దసరాకు కొత్త కారు కొంటున్నారా? హోండా ఎలివేట్ ఫేస్‌లిఫ్ట్ vs క్రెటా vs సెల్టోస్.. మీ బడ్జెట్‌కు ఏది బెస్ట్?

దసరా, నవరాత్రుల పండుగ సీజన్‌లో కాంపాక్ట్ ఎస్‌యూవీ కొనాలని అనుకుంటున్నారా? షోరూమ్‌లలో డెలివరీ వెయిటింగ్ పీరియడ్లు, ధరల మార్పుల వార్తలతో కన్‌ఫ్యూజ్ అవుతున్నారా? అక్టోబర్ 6న విడుదలైన హోండా ఎలివేట్ ఫేస్‌లిఫ్ట్ సరికొత్త ఫీచర్లతో మార్కెట్లోకి వచ్చింది. అయితే ఇందులో పెట్రోల్ ఇంజిన్ మాత్రమే అందుబాటులో ఉంది. మరి ఈ పండుగ సీజన్‌లో ఏ కారు కొంటే బెటర్? హోండా ఎలివేట్, హ్యుందాయ్ క్రెటా, కియా సెల్టోస్, మారుతి గ్రాండ్ విటారా కార్ల పూర్తి వివరాలు ఇక్కడ చూసేయండి.

కొత్త ఎలివేట్ వేరియంట్‌లో బోల్డ్ ఫ్రంట్ లుక్, కనెక్టెడ్ టెయిల్ ల్యాంప్స్, నిశ్శబ్దమైన క్యాబిన్ లభిస్తాయి. లోపల పవర్డ్, వెంటిలేటెడ్ ఫ్రంట్ సీట్లు, ఈ సెగ్మెంట్‌లోనే తొలిసారిగా రేర్ సీట్ వెంటిలేషన్, 360-డిగ్రీ కెమెరా, ఎలక్ట్రానిక్ పార్కింగ్ బ్రేక్, ఫ్రంట్ సెన్సార్లు అందించారు. రూ. 11.80 లక్షల ప్రారంభ ధరతో కొత్తగా ZX ప్లస్ టాప్ వేరియంట్ పరిచయమైంది. ఇందులో మునుపటి 1.5-లీటర్ పెట్రోల్ ఇంజిన్‌నే ఇచ్చారు, ఎలాంటి హైబ్రిడ్ ఆప్షన్ రాలేదు.

హోండా ఎలివేట్ ఫేస్‌లిఫ్ట్: ధరలు, వేరియంట్లు.. మారిన ఫీచర్లివే!

ఈ ఎలివేట్ ఫేస్‌లిఫ్ట్ మోడల్ SV, V, VX, ZXలతో పాటు కొత్తగా ZX ప్లస్ వేరియంట్లలో లభిస్తోంది. V నుంచి ZX ప్లస్ వరకు CVT ఆటోమేటిక్ ఆప్షన్ ఉంది. 'హోండా సెన్సింగ్' ADAS సూట్‌కి సరికొత్తగా CVT మోడళ్లలో 'లో స్పీడ్ ఫాలో' ఫీచర్ తెచ్చారు. ఇది సిటీ ట్రాఫిక్‌లో డ్రైవింగ్‌ను చాలా ఈజీ చేస్తుంది. ఈ కారు మ్యాన్యువల్ వేరియంట్ 15.31 కిమీ/లీ, CVT వేరియంట్ 16.61 కిమీ/లీ మైలేజ్ ఇస్తాయని కంపెనీ ధ్రువీకరించింది. లగేజ్ కోసం 458 లీటర్ల భారీ బూట్ స్పేస్ లభిస్తుంది.

ధరల పోలిక: ఎలివేట్ vs క్రెటా vs సెల్టోస్ vs గ్రాండ్ విటారా

క్రెటా, సెల్టోస్ కార్లలో పెట్రోల్‌తో పాటు డీజిల్, టర్బో-పెట్రోల్ ఇంజిన్లు లభిస్తున్నాయి. ఇక మారుతి గ్రాండ్ విటారా స్ట్రాంగ్ హైబ్రిడ్ వెర్షన్ మైలేజ్‌లో తోపు అనిపించుకుంటోంది. రోజువారీ ప్రయాణం ఎక్కువగా ఉండే వారికి గ్రాండ్ విటారా బెస్ట్ ఆప్షన్. కానీ సరసమైన ధరలో ఎక్కువ ఫీచర్లు, సౌకర్యవంతమైన ప్రయాణం కోరుకునేవారికి ఎలివేట్ లోయర్, మిడ్ వేరియంట్లు మంచి వ్యాల్యూ ఫర్ మనీ అని చెప్పొచ్చు. కింది టేబుల్ చూసి మీ అవసరాలకు తగ్గ కారును ఎంచుకోండి.

మోడల్	ప్రారంభ ఎక్స్‌షోరూమ్ ధర	ఇంజిన్లు	ADAS	బూట్ స్పేస్ (లీ)
హోండా ఎలివేట్ ఫేస్‌లిఫ్ట్	₹11.80 లక్షలు	1.5 పెట్రోల్ MT/CVT	ఉంది (హోండా సెన్సింగ్)	458
హ్యుందాయ్ క్రెటా	₹10.90 లక్షలు	1.5 పెట్రోల్, 1.5 టర్బో, 1.5 డీజిల్	ఉంది (స్మార్ట్‌సెన్స్ L2)	433
కియా సెల్టోస్	₹10.99 లక్షలు	1.5 పెట్రోల్, 1.5 టర్బో, 1.5 డీజిల్	ఉంది (లెవెల్ 2)	447
మారుతి గ్రాండ్ విటారా	₹10.77 లక్షలు	1.5 పెట్రోల్ మైల్డ్‑హైబ్రిడ్, స్ట్రాంగ్‑హైబ్రిడ్, CNG	లేదు	373 (హైబ్రిడ్ 265)

మూలం: హోండా ప్రెస్ నోట్, బ్రోచర్; హ్యుందాయ్, కియా బ్రోచర్లు; మారుతి ప్రెస్ నోట్స్.

సేఫ్టీ & స్పేస్: రోజూ వాడేవారికి ఏది బెస్ట్?

ఎలివేట్‌లో అందించిన అడాప్టివ్ క్రూయిజ్ కంట్రోల్ (స్టాప్-అండ్-గో సదుపాయంతో), 360-డిగ్రీ కెమెరా, రేర్ డిస్క్ బ్రేక్‌లు డ్రైవింగ్ అయసటను, పార్కింగ్ ఇబ్బందులను తగ్గిస్తాయి. క్రెటా, సెల్టోస్ కార్ల టాప్ వేరియంట్లలో జంక్షన్, బ్లైండ్-స్పాట్ అసిస్ట్‌లతో కూడిన లెవెల్-2 ADAS లభిస్తుంది. గ్రాండ్ విటారా అన్ని వేరియంట్లలో 6 ఎయిర్‌బ్యాగ్‌లను ఇస్తున్నప్పటికీ ADAS ఫీచర్ లేదు. పైగా దీని స్ట్రాంగ్-హైబ్రిడ్ మోడల్‌లో బూట్ స్పేస్ కాస్త తక్కువ. సిటీ యూజర్లు ఈ అంశాలను గుర్తుంచుకోవడం మంచిది.

తెలుగు రాష్ట్రాల్లో ఆన్‌రోడ్ ధరలు.. దసరా డెలివరీ ఎవరిది?

సుమారు ఆన్‌రోడ్ ప్రారంభ ధరలను పరిశీలిస్తే.. హైదరాబాద్‌లో కియా సెల్టోస్ ~₹14.07 లక్షలు, వైజాగ్ వద్ద హ్యుందాయ్ క్రెటా ~₹13.67 లక్షలు, గ్రాండ్ విటారా ~₹13.65 లక్షలు, విజయవాడలో హోండా ఎలివేట్ ~₹14.92 లక్షలుగా ఉన్నాయి. ప్రస్తుతం హైదరాబాద్‌లో హోండా ఎలివేట్ వెయిటింగ్ పీరియడ్ 1 నుంచి 1.5 నెలల వరకు ఉంది. సెల్టోస్ త్వరగానే లభిస్తున్నప్పటికీ వేరియంట్‌పై ఆధారపడి ఉంటుంది. అక్టోబర్ 11 నుంచి నవరాత్రులు ప్రారంభంకానుండగా, అక్టోబర్ 20న దసరా ఉంది. కాబట్టి పండుగ నాటికి డెలివరీ కావాలంటే ఈ వీకెండ్‌లోనే బుక్ చేసుకోవడం మంచిది.

మీ వాడకానికి ఏ వేరియంట్ పర్ఫెక్ట్?

బడ్జెట్ అండ్ స్పేస్ ప్రాధాన్యత ఉన్నవారికి: ఎక్కువ ఖర్చు లేకుండా మంచి సేఫ్టీ, క్యాబిన్ స్పేస్ కావాలనుకుంటే ఎలివేట్ V/VX మ్యాన్యువల్ వేరియంట్లు బెస్ట్. ట్రాఫిక్ ప్రయాణాల కోసం: 'లో స్పీడ్ ఫాలో'తో వచ్చే హోండా ఎలివేట్ ZX CVT లేదా అడ్వాన్స్డ్ ADAS ఉన్న క్రెటా SX(O) iVT, సెల్టోస్ HTX/GTX సరైన ఎంపికలు. లాంగ్ డ్రైవ్స్ చేసేవారికి: హైవేలపై ఎక్కువ కిలోమీటర్లు తిరిగేవారికి క్రెటా, సెల్టోస్ డీజిల్ మోడళ్లు సరైన జోడీ. మైలేజ్ ముఖ్యం అనుకునే కుటుంబాలకు: ఎక్కువ కాలం పెట్రోల్ బిల్లు ఆదా చేసుకోవాలనుకుంటే మారుతి గ్రాండ్ విటారా స్ట్రాంగ్-హైబ్రిడ్ (Zeta+/Alpha+) వేరియంట్లు బెస్ట్ ఛాయిస్.