భారత్లోకి ఎంట్రీ ఇచ్చిన BYD లగ్జరీ బ్రాండ్ 'డెంజా'.. D9, Z9 GT కార్ల ధరలు, ఫీచర్లు ఇవే!
ప్రముఖ ఆటోమొబైల్ సంస్థ BYD తన లగ్జరీ బ్రాండ్ 'డెంజా' (Denza)ను ఈరోజు (నవంబర్ 13, 2026) భారత మార్కెట్లో అధికారికంగా పరిచయం చేస్తోంది. ఈ వేడుకలో 'D9 MPV', 'Z9 GT' మోడళ్లే ప్రధాన ఆకర్షణగా నిలవనున్నాయి. ఈ సందర్భంగా కంపెనీ వీటి ధరలతో పాటు బుకింగ్స్, డెలివరీ టైమ్లైన్ను కూడా ప్రకటించనుంది. దేశీయ లగ్జరీ విభాగంలో ఏకఛత్రాధిపత్యం చెలాయిస్తున్న టయోటా వెల్ఫైర్, లెక్సస్ LM తో పాటు ఇతర ప్రీమియం ఈవీలకు డెంజా గట్టి పోటీ ఇవ్వనుంది. భారత్ కోసం ప్రత్యేకంగా తీసుకొస్తున్న వేరియంట్లు, ఫీచర్ల వివరాలు మరికొద్దిసేపట్లో స్పష్టత రానున్నాయి.
బివైడికి చెందిన ప్రీమియం బ్రాండ్ డెంజా, అత్యంత విలాసవంతమైన ఇంటీరియర్స్, అత్యాధునిక టెక్నాలజీతో కూడిన క్యాబిన్తో అడుగుపెడుతోంది. భారత్లో బోణీ కొట్టేందుకు ఆల్-ఎలక్ట్రిక్ 'D9' లగ్జరీ పీపుల్ మూవర్, 'Z9 GT' షూటింగ్ బ్రేక్ మోడళ్లను సిద్ధం చేసింది. ఈవెంట్కు ముందే బివైడి వీటి టీజర్లను విడుదల చేసింది. విదేశాల్లో D9 మోడల్ హైబ్రిడ్, ఎలక్ట్రిక్ ఆప్షన్లలో లభిస్తున్నప్పటికీ, భారత్లో మాత్రం మొదట ఎలక్ట్రిక్ వేరియంట్నే లాంచ్ చేసే అవకాశాలు ఉన్నాయి.

డెంజా D9 MPV: ఇండియా వెర్షన్, లగ్జరీ ఫీచర్లు
గ్లోబల్ మార్కెట్లో లభించే D9 పొడవు 5,250 మిమీ ఉంటుంది. వెనుక సీట్లలో ప్రయాణించే వారికి అత్యంత కంఫర్ట్ ఇచ్చేలా దీనిని 6 లేదా 7 సీట్ల లేఅవుట్తో డిజైన్ చేశారు. ఇందులో లగ్జరీ కెప్టెన్ చైర్లు, సాఫ్ట్-టచ్ ఇంటీరియర్తో పాటు అడాప్టివ్ క్రూయిజ్ కంట్రోల్, లేన్ కీపింగ్, 360-డిగ్రీ కెమెరాతో కూడిన లెవెల్-2 ADAS ఫీచర్లు ఉన్నాయి. గ్లోబల్ ఎలక్ట్రిక్ D9 మోడల్లో 103.6kWh బ్లేడ్ బ్యాటరీని అందించారు. ఇది ఒక్కసారి ఛార్జ్ చేస్తే దాదాపు 600 కిమీ రేంజ్ ఇస్తుందని కంపెనీ చెబుతోంది. మన మార్కెట్కు రాబోయే వేరియంట్ల వివరాలపై ఈరోజు స్పష్టత రానుంది.
డెంజా Z9 GT: ఫ్లాష్ ఛార్జింగ్, పవర్ ఫుల్ పెర్ఫార్మెన్స్
పోర్షే తైకాన్, ఆడి ఇ-ట్రాన్ GT మోడళ్లకు పోటీగా Z9 GTని తీసుకొస్తున్నారు. విదేశీ వెర్షన్లో ఆప్షనల్ ట్రై-మోటార్ లేఅవుట్తో పాటు బివైడికి చెందిన ప్రత్యేక 'ఫ్లాష్ ఛార్జింగ్' సాంకేతికత అందించారు. అనుకూల పరిస్థితుల్లో 1.5MW ఛార్జర్ ద్వారా కేవలం 9 నిమిషాల్లోనే బ్యాటరీని 10 నుండి 97 శాతానికి ఛార్జ్ చేయవచ్చని సంస్థ పేర్కొంది. ప్రయాణంలో కంట్రోల్, కంఫర్ట్ సమన్వయం చేసేలా అడ్వాన్స్డ్ డ్రైవర్ అసిస్టెన్స్, హై-స్పీడ్ స్టెబిలిటీ ఫీచర్లను ఇందులో చేర్చనున్నారు.
ధరలు, బుకింగ్స్, CBU దిగుమతులు: ఈరోజు ఏం చూడబోతున్నాం?
లాంచ్ వేడుకలోనే అధికారిక ధరలతో పాటు బుకింగ్స్ ప్రక్రియ ప్రారంభం కానుంది. ప్రారంభంలో వీటిని CBU (విదేశాల నుంచి పూర్తిగా తయారు చేసిన వాహనాలు) రూపంలో దిగుమతి చేసుకోనున్నారు. దీనివల్ల ధర కాస్త ఎక్కువ ఉన్నప్పటికీ, కస్టమర్లకు త్వరగా డెలివరీలు ఇచ్చే అవకాశం ఉంటుంది. మార్కెట్ అంచనాల ప్రకారం, D9 ధర ఫీచర్లను బట్టి ₹85 లక్షల నుంచి ₹1.10 కోట్ల వరకు ఉండే ఛాన్స్ ఉంది. అనుమతుల ప్రక్రియ వేగంగా పూర్తయితే, 2027 ప్రారంభంలోనే మొదటి విడత డెలివరీలు షురూ కావచ్చు.
డీలర్ నెట్వర్క్, నగరాల్లో లభ్యత: ముంబై, ఢిల్లీ-ఎన్సీఆర్, బెంగళూరు, హైదరాబాద్
లాంచ్కు ముందే డెంజా ప్రముఖ నగరాల్లో డీలర్షిప్ భాగస్వామ్యాలను ఖరారు చేసుకుంది. ముంబైలో ల్యాండ్మార్క్, బెంగళూరు, హైదరాబాద్లలో EVM, దక్షిణ భారతదేశంలోని ఇతర ప్రధాన ప్రాంతాల్లో KUN నెట్వర్క్ ద్వారా మెట్రో నగరాల్లో టెస్ట్ డ్రైవ్లు త్వరలోనే అందుబాటులోకి రానున్నాయి. ఇప్పటికే బివైడికి మనదేశంలోని 32 నగరాల్లో 40 కి పైగా షోరూమ్లు ఉన్నాయి. దీంతో సర్వీస్, స్పేర్ పార్ట్స్ లభ్యత తేలిక కానుంది. టెస్ట్ డ్రైవ్ స్లాట్లు, బుకింగ్ అమౌంట్ వివరాల కోసం మీ నగరంలోని డీలర్ను ఈరోజే సంప్రదించవచ్చు.


Click it and Unblock the Notifications
