ఢిల్లీ వెళ్లే వారికి అలర్ట్! నవంబర్ 1 నుంచి BS6 వాహనాలకే ఎంట్రీ.. మీ కారు పరిస్థితి ఏంటి?

ఢిల్లీకి వెళ్తున్నారా? నవంబర్ 1 నుంచి BS6 వాహనాలకే ఎంట్రీ.. కార్ ఓనర్లు తెలుసుకోవాల్సిన పూర్తి వివరాలు ఇవే! నవంబర్ 1 నుంచి జనవరి 31 వరకు ఢిల్లీ సరిహద్దుల్లో అధికారులు కఠిన తనిఖీలు చేపట్టనున్నారు. వేరే రాష్ట్రాల్లో రిజిస్టర్ అయి, BS-VI ప్రమాణాలు లేని వాహనాలను ఢిల్లీలోకి అనుమతించకుండా వెనక్కి పంపేస్తున్నారు. ముఖ్యంగా నవంబర్ 6 నుంచి 14 వరకు ఉండే దీపావళి పండుగ వారంలో ఈ తనిఖీలు మరింత తీవ్రంగా ఉంటాయి. అందుకే భారీ చలానాలు, చివరి నిమిషంలో ట్రాఫిక్ మళ్లింపుల ఇబ్బందులు పడకుండా ఉండాలంటే మీ PUCC, RC, సంబంధిత పత్రాలను తప్పనిసరిగా దగ్గర ఉంచుకోండి.

సవరించిన గ్రేడెడ్ రెస్పాన్స్ యాక్షన్ ప్లాన్ (GRAP) అమలులో భాగంగా ఈ ఆంక్షలు విధించారు. వాయు నాణ్యత నిర్వహణ కమిషన్ (CAQM) సెప్టెంబర్ 28, 2026న వాహన నిబంధనలను మరింత కఠినతరం చేసింది. దీనిప్రకారం.. స్టేజ్ III ఆంక్షలు అమల్లోకి వస్తే ప్రధాన ఎన్‌సీఆర్ జిల్లాలతో పాటు సోనిపత్‌లోనూ లైట్ మోటార్ వాహనాల (LMV) నిషేధం వర్తిస్తుంది. స్టేజ్ III, IV లలో పాత సరుకు రవాణా వాహనాలకు ఉన్న మినహాయింపులను కూడా రద్దు చేశారు. మరొకవైపు ఎన్‌సీఆర్ వ్యాప్తంగా అక్టోబర్ 1 నుంచే "నో పియుసి, నో ఫ్యూయల్" (PUC లేకపోతే పెట్రోల్ పోయరు) నిబంధన కూడా అమల్లో ఉంది.

ఢిల్లీలో BS6 వాహనాలకే అనుమతి: తేదీలు, ప్రాంతాలు, మినహాయింపులు ఇవే

ఢిల్లీ సరిహద్దుల్లో నవంబర్ 1, 2026 నుంచి జనవరి 31, 2027 వరకు ఈ ప్రత్యేక తనిఖీలు నిరంతరాయంగా కొనసాగుతాయి. ఇతర రాష్ట్రాల నుంచి వచ్చే BS-VI కంటే తక్కువ కేటగిరీకి చెందిన పెట్రోల్, డీజిల్ వాహనాలకు ప్రవేశం ఉండదు. నిబంధనల ప్రకారం.. BS-VI, సిఎన్‌జి (CNG), ఎలక్ట్రిక్ వాహనాలకు మాత్రమే మినహాయింపు ఇచ్చారు. అంతర్‌రాష్ట్ర డీజిల్ బస్సులు ఖచ్చితంగా BS-VI ప్రమాణాలతోనే ఉండాలి. ఇక ఢిల్లీలోకి వెళ్లాల్సిన అవసరం లేని (నాన్-డెస్టినేషన్) ఇతర రాష్ట్రాల ట్రక్కులు బైపాస్ లేదా పెరిఫెరల్ ఎక్స్‌ప్రెస్‌వేలను ఉపయోగించుకోవాల్సి ఉంటుంది.

GRAP స్టేజ్ III/IV అమలులోకి వస్తే.. BS-III, BS-IV వాహనదారులకు తిప్పలే!

జీఆర్‌ఏపీ (GRAP) స్టేజ్ III లేదా IV అమలులోకి వచ్చినప్పుడు.. BS-III పెట్రోల్, BS-IV డీజిల్ లైట్ మోటార్ వాహనాలపై (LMV) సంపూర్ణ నిషేధం విధిస్తారు. ఈ ఆంక్షలు కేవలం ఢిల్లీలోనే కాకుండా గురుగ్రామ్, ఫరీదాబాద్, ఘాజియాబాద్, గౌతమ్ బుద్ధ నగర్, సోనిపత్ నగరాలకు కూడా వర్తిస్తాయి. బోర్డర్ల దగ్గరే కాకుండా నగరాల లోపల కూడా ఆర్టీఓ, పోలీస్ తనిఖీలు ఉంటాయి. మీ వాహనం ఈ కేటగిరీల్లో ఉంటే ప్రత్యామ్నాయ రవాణా మార్గాలను ఎంచుకోవడం లేదా మీ ప్రయాణాన్ని వాయిదా వేసుకోవడం మంచిది.

మీ వాహనం ఏ BS నిబంధన కిందికి వస్తుందో ఇలా వెంటనే సరిచూసుకోండి

మీ వాహనం ఏ బీఎస్ వర్షన్ పరిధిలోకి వస్తుందో తెలుసుకోవడానికి mParivahan యాప్ లేదా VAHAN పోర్టల్‌ ఓపెన్ చేసి వివరాలు నమోదు చేయండి. అందులో "Emission Norms," "Norms Type," లేదా "Bharat Stage" అని ఉన్న చోట పరిశీలించండి. మీ ఫిజికల్ ఆర్సీ (RC) కార్డుపై కూడా ఈ వివరాలు ఉంటాయి. అలాగే వాహన తయారీదారులు ఇచ్చే 'ఫారం 22' (Form 22) లోనూ సర్టిఫై చేసిన బీఎస్ ప్రమాణాలు నమోదై ఉంటాయి. ఇక BS-VI వాహనాలను సులభంగా గురించడానికి వాటి నంబర్ ప్లేట్‌పై ఆకుపచ్చని స్ట్రిప్ (Green strip) కూడా ఉంటుంది.

PUCC లేకపోతే పెట్రోల్ బంద్.. చలానాలు పడకుండా ఈ జాగ్రత్తలు తీసుకోండి

అక్టోబర్ 1 నుంచే ఎన్‌సీఆర్ పరిధిలోని పెట్రోల్ బంకుల్లో చెల్లుబాటు అయ్యే పాలుషన్ సర్టిఫికేట్ (PUCC) లేకపోతే ఇంధనం పోయకూడదనే నిబంధన అమల్లోకి వచ్చింది. కాబట్టి మీ PUCCని ముందే రెన్యూ చేసుకొని, దాని ప్రింట్ లేదా డిజిటల్ కాపీని వెంట ఉంచుకోండి. కాళింది కుంజ్ వంటి రద్దీ సరిహద్దు ప్రవేశ మార్గాల్లో విపరీతమైన తనిఖీలు ఉంటాయి కాబట్టి కొంచెం సమయం ముందే ప్రయాణం ప్రారంభించడం మేలు. మీది ఢిల్లీలోకి వెళ్లాల్సిన అవసరం లేని సరుకు రవాణా ట్రక్కు అయితే.. ఈస్టర్న్ లేదా వెస్టర్న్ పెరిఫెరల్ ఎక్స్‌ప్రెస్‌వే మీదుగా వెళ్లిపోవడం ఉత్తమం.

దీపావళి వారంలో డెలివరీలు, టెస్ట్ డ్రైవ్‌లు, ఇతర ప్రయాణాలు చేస్తున్నారా?

ఢిల్లీలోకి కొత్త కార్లను డెలివరీ చేసే డీలర్లు.. వాటిని BS-VI, CNG లేదా ఎలక్ట్రిక్ క్యారియర్ వాహనాల్లో మాత్రమే పంపించాలి. మార్గమధ్యంలో ఎలాంటి ఆటంకాలు ఎదురవ్వకుండా ఉండేందుకు క్యారియర్ ఎమిషన్ పత్రాలను సరిచూసుకోవడం ముఖ్యం. బోర్డర్లలో ఉన్న షోరూమ్‌ల అవుట్-ఆఫ్-ఢిల్లీ టెస్ట్ డ్రైవ్‌ల సమయాలు మారే అవకాశం ఉంది. ఒకవేళ మీరు సొంత వాహనంలో ఢిల్లీకి వెళ్తుంటే.. ఆర్సీలోని BS వివరాలను, PUCC వ్యాలిడిటీని ఒకటికి రెండుసార్లు చెక్ చేసుకోండి. ANPR కెమెరాల ద్వారా జరిగే తనిఖీల కోసం డిజిలాకర్ (DigiLocker) లో డాక్యుమెంట్లను సిద్ధంగా ఉంచుకోండి.