కొత్త కారు కొంటున్నారా? ఇండియన్ మార్కెట్లోకి త్వరలోనే 3 అదిరిపోయే మిడ్-సైజ్ ఎస్‌యూవీలు

భారతీయ ఆటోమొబైల్ రంగానికి ఈ ఏడాది 2026 ప్రారంభం అత్యంత అద్భుతంగా సత్ఫలితాలను ఇచ్చింది. ముఖ్యంగా దేశంలో విపరీతమైన క్రేజ్ ఉన్న మిడ్-సైజ్ ఎస్‌యూవీ (Mid-Size SUV) సెగ్మెంట్‌లో మొదటి ఆరు నెలల్లోనే ఒకదానిని మించి ఒకటి ఏకంగా ఆరు సరికొత్త వాహనాలు మార్కెట్లోకి అడుగుపెట్టాయి. ఇందులో ఆల్-న్యూ కియా సెల్టోస్, న్యూ స్కోడా కుషాక్, ఆల్-న్యూ రెనో డస్టర్, మారుతి ఈ విటారా, న్యూ ఫాక్స్‌వ్యాగన్ టైగూన్, టయోటా అర్బన్ క్రూయిజర్ ఎబెల్లా వంటి పవర్‌ఫుల్ కార్లు ఉన్నాయి. అయితే, అసలు సినిమా ఇంకా ముందుంది. ఈ ఏడాది సెకండ్ హాఫ్‌లో కూడా ఇదే వేగాన్ని కొనసాగిస్తూ మరో మూడు సరికొత్త మైండ్ బ్లోయింగ్ ఎస్‌యూవీలు మార్కెట్లో రచ్చ చేయడానికి సిద్ధమవుతున్నాయి.

కొత్త అవతారంలో టాటా సియెర్రా ఈవీ
స్వదేశీ దిగ్గజం టాటా మోటార్స్ తన ఐకానిక్ కారు సియెర్రాను సరికొత్త ఎలక్ట్రిక్ అవతారంలో తిరిగి మార్కెట్లోకి ప్రవేశపెడుతోంది. టాటా సియెర్రా ఈవీ (Tata Sierra EV) పేరుతో రాబోతున్న ఈ పవర్‌ఫుల్ ఎలక్ట్రిక్ కారును జూన్ 30వ తేదీన కంపెనీ అధికారికంగా ప్రపంచానికి పరిచయం చేయనుంది. అనంతరం జూలై నెలలో దీని లాంచ్ ఉండే అవకాశం ఉంది.

అడ్వెంచర్ ప్రయాణాలను ఇష్టపడే వారి కోసం ఈ కారును రేర్-వీల్ డ్రైవ్ (RWD), ఆల్-వీల్ డ్రైవ్ (AWD) ఆప్షన్లలో తీసుకువస్తున్నారు. దీని ఫ్రంట్ డిజైన్ చాలా ప్రీమియం, పాలిష్‌గా ఉండబోతోంది. ప్రయాణంలో కుదుపులు లేకుండా కంఫర్ట్‌గా ఉండటం కోసం ఇందులో ప్రత్యేకమైన ఇండిపెండెంట్ రేర్ సస్పెన్షన్ సిస్టమ్‌ను అమర్చారు.

టెరానో ప్లేస్‌లో వస్తున్న సరికొత్త నిస్సాన్ టెక్టాన్
నిస్సాన్ కార్లను ఇష్టపడే కస్టమర్లకు కూడా జూలై నెల చాలా స్పెషల్ కానుంది. ఎందుకంటే, గతంలో మంచి పాపులారిటీ సంపాదించిన టెరానో కారుకు సక్సెసర్‌గా కంపెనీ నిస్సాన్ టెక్టాన్ (Nissan Tecton)ను లాంచ్ చేయబోతోంది. ఈ కారు సరికొత్త రెనో డస్టర్ ప్లాట్‌ఫామ్, ఇంజన్, గేర్‌బాక్స్ ఆధారంగానే రూపొందుతోంది.

అయితే, భారతీయ వినియోగదారుల టేస్ట్‌కు తగ్గట్టుగా ఇందులో ఎన్నో మార్పులు చేర్పులు చేశారు. దీని బాడీ షేప్ డస్టర్ లాగే ఉన్నప్పటికీ, డిజైన్ పరంగా చాలా షార్ప్ మరియు ఎలిగెంట్ లుక్‌తో రానుంది. వచ్చే ఏడాది 2027 ప్రారంభం నాటికి ఇందులో ఒక హైబ్రిడ్ వేరియంట్‌ను కూడా తీసుకురావడానికి కంపెనీ ప్లాన్ చేస్తోంది.

న్యూ హోండా ఎలివేట్
ఇక దేశంలో పండుగ సీజన్ ప్రారంభమయ్యే ఆగస్టు లేదా సెప్టెంబర్ నెలల్లో హోండా సంస్థ తన పాపులర్ కారు ఎలివేట్‌కు సరికొత్త ఫేస్‌లిఫ్ట్ వెర్షన్‌ను లాంచ్ చేయడానికి రెడీ అవుతోంది. ఈ న్యూ హోండా ఎలివేట్ (New Honda Elevate) కారుకు సరికొత్త ఫ్రెష్ లుక్ ఇవ్వడం కోసం రీడిజైన్ చేసిన హెడ్‌లైట్లు, కొత్త స్టైల్ బంపర్లు, మారిన టెయిల్ లైట్లు, సరికొత్త అలాయ్ వీల్స్‌ను అమర్చనున్నారు.

కారు లోపలి డిజైన్‌లో పెద్దగా మార్పులు లేకపోయినప్పటికీ.. ఫీచర్ల పరంగా మాత్రం మునుపటి కంటే చాలా పవర్‌ఫుల్‌గా ఉండబోతోంది. కస్టమర్ల కోరిక మేరకు ఇందులో పనోరమిక్ సన్‌రూఫ్, వెంటీలేటెడ్ ఫ్రంట్ సీట్లు, సేఫ్టీ కోసం 360 డిగ్రీల కెమెరా వంటి అప్‌డేటెడ్ ఫీచర్లను ఇస్తున్నారు. అయితే, దీని నమ్మకమైన 1.5 లీటర్ పెట్రోల్ ఇంజన్ మాత్రం మునుపటిలాగే కొనసాగనుంది.