ఎండలు మండిపోతున్నా లోపల చల్లగా ఉండాలా? రూ.15 లక్షల బడ్జెట్లో వెంటిలేటెడ్ సీట్ కార్లు ఇవే

మారుతున్న కాలానికి అనుగుణంగా ఆధునిక కార్లలో సరికొత్త ఫీచర్లు అందుబాటులోకి వస్తున్నాయి. అందులో అత్యంత ప్రజాదరణ పొందుతున్న లగ్జరీ ఫీచరే వెంటిలేటెడ్ సీట్లు (Ventilated Seats). ముఖ్యంగా భారతదేశం లాంటి విపరీతమైన వేసవి ఎండలు ఉండే దేశంలో ఈ ఫీచర్ కార్ల ప్రయాణాన్ని ఎంతో హాయిగా మరియు సౌకర్యవంతంగా మారుస్తుంది.

ఒకప్పుడు కేవలం కోట్ల విలువైన లగ్జరీ లేదా ప్రీమియం కార్లలో మాత్రమే కనిపించే ఈ అద్భుతమైన సదుపాయం, ఇప్పుడు సామాన్యుల ప్రజల బడ్జెట్ కార్లలోనూ అందుబాటులోకి వచ్చింది. రూ.15 లక్షల లోపు ధరలో వెంటిలేటెడ్ సీట్లను ఆఫర్ చేస్తున్న నాలుగు బెస్ట్ ఎస్‌యూవీల వివరాలు చూద్దాం.

రెనాల్ట్ కైగర్ (Renault Kiger)
ఈ లిస్టులో అన్నింటికంటే మొదటి స్థానంలో నిలిచింది ఫ్రెంచ్ కార్ల తయారీ సంస్థకు చెందిన రెనాల్ట్ కైగర్. మన దేశంలో వెంటిలేటెడ్ ఫ్రంట్ సీట్లతో లభిస్తున్న అత్యంత చౌకైన కార్లలో కైగర్ ఒకటి. ఇది తన అద్భుతమైన స్పోర్టీ డిజైన్, మంచి ఫీచర్లు, మైలేజ్ పరంగా కాంపాక్ట్ ఎస్‌యూవీ సెగ్మెంట్‌లో మంచి గుర్తింపు తెచ్చుకుంది.

కంపెనీ తన కైగర్ ఎమోషన్ వేరియంట్ నుంచి ఈ వెంటిలేటెడ్ సీట్ల ఫీచర్‌ను అందిస్తోంది. ముంబై మార్కెట్ లెక్కల ప్రకారం ఈ వేరియంట్ ఆన్-రోడ్ ధర సుమారు రూ.9.51 లక్షలుగా ఉంది. తక్కువ బడ్జెట్లో లగ్జరీ ఫీచర్ కావాలనుకునే వారికి ఇది బెస్ట్ ఆప్షన్.

టాటా పంచ్ ఈవీ (Tata Punch EV)
భారతీయ దిగ్గజ ఆటోమొబైల్ సంస్థ టాటా మోటార్స్ తన పాపులర్ మైక్రో ఎస్‌యూవీ పంచ్ ఈవీని సరికొత్త అప్‌డేట్స్, అధునాతన బ్యాటరీ ప్యాక్‌తో మార్కెట్లోకి తీసుకొచ్చింది. ఇది పర్యావరణ అనుకూల ప్రయాణంతో పాటు అద్భుతమైన డ్రైవింగ్ రేంజ్‌ను ఇస్తుంది.

ఫీచర్ల విషయానికి వస్తే, టాటా పంచ్ ఈవీలో వెంటిలేటెడ్ సీట్ల సదుపాయాన్ని దీని టాప్ వేరియంట్ అయిన ఎంపవర్డ్ ప్లస్ ఎస్ (Empowered Plus S)లో పొందుపరిచారు. ముంబైలో దీని ఆన్-రోడ్ ధర దాదాపు రూ. 13.44 లక్షలుగా ఉంది. వాల్యూ ఫర్ మనీ ప్యాకేజీలో ఈవీ కార్ కొనాలనుకునే వారికి ఇది పర్ఫెక్ట్ ఛాయిస్.

స్కోడా కైలాక్ (Skoda Kylaq)
ప్రముఖ లగ్జరీ కార్ల బ్రాండ్ స్కోడా నుంచి భారత మార్కెట్లోకి వచ్చిన అత్యంత చౌకైన, పవర్‌ఫుల్ ఎస్‌యూవీ కైలాక్. తన అద్భుతమైన హ్యాండ్లింగ్, పవర్‌ఫుల్ ఇంజన్ పర్ఫార్మెన్స్ కారణంగా ఈ కారు యూత్ లో మంచి క్రేజ్ సంపాదించుకుంది.

స్కోడా కంపెనీ ఈ కారులోని ప్రెస్టీజ్ (Prestige) వేరియంట్ నుంచి వెంటిలేటెడ్ సీట్లను అందిస్తోంది. ముంబైలో దీని ప్రారంభ ఆన్-రోడ్ ధర సుమారు రూ. 13.56 లక్షల నుంచి అందుబాటులో ఉంది. ప్రీమియం డ్రైవింగ్ ఎక్స్‌పీరియన్స్ తో పాటు కంఫర్ట్ కోరుకునే వారికి ఇది సరైన కారు.

సిట్రోయెన్ ఎయిర్‌క్రాస్ ఎక్స్ (Citroen Aircross X)
ఈ లిస్టులో ఉన్న అన్ని కార్ల కంటే సిట్రోయెన్ ఎయిర్‌క్రాస్ ఎక్స్ అత్యంత ప్రత్యేకమైనదిగా నిలిచింది. ఎందుకంటే, తన సెగ్మెంట్‌లోనే బేస్ వేరియంట్ (ప్రారంభ మోడల్) నుంచే వెంటిలేటెడ్ సీట్ల ఫీచర్‌ను అందిస్తున్న ఏకైక ఎస్‌యూవీ ఇదే కావడం విశేషం.

దీనివల్ల కస్టమర్లు కేవలం ఈ ఒక్క ఫీచర్ కోసం ఎక్కువ డబ్బులు పెట్టి టాప్ వేరియంట్లు కొనాల్సిన అవసరం లేదు. ముంబైలో దీని ప్రారంభ ఆన్-రోడ్ ధర సుమారు రూ.10.11 లక్షలుగా ఉంది. తక్కువ ధరలో ఎక్కువ స్పేస్, లగ్జరీ ఫీచర్లు ఆశించే వారికి ఎయిర్‌క్రాస్ ఎక్స్ ఒక మైండ్ బ్లోయింగ్ ఆప్షన్.