దేశంలోనే అత్యధిక మైలేజ్ ఇచ్చే కార్లు.. రూ.4.81 లక్షల నుంచి స్టార్ట్! నెలకు వేల రూపాయలు ఆదా!

పెట్రోల్, డీజిల్ ధరలు రోజురోజుకూ పెరుగుతున్న నేపథ్యంలో, ప్రతి కుటుంబం తమ నెలవారీ ఖర్చులను తగ్గించుకునే మార్గాలను వెతుకుతోంది. ఈ పరిస్థితుల్లో, తక్కువ ఖర్చుతో ఎక్కువ మైలేజ్ ఇచ్చే కార్లపై ఆసక్తి సహజంగానే పెరుగుతోంది. ముఖ్యంగా పేద, మధ్యతరగతి వినియోగదారులకు ఇంధన వ్యయం తగ్గించడం ఇప్పుడు ప్రధాన లక్ష్యంగా మారింది. అదృష్టవశాత్తూ, 2026లో భారత మార్కెట్లో ఇంధన సామర్థ్యం ఎక్కువగా ఉండే పలు కార్లు అందుబాటులో ఉన్నాయి. ఈ కార్లు కేవలం మైలేజ్ పరంగానే కాకుండా, పనితీరు, నమ్మకంలో కూడా మంచి స్థాయిని అందిస్తున్నాయి. ముఖ్యంగా సీఎన్‌జీ (CNG) ఆప్షన్ ఉన్న మోడల్స్ వినియోగదారులకు భారీ ఆదా కలిగిస్తున్నాయి.ఈ జాబితాలో ముందుగా చెప్పుకోవాల్సిన మోడల్స్‌లో మారుతి సెలెరియో, వ్యాగన్ ఆర్, ఆల్టో K10, స్విఫ్ట్ కార్లు బెస్ట్. వీటి గురించి ఈ కథనంలో చూద్దాం.

Maruti Suzuki Celerio CNG: భారత మార్కెట్లో ఇంధన సామర్థ్యానికి ప్రతీకగా నిలుస్తున్న కార్లలో మారుతి సుజుకి సెలెరియో సీఎన్‌జీ ప్రత్యేక స్థానం సంపాదించుకుంది. ప్రస్తుతం అందుబాటులో ఉన్న అత్యంత మైలేజ్ ఇచ్చే కార్లలో ఇదొకటి కావడం ప్రధాన హైలైట్. ఈ కారులో ఉన్న 'నెక్స్ట్-జెన్' K-సిరీస్ ఇంజన్, ఇంధన వినియోగాన్ని అత్యంత సమర్థవంతంగా నిర్వహించేలా రూపొందించబడింది. ఇది ఒక్క కిలో CNGతోనే సుమారు 34.43 కి.మీ మైలేజ్ ఇవ్వగలగదు.

పెరుగుతున్న ఇంధన ధరల నేపథ్యంలో ఇది వినియోగదారులకు గణనీయమైన ఆదాను అందిస్తుంది. ధర విషయానికి వస్తే, రూ. 5,97,900 నుండి ప్రారంభమవడం వల్ల బడ్జెట్ సెగ్మెంట్‌లో ఇది చాలా ఆకర్షణీయమైన ఎంపికగా నిలుస్తోంది. తక్కువ ధరలోనే ఎక్కువ మైలేజ్ అందించడం దీని ప్రత్యేకత. అదే సమయంలో భద్రత విషయంలో కూడా ఈ కారు తగ్గిపోలేదు. ఫీచర్లతో పాటు 6 ఎయిర్‌బ్యాగ్‌లు అందించడం ద్వారా డ్రైవర్, ప్రయాణికులకు మెరుగైన రక్షణను కల్పిస్తోంది.

Maruti Suzuki Swift CNG: స్టైలిష్ డిజైన్, స్పోర్టీ ఫీల్‌తో ఎప్పుడూ యువతను ఆకట్టుకుంటూ వచ్చిన మారుతి సుజుకి స్విఫ్ట్ ఇప్పుడు CNG వేరియంట్‌లో మరింత ప్రాక్టికల్ ఎంపికగా మారింది. కొత్తగా అప్‌డేట్ చేసిన Z-సిరీస్ ఇంజన్‌తో ఇది ఇంధన సామర్థ్యాన్ని గణనీయంగా పెంచుతూ, పనితీరులో కూడా మంచి బ్యాలెన్స్‌ను అందిస్తోంది. సాధారణంగా మైలేజ్ కార్ అంటే స్టైల్ తగ్గిపోతుంది అనే భావనను ఈ కారు పూర్తిగా మార్చేస్తుంది.

స్పోర్టీ లుక్స్, డ్రైవింగ్ ఫన్‌ను ఆస్వాదిస్తూ కూడా ఇంధన ఖర్చును తగ్గించుకోవాలనుకునే వారికి ఇది సరైన ఎంపికగా నిలుస్తోంది. ఇది ఒక్క కిలో CNGతో సుమారు 32.85 కి.మీ మైలేజ్ ఇవ్వగలదని కంపెనీ ప్రకటించడం గమనార్హం. అంటే, రోజువారీ ప్రయాణాల్లో ఖర్చును గణనీయంగా తగ్గించుకోవచ్చు. ధర విషయానికి వస్తే, CNG వేరియంట్ రూ.7,44,900 నుండి ప్రారంభమవడం వల్ల ఇది బడ్జెట్‌కు కూడా సరిపోయేలా ఉంటుంది.

Maruti Suzuki Wagon R CNG: మారుతి సుజుకి వ్యాగన్ ఆర్ 1.0-లీటర్ CNG వేరియంట్ తక్కువ ఖర్చుతో ఎక్కువ ప్రయాణం చేయాలనుకునే వారికి అద్భుతమైన ఎంపికగా నిలుస్తోంది. కంపెనీ ప్రకారం ఇది సుమారు 34.05 కి.మీ/కేజీ వరకు మైలేజ్ ఇస్తుంది. ధర విషయానికి వస్తే, ఈ కారు రూ.5,88,900 నుండి ప్రారంభమవడం వల్ల బడ్జెట్ సెగ్మెంట్‌లో ఇది మరింత ఆకర్షణీయంగా మారింది.

Maruti Suzuki Alto K10 CNG: మొదటిసారి కారు కొనాలనుకునే వారికి సరైన బడ్జెట్ ఆప్షన్‌గా నిలిచే మోడల్‌లలో ఆల్టో K10 CNG ప్రత్యేక స్థానం సంపాదించింది. ధర విషయానికి వస్తే, ఈ కారు కేవలం రూ.4,81,900 నుండి ప్రారంభమవడం దీని ప్రధాన ఆకర్షణ. ఇది ఒక్క కిలో CNGతో సుమారు 33.85 కి.మీ మైలేజ్ ఇవ్వగలదని కంపెనీ పేర్కొనడం గమనార్హం. ఇది రోజువారీ ప్రయాణాల్లో ఖర్చును గణనీయంగా తగ్గిస్తుంది.