లీటరుకు 26కిమీ మైలేజ్.. ఇంట్లో ఉన్న 7గురు ఒకేసారి హ్యాపీగా జర్నీ చేసే 5 అదిరిపోయే కార్లు ఇవే

సెలవులు వచ్చాయంటే చాలు.. భార్యాపిల్లలు, అమ్మానాన్నలతో కలిసి హ్యాపీగా ట్రిప్స్ వేయడంలో ఉండే మజాయే వేరు. ఒక మంచి ఫ్యామిలీ కారు అంటే కేవలం సీట్లు ఉండటం కాదు.. ప్రయాణంలో పెద్దలు, పిల్లలకు అలసట లేకుండా లగ్జరీగా కూర్చునేలా ఉండాలి. ప్రస్తుతం భారత ఆటోమొబైల్ మార్కెట్లో ఎన్నో రకాల వాహనాలు ఉన్నప్పటికీ.. దేశీయ కుటుంబాల అవసరాలను తీరుస్తూ అమ్మకాల్లో టాప్ గేర్‌లో దూసుకెళ్తున్న 5 మోస్ట్ పాపులర్ 7-సీటర్ కార్ల (Best 7 Seater Cars) వివరాలను, వాటి మైలేజ్, ధరల గురించి తెలుసుకుందాం.

1. టయోటా ఇన్నోవా (Toyota Innova):
భారతదేశంలో పెద్ద ఫ్యామిలీ కార్ల సామ్రాజ్యంలో టయోటా ఇన్నోవాకు సాటి వచ్చే కారే లేదు. లాంగ్ ట్రిప్స్ వేసేటప్పుడు దీని లగ్జరీ క్యాప్టెన్ సీట్లలో కూర్చుంటే అసలు అలసట అనేదే తెలియదు. కారు ఎక్కడం, దిగడం వృద్ధులకు చాలా సులభంగా ఉంటుంది. ఈ కారు ప్రారంభ ధర రూ.19.99 లక్షలుగా ఉంది. ఇందులోని అడ్వాన్స్‌డ్ స్ట్రాంగ్ హైబ్రిడ్ మోడల్ లీటరుకు ఏకంగా 23 కిలోమీటర్ల మైండ్ బ్లాకింగ్ మైలేజ్‌ను అందిస్తుంది.

2. మారుతి సుజుకి ఎర్టిగా (Maruti Suzuki Ertiga):
బడ్జెట్ ధరలో అత్యుత్తమ మైలేజ్, ఎక్కువ స్థలాన్ని కోరుకునే సామాన్య భారతీయ కుటుంబాల మొదటి ఛాయిస్ మారుతి ఎర్టిగా. దేశంలోనే అత్యధికంగా అమ్ముడవుతున్న 7-సీటర్ కారుగా ఇది సరికొత్త రికార్డు సృష్టించింది. దీని ప్రారంభ ధర కేవలం రూ.8.69 లక్షలు మాత్రమే. ఇక మైలేజ్ విషయానికి వస్తే, దీని సీఎన్‌జీ (CNG) వేరియంట్ కేజీకి ఏకంగా 26.11 కిలోమీటర్ల మైలేజ్ ఇస్తూ జేబుకు అస్సలు భారం పడకుండా చూస్తుంది.

3. టాటా సఫారి (Tata Safari):
మీకు మైలేజ్ కంటే మీ ఫ్యామిలీ ప్రాణాల రక్షణే అత్యంత ముఖ్యం అనుకుంటే మాత్రం టాటా సఫారిని మించిన కారు లేదు. గ్లోబల్ NCAP క్రాష్ టెస్ట్‌లో 5-స్టార్ రేటింగ్ సాధించిన ఈ ఎస్‌యూవీ లోపల క్యాబిన్ చాలా విశాలంగా, రాయల్ లుక్‌తో ఉంటుంది. దీని ప్రారంభ ధర రూ.16.19 లక్షలుగా ఉంది. ఇందులోని పవర్‌ఫుల్ డీజిల్ ఇంజన్ లీటరుకు దాదాపు 16 కిలోమీటర్ల వరకు మైలేజ్ ఇస్తుంది.

4. మహింద్రా XUV 7XO (Mahindra XUV 7XO):
స్టైలిష్ లుక్, ఆధునిక టెక్నాలజీతో పాటు పవర్‌ఫుల్ రోడ్ ప్రెజెన్స్ కావాలనుకునే వారికి ఈ కొత్త ఎస్‌యూవీ పర్ఫెక్ట్ ఆప్షన్. ఇది 6, 7 సీట్ల కాన్ఫిగరేషన్లలో లభిస్తుంది. ఇందులో ప్రయాణాన్ని ఎంజాయ్ చేయడానికి భారీ స్మార్ట్ ఫీచర్లు ఉన్నాయి. దీని ప్రారంభ ధర రూ.13.99 లక్షలుగా ఉంది. కారు వేరియంట్‌ను బట్టి ఇది లీటరుకు 13 నుంచి 17 కిలోమీటర్ల వరకు మైలేజ్ ఇస్తుంది.

5. కియా క్యారెన్స్ (Kia Carens):
ఈ మధ్య కాలంలో ఆధునిక యువతను, పెద్ద కుటుంబాలను విపరీతంగా ఆకట్టుకుంటున్న కారు కియా క్యారెన్స్. దీని ప్రీమియం ఇంటీరియర్ లుక్ విమానంలో ప్రయాణిస్తున్న ఫీలింగ్‌ను ఇస్తుంది. సేఫ్టీ కోసం ఇందులో బేస్ మోడల్ నుండే 6 ఎయిర్‌బ్యాగ్‌లను స్టాండర్డ్‌గా ఇచ్చారు. దీని ప్రారంభ ధర రూ.10.50 లక్షలుగా ఉంది. దీని సీఎన్‌జీ మోడల్ కేజీకి 22 నుంచి 24 కిలోమీటర్ల అద్భుతమైన మైలేజ్ ఇస్తుంది.