క్రాష్ టెస్ట్‌లో దుమ్మురేపిన డస్టర్.. ఇకపై నమ్మకంగా కొనచ్చు! 5 స్టార్ సేఫ్టీతో అదరగొట్టింది

ఫ్రెంచ్ ఆటోమొబైల్ దిగ్గజం రెనాల్ట్(Renault) భారత మార్కెట్‌లో చాలా కాలంగా తనకంటూ ప్రత్యేక గుర్తింపును ఏర్పరుచుకుంది. భారీ పోటీ ఉన్నప్పటికీ, స్థిరమైన ప్రదర్శనతో వినియోగదారుల నమ్మకాన్ని సంపాదించడంలో ఈ సంస్థ విజయవంతమైంది. ముఖ్యంగా SUV సెగ్మెంట్‌లో ఒకప్పుడు సంచలనం సృష్టించిన రెనాల్ట్ డస్టర్ (Renault Duster) మళ్లీ కొత్త అవతారంలో మార్కెట్లోకి రావడం ఇప్పుడు పెద్ద చర్చగా మారింది. 2026 మోడల్ రూపంలో తిరిగి వచ్చిన ఈ లెజెండరీ SUV, కేవలం డిజైన్ లేదా ఫీచర్ల పరంగా మాత్రమే కాకుండా, భద్రత విషయంలో కూడా కొత్త ప్రమాణాలను సెట్ చేస్తోంది. తాజా Bharat NCAP క్రాష్ టెస్ట్‌లో ఈ కొత్త డస్టర్ 5-స్టార్ సేఫ్టీ రేటింగ్‌ను సాధించడం, దీనిపై కంపెనీ పెట్టిన ఫోకస్‌ను స్పష్టంగా తెలియజేస్తోంది.

ఈ మిడ్-సైజ్ కాంపాక్ట్ SUVలో ప్రయాణించే పెద్దలు మాత్రమే కాదు, పిల్లలు కూడా గరిష్ట రక్షణ పొందేలా ప్రత్యేకంగా డిజైన్ చేశారు. బాడీ స్ట్రక్చర్ నుంచి సేఫ్టీ ఫీచర్ల వరకు ప్రతి అంశాన్ని శ్రద్ధగా రూపొందించడం వల్లే ఈ అత్యున్నత రేటింగ్ సాధ్యమైంది. నగరంలోనూ, హైవేపై కూడా సురక్షితంగా ప్రయాణించాలనుకునే కుటుంబాలకు ఇది ఒక విశ్వసనీయ ఎంపికగా మారే అవకాశం ఉంది.

భద్రత విషయంలో కొత్తగా వచ్చిన Renault Duster నిజంగా ఆకట్టుకునే ప్రదర్శనను చూపించింది. Bharat NCAP క్రాష్ టెస్ట్‌లలో ఈ SUV వయోజన ప్రయాణీకుల రక్షణలో 32 పాయింట్లకు గాను 30.49 పాయింట్లు సాధించగా, పిల్లల భద్రత విభాగంలో 49 పాయింట్లకు గాను 45 పాయింట్లు పొందింది. ఈ స్కోర్లు వాహనం నిర్మాణం ఎంత బలంగా ఉందో, అలాగే భద్రతా ఫీచర్లు ఎంత సమర్థంగా పనిచేస్తాయో స్పష్టంగా తెలియజేస్తాయి.

ఇక్కడ గమనించాల్సిన విషయం ఏమిటంటే, ఈ పరీక్షలు సాధారణంగా తక్కువ వేరియంట్లపై మాత్రమే నిర్వహించబడతాయి. అయినప్పటికీ, పొందిన రేటింగ్ మొత్తం మోడల్ లైనప్‌కు వర్తిస్తుంది. అంటే, Renault Duster ఏ వేరియంట్ తీసుకున్నా, దాదాపు ఇదే స్థాయి భద్రత అందుబాటులో ఉంటుందని చెప్పవచ్చు. ప్రయాణికులతో పాటు పాదచారుల భద్రతను కూడా దృష్టిలో పెట్టుకుని రూపొందించబడిన ఈ SUV, సమగ్ర రక్షణను అందించేందుకు ప్రత్యేకంగా డిజైన్ చేయబడింది.

ఈ వాహనం నిర్మాణానికి ఉపయోగించిన RGMP(CMF-B) ప్లాట్‌ఫామ్ ఇప్పటికే Euro NCAP పరీక్షల్లో కూడా 5-స్టార్ రేటింగ్ సాధించడం మరో ముఖ్యమైన అంశం. అంటే, గ్లోబల్ స్థాయిలో కూడా ఈ ప్లాట్‌ఫామ్ భద్రతా ప్రమాణాలను నిరూపించుకుంది. డస్టర్ భద్రతా పరీక్షల్లో మంచి ప్రదర్శనను చూపించింది. ఫ్రంటల్ ఆఫ్‌సెట్ టెస్ట్‌లో డ్రైవర్ ఛాతీ, మోకాలు, పాదాలకు సరిపడ రక్షణ లభించగా, తల, మెడ వంటి ముఖ్య భాగాలకు మంచి రక్షణ లభించింది.

సహ-ప్రయాణికుడికి అన్ని భాగాల్లో మంచి భద్రత లభించడం గమనార్హం. దీంతో ఈ పరీక్షలో మంచి స్కోర్ నమోదు చేసింది. పార్శ్వ (సైడ్) ప్రభావ పరీక్షల్లో కూడా ఈ SUV అద్భుతంగా నిలిచింది. సైడ్ డిఫార్మబుల్ బారియర్ టెస్ట్‌లో పూర్తి మార్కులు సాధించగా, సైడ్ పోల్ టెస్ట్‌లో కూడా మంచి రక్షణను చూపించింది. మొత్తంగా చూస్తే, ఈ SUV అన్ని రకాల ప్రమాదాల్లో ప్రయాణికులకు మంచి భద్రతను అందించేలా రూపొందించబడింది.

డస్టర్‌లో 6 ఎయిర్‌బ్యాగ్‌లు, లెవెల్ 2 ADAS, క్రూయిజ్ కంట్రోల్, హిల్ స్టార్ట్ అసిస్ట్, ఆటోమేటిక్ ఎమర్జెన్సీ బ్రేకింగ్, 360-డిగ్రీ కెమెరా, పార్కింగ్ అసిస్ట్, రియర్ వ్యూ కెమెరా వంటి అనేక ఆధునిక భద్రతా ఫీచర్లు ఉన్నాయి. ఇంజన్ పరంగా, ఈ SUV మూడు ఆప్షన్‌లతో వస్తుంది. 1.0 లీటర్ టర్బో పెట్రోల్ (100 PS), 1.3 లీటర్ టర్బో పెట్రోల్ (163 PS) మాన్యువల్, DCT ట్రాన్స్‌మిషన్‌లతో లభిస్తాయి.

అదనంగా, త్వరలో 1.8 లీటర్ స్ట్రాంగ్ హైబ్రిడ్ వెర్షన్ కూడా రానుంది. ధర విషయానికి వస్తే, రెనాల్ట్ డస్టర్ ఎస్‌యూవీ ప్రారంభ ధర సుమారు రూ.10.49 లక్షల నుంచి మొదలై, టాప్ వేరియంట్ ధర రూ.17.19 లక్షల వరకు ఉంటుంది. మొత్తంగా, మంచి భద్రత, శక్తివంతమైన ఇంజన్లు, సరసమైన ధరతో ఇది మంచి ఎంపికగా నిలుస్తోంది.