటనే ఉండకపోవచ్చు.

2026లో ఈ వాహనాన్ని మార్కెట్లోకి తీసుకురావాలని జర్మన్ బ్రాండ్ లక్ష్యంగా పెట్టుకుంది. ప్రస్తుతం వస్తున్న నివేదికల ప్రకారం టెర్రాలో లెవెల్ 1 అడాస్ (Advanced Driver Assistance Systems) ఫీచర్లు ఉండబోతున్నాయని తెలుస్తోంది. ఒకవేళ ఇది నిజమైతే, ఇది ప్రత్యర్థులకు ఒక పెద్ద ఎదురుదెబ్బ అవుతుందనడంలో ఎలాంటి సందేహం లేదు.

బ్రెజిల్‌లోని రియో డి జనీరోలో జరిగిన కార్నివల్‌లో వోక్స్‌వ్యాగన్ తమ కొత్త కాంపాక్ట్ SUV టెర్రాను ప్రపంచానికి పరిచయం చేసింది. ఈ మోడల్ ఈ సంవత్సరం మొదటి అర్ధభాగంలో బ్రెజిలియన్ మార్కెట్లో విడుదల కానుంది. వోక్స్‌వ్యాగన్ శ్రేణిలో పోలో, టి-క్రాస్ మధ్య స్థానాన్ని ఆక్రమించనున్న టెర్రా, అభివృద్ధి చెందుతున్న మార్కెట్లలో ఉన్న మిగతా వాటితో పోటీపడుతూ విక్రయాలు అందుకుంటుందని అంచనా.

పూర్తిగా బ్రెజిల్‌లో అభివృద్ధి చేయబడిన ఈ కాంపాక్ట్ SUV వోక్స్‌వ్యాగన్ లేటెస్ట్ గ్లోబల్ డిజైన్ లాంగ్వేజ్‌ను కలిగి ఉంది. అయితే ఇదే వాహనాన్ని కంపెనీ భారతీయ మార్కెట్లో కూడా విడుదల చేస్తుందని సూచనలు ఉన్నాయి. కానీ చాలా వరకు లోకలైజ్డ్ MQB A0 IN ప్లాట్‌ఫామ్‌పై ఈ సబ్-4 మీటర్ SUVని నిర్మిస్తామని కంపెనీ తెలిపింది.

స్కోడా కైలాక్ విజయాన్ని వోక్స్‌వ్యాగన్ టెర్రా కూడా పునరావృతం చేయగలదని అంచనా వేస్తున్నారు. బ్రాండ్ ఎలక్ట్రిక్ ID.4 EV నుంచి ప్రేరణ పొందిన డిజైన్‌ను ఇది కలిగి ఉంది. అంతేకాకుండా T-రాక్‌ను గుర్తుచేసే బలమైన రియర్ పిల్లర్ టెర్రాకు మస్క్యులర్ రూపాన్ని ఇస్తుంది. ప్రత్యేకమైన డేటైమ్ రన్నింగ్ లైట్ ప్యాటర్న్‌తో కూడిన స్ప్లిట్ LED హెడ్‌లైట్లు, హై మౌంటెడ్ LED టెయిల్ లైట్లు డిజైన్‌లో మొదటి చూపులోనే ఆకట్టుకుంటాయి.

వోక్స్‌వ్యాగన్ ప్రీమియం SUVల వలె కాకుండా, టెర్రాలో ఇల్యూమినేటెడ్ లైట్ బార్‌లు ఉండవు. సరసమైన ధర ఉన్నప్పటికీ, ఒక కాంపాక్ట్ SUVగా ఈ వాహనం చాలా ఆకర్షణీయంగా డిజైన్ చేయబడింది. బ్రెజిల్‌లో అధిక వేరియంట్లలో పోలో TSI అదే 1.0 లీటర్ టర్బో ఫ్లెక్స్ ఇంజిన్‌తో ఈ వాహనం వస్తుందని నివేదికలు సూచిస్తున్నాయి.

ఈ ఇంజిన్ 116 bhp శక్తిని, 164 Nm టార్క్‌ను ఉత్పత్తి చేయగలదు. ఇది ఆరు స్పీడ్ ఆటోమేటిక్ ట్రాన్స్‌మిషన్‌తో వస్తుంది. ఈ మోడల్ MQB A0 మోడ్యులర్ ప్లాట్‌ఫామ్‌ను టి-క్రాస్, నివస్, పోలోతో పంచుకుంటుంది. భారతదేశానికి వచ్చేసరికి వోక్స్‌వ్యాగన్ టెర్రా 1.0 లీటర్ టర్బోచార్జ్డ్ త్రీ సిలిండర్ పెట్రోల్ ఇంజిన్‌తో విడుదలయ్యే అవకాశం ఉంది.

స్కోడా కైలాక్‌లో ఉన్నట్లుగా 6 స్పీడ్ మాన్యువల్ ట్రాన్స్‌మిషన్, 6 స్పీడ్ ఆటోమేటిక్ ట్రాన్స్‌మిషన్‌లో లభించే ఈ TSI ఇంజిన్ 115 bhp శక్తిని, 178 Nm టార్క్‌ను ఉత్పత్తి చేయగలదు. ఇంటీరియర్ కూడా ఆధునికంగా రూపొందించబడుతున్నందున, భారతదేశానికి వచ్చే వోక్స్‌వ్యాగన్ టెర్రాలో అనేక ఆధునిక ఫీచర్లు ఉండే అవకాశం ఉంది.

పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆపిల్ కార్ప్లే, ఆండ్రాయిడ్ ఆటో, డిజిటల్ ఇన్స్ట్రుమెంట్ క్లస్టర్, వెంటిలేటెడ్ ఫ్రంట్ సీట్లు, ఆరు విధాలుగా అడ్జస్ట్ చేయగల ఎలక్ట్రిక్ సీట్లు, డ్యూయల్-స్పోక్ మల్టీ-ఫంక్షన్ స్టీరింగ్ వీల్, ఎలక్ట్రిక్ సన్‌రూఫ్, క్రూయిజ్ కంట్రోల్, లెథరెట్ అప్‌హోల్‌స్టరీ వంటి ప్రాథమిక ఫీచర్లు టెర్రాలో ఉంటాయి.

డ్రైవ్‌స్పార్క్‌ తెలుగు వెబ్‌సైట్ ఆటోమొబైల్‌కి సంబంధించిన తాజా వార్తలను అందిస్తుంది. వివిధ సోషల్ మీడియాల ద్వారా సరికొత్త వార్తలను ఎప్పటికప్పుడు యూజర్లకు చేరవేస్తుంది. తాజా కార్ల వార్తలు, బైక్ వార్తలు, టెస్ట్ డ్రైవ్ రివ్యూల వీడియోల కోసం మా Facebook, Instagram, YouTube పేజీలతో కనెక్ట్ అవ్వండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు. ధన్యవాదాలు.