డీలర్‌షిప్‌లకు భారంగా మారుతున్న కార్లు.. సెప్టెంబర్‌లో ఒక్క యూనిట్ కూడా అమ్ముడుపోని 5 మోడళ్లు ఇవే

సెప్టెంబర్ 2025లో జీఎస్టీ కొత్త రేట్లు అమలులోకి రావడంతో కార్ల ధరలు తగ్గాయి. దీనివల్ల చాలా మోడళ్ల అమ్మకాలు అమాంతం పెరిగాయి. కానీ, దీనికి విరుద్ధంగా కొన్ని కార్ల మోడళ్లు మాత్రం కస్టమర్ల కోసం ఎదురుచూస్తున్నాయి. మారుతి సుజుకి, నిస్సాన్, సిట్రోయెన్, కియా వంటి పెద్ద కంపెనీలకు చెందిన ఐదు మోడళ్లను సెప్టెంబర్ నెలలో ఒక్క కస్టమర్ కూడా కొనుగోలు చేయలేదు. అంటే, ఈ కార్లు డీలర్లకు, కంపెనీలకు భారంగా మారుతున్నాయి. అమ్ముడుపోని ఆ ఐదు కార్ల వివరాలు వాటికి డిమాండ్ తగ్గడానికి గల కారణాలను ఇప్పుడు చూద్దాం

1. కియా ఈవీ6 (Kia EV6)
కియా ఇండియా కంపెనీ మార్చి 2025లో EV6 ఫేస్‌లిఫ్ట్‌ను రూ.65.90 లక్షల (ఎక్స్-షోరూమ్) ధరతో విడుదల చేసింది. ఈ ఎలక్ట్రిక్ ఎస్‌యూవీ భారతదేశంలో సీబీయూ (CBU - పూర్తిగా నిర్మించిన యూనిట్‌గా) రూట్‌లో దిగుమతి అవుతుంది. దీని కారణంగా దీనిపై ఎక్కువ పన్ను పడుతోంది.

కంపెనీ భారీ తగ్గింపులు ప్రకటించినా, దీని అధిక ధర, కేవలం సింగిల్ ఏడబ్ల్యుడీ వేరియంట్ మాత్రమే ఉండటం వల్ల కస్టమర్లను ఆకర్షించడంలో విఫలమైంది. సెప్టెంబర్‌లో దీని అమ్మకాలు సున్నాగా నమోదయ్యాయి.

2. మారుతి సుజుకి సియాజ్ (Maruti Suzuki Ciaz)
మారుతి సుజుకి కంపెనీ ఈ సియాజ్ కారు ఉత్పత్తిని మార్చి 2025లోనే నిలిపివేసింది. కానీ, ఇప్పటికీ కంపెనీ స్టాక్‌యార్డులు, డీలర్‌షిప్‌ల వద్ద ఈ కారు స్టాక్ మిగిలి ఉంది. సెడాన్ మార్కెట్‌లో డిమాండ్ బాగా తగ్గిపోవడం, 2014లో విడుదలైన ఈ మోడల్‌పై కస్టమర్లు ఆసక్తి చూపకపోవడం వల్ల సెప్టెంబర్ నెలలో సియాజ్‌ను ఒక్క కొనుగోలుదారు కూడా కొనుగోలు చేయలేదు.

3. నిస్సాన్ ఎక్స్-ట్రైల్ (Nissan X-Trail)
నిస్సాన్ కంపెనీ ఈ ఎక్స్-ట్రైల్ కారును గత ఏడాది ఆగస్టులో రూ.49.92 లక్షల (ఎక్స్-షోరూమ్) భారీ ధరతో విడుదల చేసింది. ఈ కారు కూడా సీబీయూ రూట్‌లో దిగుమతి అవుతుంది. అధిక ధరల కారణంగా కస్టమర్లను ఆకర్షించడంలో ఇది విఫలమైంది.

భారతదేశంలో కేవలం 150 యూనిట్లు మాత్రమే దిగుమతి అయ్యాయి. సెప్టెంబర్ 2025లో ఈ కారు అమ్మకాలు సున్నాగా నమోదయ్యాయి. ఈ ఏడాది ప్రారంభంలో, ప్రీమియం యూజ్డ్ కార్ డీలర్‌షిప్‌లలో ఈ కారుపై రూ.20 లక్షలకు పైగా తగ్గింపు ప్రకటించినా ఫలితం లేకుండా పోయింది.

4. కియా ఈవీ9 (Kia EV9)
కియా కంపెనీ ఈ ఈవీ9 ఎలక్ట్రిక్ ఎస్‌యూవీని గత ఏడాది అక్టోబర్‌లో రూ.1.30 కోట్లతో (ఎక్స్-షోరూమ్) విడుదల చేసింది. ఈ కారు కూడా ఈవీ6 లాగే సీబీయూ యూనిట్‌గా దిగుమతి అవుతుంది. ఈ కారును లగ్జరీ బ్రాండ్‌లు రాజ్యమేలే సెగ్మెంట్‌లో విడుదల చేశారు.

రూ.కోటి కంటే ఎక్కువ ధర ఉన్నప్పుడు కస్టమర్లు సాధారణంగా కియా కంటే మెర్సిడెస్ లేదా బీఎండబ్ల్యూ వంటి లగ్జరీ బ్రాండ్‌లనే ఎంచుకుంటారు. ఈ కారణాల వల్ల ఈ కారుకు కూడా సెప్టెంబర్‌లో కొనుగోలుదారులు దొరకలేదు. ఈ కారు ఒక్కసారి ఛార్జింగ్ చేస్తే 561 కి.మీ. రేంజ్‌ను ఇస్తుంది.

5. సిట్రోయెన్ సి5 ఎయిర్‌క్రాస్ (Citroen C5 Aircross)
సిట్రోయెన్ కంపెనీ C5 ఎయిర్‌క్రాస్‌ను ఏప్రిల్ 2021లో ప్రారంభించింది. తక్కువ సంఖ్యలో సేల్స్, సర్వీస్ నెట్‌వర్క్ (డీలర్‌షిప్‌లు) ఉండటం వలన ఈ ఎస్‌యూవీకి కస్టమర్లు పెద్దగా ఆకర్షితులు కాలేదు. అంతేకాకుండా, హ్యుందాయ్ క్రెటా వంటి అత్యధికంగా అమ్ముడవుతున్న మోడళ్లతో పోటీ పడలేకపోయింది. ఫీచర్లలో కొరత కారణంగా సెప్టెంబర్ 2025లో ఈ కారుకు ఒక్క కస్టమర్ కూడా దొరకలేదు.