మారుతి బ్రెజా నుంచి టాటా సియెర్రా ఈవీ వరకు.. వచ్చే నెలలో కొత్త కార్ల జాతర.. బడ్జెట్ రెడీ చేస్కోండి

భారతీయ ఆటోమొబైల్ రంగంలో మే 2026 నెల సరికొత్త చరిత్రను సృష్టించబోతోంది. కార్ లవర్స్ ఎప్పుడెప్పుడా అని ఎదురుచూస్తున్న 5 అద్భుతమైన కార్లు వచ్చే నెలలో మార్కెట్లోకి ఎంట్రీ ఇవ్వడానికి సిద్ధంగా ఉన్నాయి. ఇందులో మారుతి సుజుకి నుంచి బ్రెజా ఫేస్‌లిఫ్ట్, టాటా మోటార్స్ నుంచి ఐకానిక్ సియెర్రా ఈవీ (Sierra EV), ఇంకా సెడాన్ విభాగంలో స్కోడా, ఫోక్స్‌వ్యాగన్ నుంచి సరికొత్త మోడల్స్ మెరవబోతున్నాయి. పెట్రోల్ కార్లతో పాటు ఎలక్ట్రిక్ వాహనాల (EV) జాతర కూడా వచ్చే నెలలో భారీగా ఉండబోతోంది.

1. మారుతి సుజుకి బ్రెజా ఫేస్‌లిఫ్ట్ (Maruti Suzuki Brezza Facelift):
భారతదేశంలో అత్యధికంగా అమ్ముడవుతున్న సబ్-కాంపాక్ట్ ఎస్‌యూవీ బ్రెజా ఇప్పుడు సరికొత్త హంగులతో రాబోతోంది. ఈ ఫేస్‌లిఫ్ట్ వెర్షన్‌లో ప్రధాన ఆకర్షణ దీని ఇంజన్. మారుతి ఫ్రాంక్స్ (Fronx)లో సక్సెస్ అయిన 1.0 లీటర్ బూస్టర్‌జెట్ టర్బో పెట్రోల్ ఇంజన్‌ను ఇప్పుడు బ్రెజాలో కూడా అందిస్తున్నారు. ఇది 100 బీహెచ్‌పీ పవర్, 147 ఎన్ఎమ్ టార్క్‌ను ఉత్పత్తి చేస్తుంది. అంతేకాకుండా, ఇందులో కొత్తగా 6-స్పీడ్ మాన్యువల్ గేర్‌బాక్స్ ఆప్షన్ రాబోతోంది. ఇది హైవేలపై కారు పర్ఫార్మెన్స్‌ను మార్చివేస్తుంది. ధర రూ.9 లక్షల నుంచి రూ.15 లక్షల మధ్య ఉండవచ్చని అంచనా.

2. టాటా సియెర్రా ఈవీ (Tata Sierra.ev):
90వ దశకంలో యువత కలల కారుగా ఉన్న సియెర్రా ఇప్పుడు ఎలక్ట్రిక్ అవతారంలో మళ్లీ రాబోతోంది. మే నెల మధ్యలో లాంచ్ కానున్న ఈ కారు కోసం దేశవ్యాప్తంగా భారీగా బుకింగ్స్ వస్తాయని టాటా మోటార్స్ ఆశిస్తోంది. ఇందులో 55 kWh, 65 kWh, 75 kWh బ్యాటరీ ప్యాక్ ఆప్షన్లు ఉండే అవకాశం ఉంది. ఒక్కసారి ఫుల్ ఛార్జ్ చేస్తే 450 నుంచి 550 కిలోమీటర్ల రేంజ్ ఇస్తుందని సమాచారం. దీని ధర రూ.20 లక్షల నుంచి రూ.30 లక్షల వరకు ఉండవచ్చు. పాత సియెర్రా సిగ్నేచర్ గ్లాస్ రూఫ్ ఈ మోడల్‌లో కూడా హైలైట్ కాబోతోంది.

3. ఫోక్స్‌వ్యాగన్ వర్టస్ ఫేస్‌లిఫ్ట్ (Volkswagen Virtus Facelift):
సెడాన్ కార్ల విభాగంలో రారాజుగా ఉన్న వర్టస్ ఇప్పుడు మరింత స్టైలిష్‌గా ముస్తాబవుతోంది. వచ్చే నెల చివర్లో లాంచ్ కానున్న ఈ ఫేస్‌లిఫ్ట్ వెర్షన్‌లో స్లీక్ హెడ్ ల్యాంప్స్, కనెక్టెడ్ లైట్ బార్, ఇల్యూమినేటెడ్ లోగో వంటి ఫీచర్లు ఉండబోతున్నాయి. ఇంజన్ పరంగా పెద్ద మార్పులు లేకపోయినా, పాత గేర్‌బాక్స్ స్థానంలో సరికొత్త 8-స్పీడ్ ఆటోమేటిక్ గేర్‌బాక్స్ రాబోతోంది. ఇది కారు నడపడంలో సరికొత్త అనుభూతిని ఇస్తుంది. దీని ధర రూ. 11 లక్షల నుండి రూ. 19 లక్షల వరకు ఉండే అవకాశం ఉంది.

4. స్కోడా స్లావియా ఫేస్‌లిఫ్ట్ (Skoda Slavia Facelift):
వర్టస్‌కు సోదరి వంటి స్కోడా స్లావియా కూడా మే నెలలో కొత్త అప్‌డేట్స్‌తో రాబోతోంది. దీని బయటి భాగంలో కొత్త ఫ్రంట్ బంపర్, ఎల్‌ఈడీ హెడ్‌లైట్స్, రిఫ్రెష్డ్ గ్రిల్ వంటి మార్పులు ఉన్నాయి. లోపల మాత్రం 10.25 అంగుళాల భారీ డిజిటల్ ఇన్‌స్ట్రుమెంట్ క్లస్టర్, రియర్ సీట్ మసాజర్, యాంబియంట్ లైటింగ్ వంటి లగ్జరీ ఫీచర్లు తోడవుతున్నాయి. ఇంజన్ స్పెసిఫికేషన్లు వర్టస్ ఫేస్‌లిఫ్ట్ లాగే ఉంటాయి. దీని ధర కూడా సుమారు రూ.11 లక్షల నుంచి రూ.19 లక్షల మధ్య ఉండనుంది.

5. టాటా సఫారీ ఈవీ (Tata Safari EV):
పెద్ద ఫ్యామిలీలు ఎప్పుడెప్పుడా అని ఎదురుచూస్తున్న 7-సీటర్ ఎలక్ట్రిక్ ఎస్‌యూవీ సఫారీ ఈవీ మే మధ్యలో మార్కెట్లోకి రానుంది. 6, 7 సీట్ల కాన్ఫిగరేషన్‌లో లభించే ఈ కారులో 65 kWh, 75 kWh బ్యాటరీ ప్యాక్ ఆప్షన్లు ఉంటాయి. గరిష్టంగా 550 కిలోమీటర్ల రేంజ్ ఇచ్చే ఈ కారు, ఎలక్ట్రిక్ ఎస్‌యూవీ విభాగంలో టాటా ఆధిపత్యాన్ని మరింత పెంచనుంది. దీని ధర రూ.22.5 లక్షల నుంచి రూ.30 లక్షల మధ్య ఉండే అవకాశం ఉంది. పనోరమిక్ సన్‌రూఫ్, ఏడీఏఎస్ వంటి సెక్యూరిటీ ఫీచర్లు ఇందులో కీలకం.