డబ్బున్నోళ్లకు కొత్త ఆటబొమ్మ వచ్చేసింది.. ఈ కారు కొనాలంటే బడ్జెట్ కోటి పైనే ఉండాలి

ప్రముఖ లగ్జరీ కార్ల తయారీ సంస్థ బీఎమ్‌డబ్ల్యూ గ్రూప్ ఇండియా, దేశీయ మార్కెట్లోకి సరికొత్త పవర్‌ఫుల్ స్పోర్ట్స్ యాక్టివిటీ కూపే (SAC) మోడల్ బీఎమ్‌డబ్ల్యూ ఎక్స్6 ఎమ్60ఐ ఎక్స్‌డ్రైవ్(BMW X6 M60i xDrive)ను అధికారికంగా విడుదల చేసింది. లగ్జరీ ప్రయాణాన్ని ఇష్టపడే వారితో పాటు, అత్యంత వేగవంతమైన పర్ఫార్మెన్స్‌ను కోరుకునే కార్ లవర్స్ కోసం ఈ కారును ప్రత్యేకంగా డిజైన్ చేశారు. ఈ సరికొత్త మోడల్ నేటి నుంచి దేశవ్యాప్తంగా కంప్లీట్లీ బిల్ట్-అప్ యూనిట్ (CBU) రూపంలో, అంటే విదేశాల నుంచి నేరుగా దిగుమతి చేసుకుని ఇక్కడ విక్రయించనుంది.

ధర, అదిరిపోయే బైబ్యాక్ ఫైనాన్స్ ప్లాన్
భారత మార్కెట్లో ఈ సరికొత్త లగ్జరీ కారు ఎక్స్-షోరూమ్ ధరను రూ.1,77,90,000గా నిర్ణయించారు. వినియోగదారుల సౌకర్యార్థం బీఎమ్‌డబ్ల్యూ ఇండియా ఫైనాన్షియల్ సర్వీసెస్ ద్వారా ఒక క్రేజీ స్మార్ట్ ఫైనాన్స్ ఆఫర్‌ను కంపెనీ ప్రకటించింది. ఈ ప్లాన్ కింద కారును కొనుగోలు చేసే కస్టమర్లకు 3 సంవత్సరాలు లేదా 10,000 కిలోమీటర్ల తర్వాత ఏకంగా 60 శాతం అష్యూర్డ్ బైబ్యాక్ గ్యారెంటీని ఇస్తోంది. అంటే 3 ఏళ్ల తర్వాత కారును తిరిగి ఇచ్చేసి 60 శాతం డబ్బును గ్యారెంటీగా వెనక్కి తీసుకోవచ్చు.

సింహం లాంటి రోడ్ ప్రెజెన్స్, డిజైన్
ఈ కొత్త బీఎమ్‌డబ్ల్యూ ఎక్స్6 మజిక్యులర్ స్టాన్స్‌తో రోడ్డుపై వెళ్తుంటే ఒక సింహంలా కనిపిస్తుంది. దీని లాంగ్ స్వింగింగ్ రూఫ్‌లైన్, షార్ప్ లైన్స్ కారుకు ఒక అద్భుతమైన కూపే రూపాన్ని ఇస్తాయి. ముందు భాగంలో బాణం గుర్తు లాంటి డేటైమ్ రన్నింగ్ లైట్లతో కూడిన స్లిమ్ అడాప్టివ్ ఎల్‌ఈడీ హెడ్‌లైట్స్, మ్యాట్ బ్లాక్ కలర్ వర్టికల్ డబుల్ రిబ్స్ గల కిడ్నీ గ్రిల్, ఐకానిక్ M లోగో ఈ కారుకు అగ్రెసివ్ లుక్‌ను ఇస్తాయి. కారు వెనుక భాగంలో ఎల్‌-షేప్ ఎల్‌ఈడీ లైట్లు, బ్లాక్ హై-గ్లాస్ రియర్ స్పాయిలర్ దీని స్పోర్టీ క్యారెక్టర్‌ను ఎలివేట్ చేస్తున్నాయి. కారుకు ప్రాండ్‌గా 21-ఇంచుల ఎమ్ లైట్-అల్లాయ్ వీల్స్‌ను అమర్చారు.

రాకెట్ వేగంతో దూసుకెళ్లే పవర్‌ఫుల్ V8 ఇంజన్
ఈ కారు గుండెకాయ లాంటి ఇంజన్ విషయానికి వస్తే.. ఇందులో సరికొత్తగా అభివృద్ధి చేసిన 4.4-లీటర్ల పవర్‌ఫుల్ V8 పెట్రోల్ ఇంజన్‌ను వాడారు. ఈ ఇంజన్ రేసింగ్ ట్రాక్‌లపై దూసుకెళ్లే బీఎమ్‌డబ్ల్యూ ఎమ్ సిరీస్ రేస్ కార్ల జీన్స్‌తో తయారైంది. ఇది ఏకంగా 530 హార్స్‌పవర్ (hp) శక్తిని, 750 Nm గరిష్ట టార్క్‌ను ఉత్పత్తి చేస్తుంది. 8-స్పీడ్ స్టెప్‌ట్రానిక్ స్పోర్ట్ ఆటోమేటిక్ ట్రాన్స్‌మిషన్‌తో వచ్చే ఈ కారు, కేవలం 4.3 సెకన్లలోనే 0 నుంచి 100 కిలోమీటర్ల వేగాన్ని అందుకోగలదు. దీని టాప్ స్పీడు గంటకు 250 కిలోమీటర్లుగా ఉంది. ఇందులో ఉన్న 48V మైల్డ్ హైబ్రిడ్ బ్యాటరీ సిస్టమ్ కారు పర్ఫార్మెన్స్‌తో పాటు ఇంధన సామర్థ్యాన్ని కూడా పెంచుతుంది.

ఫ్యూచరిస్టిక్ డిజిటల్ కర్వ్‌డ్ డిస్‌ప్లే ఇంటీరియర్
కారు లోపలి భాగంలో అడుగుపెడితే ఒక సరికొత్త విలాసవంతమైన ప్రపంచం కనిపిస్తుంది. ఇంటీరియర్ మధ్యలో ఒకే ఒక గ్లాస్ ప్యానెల్ వెనుక అమర్చిన బీఎమ్‌డబ్ల్యూ కర్వ్‌డ్ డిస్‌ప్లే (BMW Curved Display) ప్రధాన ఆకర్షణగా నిలుస్తుంది. ఇందులో స్టీరింగ్ వెనుక 12.3-ఇంచుల డిజిటల్ ఇన్ఫర్మేషన్ స్క్రీన్, పక్కనే 14.9-ఇంచుల భారీ కంట్రోల్ డిస్‌ప్లే స్క్రీన్ ఉన్నాయి. ప్రీమియం సెన్సాఫిన్ లెదర్ ఫినిషింగ్, క్రిస్టల్ డిజైన్ ఎల్‌ఈడీ బ్యాక్‌లైటింగ్‌తో కూడిన అంబియంట్ లైట్ బార్ కారు క్యాబిన్‌కు అదనపు హుందాతనాన్ని తీసుకువచ్చాయి.

మసాజ్ సీట్లు, థియేటర్ లాంటి సౌండ్ సిస్టమ్
ఈ కారులో ప్రయాణించే వారికి అలసట తెలియకుండా ఉండేందుకు డ్రైవర్, ప్యాసింజర్ సీట్లకు ఏకంగా 8 రకాల ప్రోగ్రామ్స్, 3 రకాల ఇంటెన్సిటీ లెవెల్స్ ఉన్న మసాజ్ ఫంక్షన్‎ను అందించారు. ఈ సీట్లు వెంటిలేటెడ్, ఎలక్ట్రికల్ అడ్జస్ట్‌మెంట్ మెమరీ ఫంక్షన్‌తో వస్తాయి. కారు లోపల ప్రయాణిస్తున్నప్పుడు హోమ్ థియేటర్ ఫీల్ ఇచ్చేలా 16 స్పీకర్లు, 464-వాట్ యాంప్లిఫైర్ కలిగిన హర్మాన్ కార్డన్ సరౌండ్ సౌండ్ సిస్టమ్‌ను అమర్చారు. అలాగే సాఫ్ట్-క్లోజ్ డోర్స్ ఫీచర్ వల్ల డోర్లు చాలా స్మూత్‌గా లాక్ అవుతాయి.

అల్ట్రా మోడ్రన్ టెక్నాలజీ, అడ్వాన్స్‌డ్ సేఫ్టీ
టెక్నాలజీ పరంగా ఈ కారులో లేటెస్ట్ బీఎమ్‌డబ్ల్యూ ఆపరేటింగ్ సిస్టమ్ 8.5, ఇంటెలిజెంట్ పర్సనల్ అసిస్టెంట్ (వాయిస్ కంట్రోల్), డిజిటల్ కీ ప్లస్ (స్మార్ట్‌ఫోనే కారు కీ లాగా పనిచేస్తుంది), మైబీఎమ్‌డబ్ల్యూ యాప్ కనెక్టివిటీ ఉన్నాయి. డ్రైవింగ్ సులభతరం చేయడానికి 360-డిగ్రీ సరౌండ్ వ్యూతో కూడిన పార్కింగ్ అసిస్టెంట్ ప్రొఫెషనల్, కారును ఆటోమేటిక్‌గా వెనక్కి తెచ్చే రివర్సింగ్ అసిస్టెంట్ (చివరి 200 మీటర్ల రికార్డ్ ట్రాక్ చేస్తుంది) ఉన్నాయి. ఇక సేఫ్టీ కోసం 6 ఎయిర్‌బ్యాగ్‌లు, ఏబీఎస్, బ్రేక్ అసిస్ట్, డైనమిక్ స్టెబిలిటీ కంట్రోల్ (DSC), కార్నరింగ్ బ్రేక్ కంట్రోల్ (CBC), టైర్ ప్రెషర్ ఇండికేటర్ వంటి వరల్డ్ క్లాస్ సేఫ్టీ ఫీచర్లను బీఎమ్‌డబ్ల్యూ ఇందులో పొందుపరిచింది.