కంపెనీకి కామధేనుగా మారిన మోడల్.. కేవలం రూ.8లక్షలకే, 20కిమీ మైలేజ్, 5సీటర్ కారు

సిట్రోయెన్ బసాల్ట్ ఒక పాపులర్ కూపే ఎస్‌యూవీ. ఇది చాలా లేటెస్ట్ డిజైన్, మంచి ఫీచర్లను కలిగి ఉంది. అంతేకాదు బడ్జెట్ ధరలో కూడా లభిస్తుంది. అయినప్పటికీ, ఈ కారు అమ్మకాల సంఖ్య రోజురోజుకు తగ్గుతూ వచ్చింది. అయితే, ఒక అద్భుతం జరిగినట్లుగా బసాల్ట్ అమ్మకాలు ఈ జూన్ నెలలో మెరుగుపడ్డాయి. మొత్తం 214 యూనిట్లను విక్రయించారు.

ఈ సంవత్సరం మొదటి 5 నెలల్లో కూడా సిట్రోయెన్ బసాల్ట్ ఎస్‌యూవీ అమ్మకాల్లో చాలా హెచ్చుతగ్గులు కనిపించాయి. మే నెలలో 95 యూనిట్లు, ఏప్రిల్‌లో 66 యూనిట్లు, మార్చిలో 100 యూనిట్లు, ఫిబ్రవరిలో 37 యూనిట్లు, జనవరిలో కేవలం 61 యూనిట్లను మాత్రమే విక్రయించారు. మరి, ఈ కారు ప్రత్యేకతలు ఏంటి? ఎందుకు దీనికి ఇప్పుడు డిమాండ్ పెరిగింది? వివరాలు తెలుసుకుందాం.

ఈ ఎస్‌యూవీ తక్కువ ధరలో లభిస్తుంది. కాబట్టి మధ్యతరగతి, ధనిక వర్గాల కస్టమర్లు సులభంగా కొనుగోలు చేయవచ్చు. దీని ధర రూ.8.32 లక్షల నుండి రూ.14.10 లక్షల (ఎక్స్-షోరూమ్) వరకు ఉంది. బసాల్ట్ 1.2P U, బసాల్ట్ ప్లస్, బసాల్ట్ టర్బో ప్లస్, బసాల్ట్ టర్బో AT ప్లస్, బసాల్ట్ టర్బో మ్యాక్స్ అనే వెర్షన్లలో (వేరియంట్లలో) కూడా లభిస్తుంది.

ఈ కారు బయటి డిజైన్ చాలా బాగుంది. ఇందులో స్ప్లిట్ హెడ్‌లైట్ సెటప్, V-ఆకారంలో ఉండే స్ప్లిట్ ఎల్‌ఈడీ డీఆర్‌ఎల్‌లు, టెయిల్ లైట్స్, డ్యూయల్ టోన్ అల్లాయ్ వీల్స్ ఉన్నాయి. ఇది పోలార్ వైట్, స్టీల్ గ్రే, ప్లాటినం గ్రే, కాస్మో బ్లూ సహా అనేక రంగులలో కూడా అందుబాటులో ఉంది.

కొత్త బసాల్ట్ 5 సీట్లను కలిగి ఉంది. ప్రయాణికులు సౌకర్యవంతంగా కూర్చొని ప్రయాణం చేయవచ్చు. వీకెండ్లు, సెలవు దినాలలో ప్రయాణాలకు వెళ్ళినప్పుడు ఎక్కువ సామాను తీసుకెళ్లడానికి 470 లీటర్ల సామర్థ్యం గల బూట్ స్పేస్ ఉంది. అంతేకాకుండా, ఇది 4,352 మి.మీ. పొడవు, 1,765 మి.మీ. వెడల్పు, 1593 మి.మీ. ఎత్తు, 2,651 మి.మీ. వీల్‌బేస్‌ను కలిగి ఉంది.

ఈ కారు శక్తివంతమైన పవర్‌ట్రెయిన్ ఆప్షన్లను కలిగి ఉంది. ఇందులో 1.2-లీటర్ నేచురల్ ఆస్పిరేటెడ్ పెట్రోల్, 1.2-లీటర్ టర్బో పెట్రోల్ ఇంజిన్లు ఉన్నాయి. ఇది 5-స్పీడ్ మాన్యువల్, 6-స్పీడ్ మాన్యువల్, 6-స్పీడ్ ఆటోమేటిక్ గేర్‌బాక్స్‌ను కలిగి ఉంది. ఈ కారు 18 నుండి 19.5 కి.మీ. వరకు మైలేజ్ ఇస్తుంది.

కొత్త బసాల్ట్ క్యాబిన్ డిజైన్ చాలా చక్కగా ఉంది. ఇందులో 10.2-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 7-అంగుళాల డిజిటల్ డ్రైవర్స్ డిస్‌ప్లే, వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, వైర్‌లెస్ ఫోన్ ఛార్జర్, పుష్ బటన్ స్టార్ట్, స్టీరింగ్ మౌంటెడ్ ఆడియో కంట్రోల్స్, పవర్ విండోలు వంటి వివిధ ఫీచర్లు ఉన్నాయి.

ఇది ప్రయాణికులకు మంచి సేఫ్టీని అందిస్తుంది. దేశంలోని వాహనాలకు సేఫ్టీ టెస్టులు నిర్వహించే భారత్ ఎన్‌సిఎపి బసాల్ట్ కు 4-స్టార్ సేఫ్టీ రేటింగ్ ఇచ్చింది. ఇది 6 ఎయిర్‌బ్యాగ్‌లు, ఏబీఎస్ (యాంటీలాక్ బ్రేకింగ్ సిస్టమ్), ఈబీడీ (ఎలక్ట్రానిక్ బ్రేక్‌ఫోర్స్ డిస్ట్రిబ్యూషన్), ఈఎస్‌సి (ఎలక్ట్రానిక్ స్టెబిలిటీ కంట్రోల్),రియర్ పార్కింగ్ సెన్సార్లు సహా అనేక సేఫ్టీ ఫీచర్లను కలిగి ఉంది.