డిజైర్ తర్వాత అందరూ ఈ కారే కొంటున్నారు.. షోరూమ్‌కు క్యూ కడుతున్న కొత్త కస్టమర్లు!

భారత ఆటోమొబైల్ మార్కెట్‌లో ఒకప్పుడు సెడాన్ కార్లదే రాజ్యం. కానీ కాలక్రమేణా SUVల ప్రభావం పెరుగుతూ రావడంతో, సెడాన్‌ల యుగం ముగిసింది అనే అభిప్రాయం చాలామందిలో ఏర్పడింది. అయితే తాజా మార్కెట్ ట్రెండ్స్ చూస్తే, ఆ అంచనాలు పూర్తిగా నిజం కాలేదని స్పష్టంగా తెలుస్తోంది. ఎందుకంటే గత కొన్ని నెలలుగా దేశంలో అత్యధికంగా అమ్ముడవుతున్న కార్ల జాబితాలో మళ్లీ సెడాన్ మోడళ్లు కూడా బలంగా కనిపిస్తున్నాయి. ప్రత్యేకంగా మారుతి సుజుకి డిజైర్ వంటి మోడల్, తన సెగ్మెంట్‌లోనే కాదు, మొత్తం మార్కెట్‌లో కూడా మంచి సేల్స్ నమోదు చేస్తూ తిరిగి ఫోకస్‌లోకి వచ్చింది. ఇది కేవలం ఒక మోడల్ విజయమే కాకుండా, సెడాన్‌లపై వినియోగదారుల ఆసక్తి ఇంకా కొనసాగుతుందనే సంకేతాన్ని ఇస్తోంది.

మంచి మైలేజ్, కంఫర్టబుల్ డ్రైవింగ్, అలాగే బడ్జెట్‌లో ప్రీమియం ఫీల్ కారణాల వల్లే సెడాన్‌లకు ఇంకా డిమాండ్ తగ్గలేదని చెప్పాలి. ఈ నేపథ్యంలో హోండా అమేజ్ (Honda Amaze) వంటి మోడళ్లు కూడా అమ్మకాలలో పుంజుకుంటున్నాయి. Honda తయారు చేసిన ఈ కాంపాక్ట్ సెడాన్, తన విశ్వసనీయత, స్మూత్ ఇంజన్ పనితీరు, అలాగే కంఫర్ట్ కారణంగా వినియోగదారులలో మంచి గుర్తింపు సంపాదించింది.

గత నెలలోనే ఈ మోడల్ 4,313 యూనిట్ల విక్రయాలను నమోదు చేయడం, దీనికి ఉన్న స్థిరమైన డిమాండ్‌ను స్పష్టంగా చూపిస్తోంది. తాజా గణాంకాలు చూస్తే హోండా అమేజ్‌కు మార్కెట్లో మంచి మళ్లీ ఊపు వచ్చినట్టు స్పష్టంగా తెలుస్తోంది. గత ఏడాది మార్చిలో అమ్ముడైన 3,583 యూనిట్లతో పోలిస్తే, ఈసారి అమ్మకాలు సుమారు 20.37 శాతం పెరిగి 4,313 యూనిట్లకు చేరుకోవడం గమనించాల్సిన విషయం.

ఇది కేవలం ఒక నెల ఫలితం మాత్రమే కాకుండా, ఈ మోడల్‌పై వినియోగదారుల విశ్వాసం ఇంకా బలంగా కొనసాగుతోందనే సంకేతంగా భావించవచ్చు. ప్రస్తుతం Honda City వంటి ప్రతిష్టాత్మక సెడాన్ మోడళ్ల అమ్మకాలు కొంత తగ్గుతున్న పరిస్థితిలో, Honda Amaze మాత్రం హోండాకు ఒక కీలక సపోర్ట్‌గా మారింది. బడ్జెట్ సెగ్మెంట్‌లో ఉండి కూడా మంచి కంఫర్ట్, విశ్వసనీయతను అందించడం వల్ల ఇది ఎక్కువ మందికి చేరువైంది.

ఇంకా ఆసక్తికరమైన విషయం ఏమిటంటే, ఈ కారు తన సెగ్మెంట్‌లోనే కాకుండా దేశంలోనే అత్యంత సరసమైన ధరలో ADAS (Advanced Driver Assistance Systems) ఫీచర్‌ను అందించే మోడల్‌గా నిలుస్తోంది. Honda ఈ సేఫ్టీ టెక్నాలజీని తక్కువ ధరలో అందించడం వల్ల, భద్రతకు ప్రాధాన్యం ఇచ్చే వినియోగదారులకు ఇది మరింత ఆకర్షణీయంగా మారింది. కొత్త తరం అమేజ్ వినియోగదారులకు బడ్జెట్‌లోనే ప్రీమియం అనుభవాన్ని అందించాలనే లక్ష్యంతో రూపొందించబడింది.

ఈ కారు V, VX, ZX అనే మూడు వేరియంట్లలో అందుబాటులో ఉండగా, ఎక్స్-షోరూమ్ ధర రూ. 7,47,790 నుండి రూ. 9,99,900 వరకు ఉంది. పనితీరు విషయానికి వస్తే, ఈ సెడాన్‌లో 1.2-లీటర్, నాలుగు సిలిండర్ల పెట్రోల్ ఇంజన్‌ను అందించారు. ఈ ఇంజన్ 90 bhp శక్తిని, 110 Nm గరిష్ట టార్క్‌ను ఉత్పత్తి చేస్తూ నగర ప్రయాణాలకు సరిపోయే స్మూత్ డ్రైవింగ్ అనుభవాన్ని ఇస్తుంది.

ట్రాన్స్‌మిషన్ ఎంపికల విషయంలో కూడా స్వేచ్ఛ ఇచ్చారు. 5-స్పీడ్ మాన్యువల్ గేర్‌బాక్స్‌తో పాటు, సౌకర్యవంతమైన డ్రైవింగ్ కోసం CVT ఆటోమేటిక్ ఆప్షన్‌ను కూడా అందిస్తున్నారు. ప్యాడిల్ షిఫ్టర్లతో CVT వేరియంట్ మరింత ఎంగేజింగ్ డ్రైవ్‌ను అందించేలా రూపొందించబడింది. మైలేజ్ పరంగా కూడా హోండా ఈ మోడల్‌ను ఎఫిషియెంట్‌గా ట్యూన్ చేసింది. మాన్యువల్ వేరియంట్ లీటరుకు 18.65 కిలోమీటర్ల మైలేజీని ఇవ్వగా, CVT ఆటోమేటిక్ వేరియంట్ 19.46 కిలోమీటర్ల వరకు అందిస్తుంది.