క్రెటా ఈవీ కొనాలనుకుంటున్నారా? మరో 2 లక్షలు రెడీ చేసుకోండి..కస్టమర్లకు షాకిచ్చిన హ్యుందాయ్

హుందాయ్ తన పాపులర్ ఎస్‌యూవీ క్రెటా ఎలక్ట్రిక్ (Creta EV) వేరియంట్లలో భారీ మార్పులు చేస్తూ కస్టమర్లకు షాక్ ఇచ్చింది. 2025 ఆటో ఎక్స్‌పోలో అట్టహాసంగా విడుదలైన ఈ కారు, ఇప్పుడు 2026 అప్‌డేట్‌లో భాగంగా కొన్ని చౌకైన వేరియంట్లను కోల్పోయింది. మీరు గనుక తక్కువ బడ్జెట్‌లో క్రెటా ఈవీని ఇంటికి తెచ్చుకోవాలనుకుంటే, మీ ప్లాన్ మార్చుకోవాల్సిందే!

దక్షిణ కొరియా ఆటో దిగ్గజం హుందాయ్, భారత మార్కెట్లో అత్యంత ఆదరణ పొందిన క్రెటా ఎలక్ట్రిక్ వెర్షన్‌లో కీలక మార్పులు చేసింది. ఎటువంటి ముందస్తు సమాచారం లేకుండానే, తక్కువ ధరలో లభించే 42kWh బ్యాటరీ ప్యాక్ కలిగిన స్మార్ట్(Smart) వేరియంట్లను కంపెనీ నిలిపివేసింది. ఈ నిర్ణయం మధ్యతరగతి వినియోగదారులపై తీవ్ర ప్రభావం చూపనుంది.

గతంలో క్రెటా ఈవీలో స్మార్ట్, స్మార్ట్ (O), స్మార్ట్ (O) HC వంటి వేరియంట్లు 42kWh చిన్న బ్యాటరీతో అందుబాటులో ఉండేవి. ఇవి నగరాల్లో తిరిగే వారికి, తక్కువ బడ్జెట్‌లో ప్రీమీయం ఫీచర్లు కోరుకునే వారికి బెస్ట్ ఆప్షన్‌గా ఉండేవి. కానీ, కొత్త అప్‌డేట్ ప్రకారం ఇప్పుడు ఈ స్మార్ట్ వేరియంట్లు కావాలంటే కేవలం పెద్దదైన 51.4kWh బ్యాటరీ ప్యాక్ మాత్రమే తీసుకోవాలి.

దీనివల్ల కారు ధర నేరుగా రూ.2 లక్షల వరకు పెరిగే అవకాశం ఉంది. అంటే, మీకు అంత రేంజ్ అవసరం లేకపోయినా, స్మార్ట్ వేరియంట్ ఫీచర్లు కావాలంటే తప్పనిసరిగా ఎక్కువ డబ్బు చెల్లించాల్సిందే. ఈ మార్పులతో పాటు హుందాయ్ బ్యాటరీ సామర్థ్యాన్ని కూడా కొద్దిగా ట్యూన్ చేసింది. ప్రస్తుతం ఉన్న 42kWh బ్యాటరీ రేంజ్ 390 కి.మీ నుంచి 420 కి.మీ కు పెరగగా, పెద్ద బ్యాటరీ (51.4kWh) రేంజ్ 473 కి.మీ నుంచి 510 కి.మీ కు పెరిగింది.

టెక్నికల్‌గా ఇది మంచి విషయమే అయినప్పటికీ, కారు ప్రారంభ ధర పెరగడం వల్ల సామాన్య కొనుగోలుదారులు ఇబ్బంది పడుతున్నారు. ఉత్పాదక ఖర్చులు పెరగడం, కస్టమర్లను హై-ఎండ్ వేరియంట్ల వైపు మళ్లించేందుకే హుందాయ్ ఈ వ్యూహాన్ని అమలు చేసిందని మార్కెట్ నిపుణులు విశ్లేషిస్తున్నారు.

ప్రస్తుతం ఎలక్ట్రిక్ కార్ల మార్కెట్లో టాటా కర్వ్ ఈవీ (Tata Curvv EV), MG ZS EV వంటి కార్ల నుంచి క్రెటాకు గట్టి పోటీ ఎదురవుతోంది. టాటా కర్వ్ ఈవీ ధరలు రూ.17.49 లక్షల నుంచి ప్రారంభమవుతుంటే, క్రెటా ఎగ్జిక్యూటివ్ వేరియంట్ రూ.18.02 లక్షలుగా ఉంది.

ఇప్పుడు హుందాయ్ మిడ్-స్పెక్ వేరియంట్ల ధరలను పెంచడం వల్ల, వినియోగదారులు ఇతర ఆప్షన్ల వైపు చూసే అవకాశం ఉంది. అయితే, హుందాయ్ బ్రాండ్ వాల్యూ, సర్వీస్ నెట్‌వర్క్‌పై నమ్మకంతో జనం ఈ అదనపు ధరను భరిస్తారని కంపెనీ ఆశిస్తోంది.

మీరు క్రెటా ఈవీని నగర ప్రయాణాల కోసం తక్కువ ధరలో కొందామనుకుంటే, ఇప్పుడు అందుబాటులో ఉన్న ఎగ్జిక్యూటివ్ వేరియంట్‌తో రాజీ పడాలి. లేదంటే మరికొంత బడ్జెట్ పెంచుకుని హై-రేంజ్ వేరియంట్లకు వెళ్లాలి. మార్కెట్లోకి కొత్తగా రాబోతున్న టయోటా ఈవీలు, మహీంద్రా ఎలక్ట్రిక్ కార్లు ఈ రేసును మరింత రసవత్తరంగా మార్చనున్నాయి.