మైలేజీలో రారాజులు.. పవర్‌లో కింగ్‌లు.. త్వరలో రోడ్ల మీద రచ్చ చేయబోతున్న కొత్త SUVలు ఇవే

ప్రస్తుత ఆటోమొబైల్ ప్రపంచంలో ఎలక్ట్రిక్ కార్లు, హైబ్రిడ్ ఇంజిన్ల హడావుడి ఎంత ఉన్నా.. డీజిల్ కార్లకు ఉన్న క్రేజ్ మాత్రం అస్సలు తగ్గలేదు. ముఖ్యంగా ఎస్‌యూవీ (SUV) లవర్స్ ఇప్పటికీ డీజిల్ ఇంజిన్లకే ఓటు వేస్తున్నారు. దానికి కారణం లేకపోలేదు.. లాంగ్ జర్నీలు చేసేటప్పుడు ఇచ్చే మైలేజ్, ఆఫ్ రోడింగ్‌లో చూపించే పవర్, కొండ ప్రాంతాల్లో ఎక్కేటప్పుడు డీజిల్ ఇంజిన్ ఇచ్చే టార్క్ మరే ఇంజిన్ ఇవ్వలేదు. అందుకే దిగ్గజ కంపెనీలు తమ పవర్ ఫుల్ డీజిల్ మోడళ్లను సరికొత్త హంగులతో మార్కెట్లోకి తెస్తున్నాయి. రాబోయే రోజుల్లో భారత రోడ్లపై గర్జించబోతున్న ఆ 9 మోస్ట్ అవైటెడ్ డీజిల్ ఎస్‌యూవీల వివరాలు ఇక్కడ చూడండి.

1. మహీంద్రా స్కార్పియో-N ఫేస్‌లిఫ్ట్ (Mahindra Scorpio-N Facelift)
మహీంద్రా నుంచి వస్తున్న బిగ్ డాడీ ఎస్‌యూవీ స్కార్పియో-N ఇప్పుడు మరింత స్టైలిష్‌గా ముస్తాబవుతోంది. ఈ కొత్త ఫేస్‌లిఫ్ట్ వెర్షన్‌లో లోపల ఇంటీరియర్ పరంగా భారీ మార్పులు ఉండబోతున్నాయి. ముఖ్యంగా 10.25 అంగుళాల పెద్ద టచ్ స్క్రీన్ ఇన్ఫోటైన్‌మెంట్ సిస్టమ్, ఫుల్లీ డిజిటల్ ఇన్‌స్ట్రుమెంట్ క్లస్టర్, ఆకాశం మొత్తం కనిపించేలా పనోరమిక్ సన్‌రూఫ్ వంటి ప్రీమియం ఫీచర్లు యాడ్ అవుతున్నాయి. ఇంజిన్ విషయానికి వస్తే.. నమ్మకమైన 2.2 లీటర్ mHawk డీజిల్ ఇంజిన్ అదే పవర్‌తో కొనసాగుతుంది.

2. మహీంద్రా స్కార్పియో క్లాసిక్ ఫేస్‌లిఫ్ట్ (Mahindra Scorpio Classic Facelift)
పాతాళ భైరవి లాంటి రగ్డ్ లుక్ ఇష్టపడే వారికి స్కార్పియో క్లాసిక్ అంటే ప్రాణం. దీనిని కూడా మహీంద్రా అప్‌డేట్ చేస్తోంది. కొత్త గ్రిల్, రీడిజైన్ చేసిన బంపర్లతో ఇది మరింత రిఫ్రెష్‌గా కనిపిస్తుంది. ఇందులో 2.2 లీటర్ డీజిల్ ఇంజిన్‌తో పాటు 6-స్పీడ్ మాన్యువల్ గేర్‌బాక్స్ ఆప్షన్ ఉంటుంది. పాత కాలపు మజిల్ లుక్‌ను ఇష్టపడేవారికి ఇది బెస్ట్ ఛాయిస్.

3. కొత్త తరం టయోటా హైలక్స్ (New Gen Toyota Hilux)
టయోటా నుంచి వస్తున్న ఈ పిక్ అప్ ట్రక్ ఇప్పుడు మరింత స్మార్ట్‌గా మారుతోంది. వచ్చే ఏడాది వచ్చే ఈ మోడల్‌లో 48V మైల్డ్-హైబ్రిడ్ టెక్నాలజీని వాడుతున్నారు. దీనివల్ల మైలేజీ పెరగడమే కాకుండా పర్ఫార్మెన్స్ కూడా మెరుగుపడుతుంది. 2.8 లీటర్ ఇంజిన్ 204 PS పవర్, 500 Nm టార్క్‌ను ఉత్పత్తి చేస్తుంది. సేఫ్టీ కోసం ఇందులో లెవల్-2 ADAS ఫీచర్లను కూడా జత చేస్తున్నారు.

4. కొత్త టయోటా ఫార్చ్యూనర్ (New Gen Toyota Fortuner)
ఇండియన్ రోడ్లపై తిరుగులేని రాజుగా పేరున్న ఫార్చ్యూనర్ కూడా కొత్త లుక్‌లో రాబోతోంది. ఆకట్టుకునే ఫ్రంట్ ఎండ్, స్లీక్ ఎల్‌ఈడీ హెడ్ లైట్లు, మజిల్ గ్రిల్‌తో ఇది రాక్షస రూపాన్ని సంతరించుకుంటుంది. ఇందులో కూడా మైల్డ్-హైబ్రిడ్ డీజిల్ ఇంజిన్‌ను ప్రవేశపెడుతున్నారు. దీనివల్ల ఫార్చ్యూనర్ అంటే గుర్తొచ్చే భారీ ఇంధన ఖర్చు కొంచెం తగ్గే అవకాశం ఉంది.

5. హ్యుందాయ్ క్రెటా నెక్స్ట్ జనరేషన్ (Next-Gen Hyundai Creta)
2027 నాటికి వచ్చే ఈ కొత్త క్రెటా ఇప్పుడున్న దానికంటే పెద్దగా, మరింత సురక్షితంగా ఉండబోతోంది. ఇది కొత్త K3 ప్లాట్‌ఫారమ్‌పై రూపొందుతోంది. ఇందులో ప్రస్తుతం ఉన్న 1.5 లీటర్ U2 CRDi ఇంజిన్‌ను కొనసాగిస్తూనే, దానికి హైబ్రిడ్ ఆప్షన్‌ను కూడా ఇచ్చే ఆలోచనలో ఉంది హ్యుందాయ్. సెగ్మెంట్ లీడర్‌గా తన స్థానాన్ని పదిలం చేసుకోవడానికి ఇది సిద్ధమవుతోంది.

6. మహీంద్రా విజన్ S (Mahindra Vision S)
టాటా సియెర్రాకు గట్టి పోటీ ఇచ్చేందుకు మహీంద్రా విజన్ Sను రెడీ చేస్తోంది. దీని డిజైన్ చూడటానికి ల్యాండ్ రోవర్ డిఫెండర్‌ను పోలి ఉంటుందని వార్తలు వస్తున్నాయి. ఇందులో 1.5 లీటర్ టర్బో డీజిల్ ఇంజిన్‌ను అమర్చబోతున్నారు. ఆఫ్ రోడింగ్ కెపాసిటీ, అధునాతన టెక్నాలజీతో ఇది యువతను ఆకట్టుకోనుంది.

7. మహీంద్రా స్కార్పియో-N పిక్ అప్ (Mahindra Scorpio-N Pickup)
లైఫ్ స్టైల్ పిక్ అప్ ట్రక్ కావాలనుకునే వారికి ఇది ఒక గొప్ప ఆప్షన్. టయోటా హైలక్స్ కంటే తక్కువ ధరలో, 4x4 సిస్టమ్, 2.2 లీటర్ డీజిల్ ఇంజిన్‌తో ఇది వస్తోంది. దీని వెనుక భాగంలో పెద్ద ట్రక్ బెడ్ ఉంటుంది, ఇది సాహసయాత్రలు చేసేవారికి, ఎక్కువ సామాన్లు మోసే వారికి చాలా ఉపయోగపడుతుంది.

8. స్కోడా కోడియాక్ డీజిల్ (Skoda Kodiaq Diesel)
చాలా కాలం తర్వాత స్కోడా తన కోడియాక్ ఎస్‌యూవీలో డీజిల్ వెర్షన్‌ను మళ్ళీ తెస్తోంది. ఇందులో 2.0 లీటర్ TDI ఇంజిన్ ఉంటుంది, ఇది 190 bhp పవర్‌ను ఇస్తుంది. AWD (ఆల్ వీల్ డ్రైవ్) సిస్టమ్, RS థీమ్ లుక్‌తో ఇది లగ్జరీ, పవర్ కలయికలా ఉండబోతోంది. ఇది CBU (కంప్లీట్లీ బిల్ట్ యూనిట్) రూపంలో ఇండియాకు రానుంది.

9. ఎంజీ మెజెస్టర్ (MG Majester)
ఏప్రిల్ నెలలోనే మార్కెట్లోకి రాబోతున్న ఈ కారు డీజిల్ సెగ్మెంట్‌లో ఒక సంచలనం కానుంది. ఇందులో 2.0 లీటర్ ట్విన్-టర్బో డీజిల్ ఇంజిన్ ఉంది. ఇది 215 PS పవర్, 478 Nm భారీ టార్క్‌ను ఇస్తుంది. దాదాపు 10 ఆఫ్ రోడ్ మోడ్‌లు, లెవల్-2 ADAS వంటి అడ్వాన్సుడ్ ఫీచర్లతో ఇది లగ్జరీ ఎస్‌యూవీలకు గట్టి పోటీ ఇవ్వనుంది.