27 కిమీ మైలేజీ.. అదిరిపోయే ఫీచర్లు.. ఇప్పుడు కొంటే మధ్య తరగతి కారు పై ఏకంగా లక్ష వరకు డిస్కౌంట్

భారతదేశంలో మధ్యతరగతి కుటుంబాలు కారు కొనాలనుకుంటే ముందుగా చూసేది బడ్జెట్, భద్రత, మైలేజీ. ఈ మూడింటి కలయికతో వచ్చిన హ్యుందాయ్ ఎక్స్టర్ ప్రస్తుతం మార్కెట్లో హాట్ కేకులా మారుతోంది. గత కొంతకాలంగా మైక్రో ఎస్‌యూవీ సెగ్మెంట్లో టాటా పంచ్ తన అప్రతిహత రాజ్యాన్ని కొనసాగిస్తోంది.

అయితే, పంచ్‌కు గట్టి పోటీనిస్తూ.. కేవలం ఫీచర్లతోనే కాకుండా ఇప్పుడు ధరతో కూడా పంచ్ ఇచ్చేందుకు హ్యుందాయ్ సిద్ధమైంది. జనవరి 2026 నాటికి ఎక్స్టర్ కారుపై కంపెనీ గరిష్టంగా రూ.98,000 వరకు భారీ ప్రయోజనాలను ప్రకటించింది. అంటే సామాన్యుడు తన కష్టార్జితంలో దాదాపు లక్ష రూపాయల వరకు ఆదా చేసుకునే అద్భుతమైన అవకాశం ఇది.

ఈ కొత్త సంవత్సరంలో హ్యుందాయ్ తన స్టాక్ క్లియర్ చేయడంతో పాటు, కొత్త కస్టమర్లను ఆకర్షించేందుకు వేరియంట్ల వారీగా డిస్కౌంట్లను విభజించింది. మీరు ఎక్స్టర్ SX మోడల్‌ను ఎంచుకుంటే ఏకంగా రూ.98,000 వరకు లాభం పొందవచ్చు. లగ్జరీ ఫీచర్లు ఎక్కువగా ఉండే SX(O) వేరియంట్‌పై రూ.90,000 వరకు తగ్గింపు ఉంది.

ఒకవేళ మీ బడ్జెట్ తక్కువగా ఉండి, మిడ్-లెవల్ S వేరియంట్ తీసుకోవాలనుకుంటే రూ.83,000 వరకు బెనిఫిట్స్ లభిస్తాయి. ఇక మైలేజీ గురించి ఆలోచించే వారి కోసం CNG వేరియంట్లపై కూడా రూ.63,000 వరకు ఆఫర్లు ఉన్నాయి. ప్రస్తుతం ఎక్స్టర్ ధరలు రూ.5.74 లక్షల నుండి ప్రారంభమై రూ.9.61 లక్షల (ఎక్స్-షోరూమ్) వరకు ఉన్నాయి. ఈ డిస్కౌంట్లతో ఆన్-రోడ్ ధర చాలా తగ్గే అవకాశం ఉంది.

సాధారణంగా ఈ సెగ్మెంట్లో వచ్చే కార్లు 3-సిలిండర్ ఇంజిన్ తో వస్తాయి, కానీ ఎక్స్టర్ లో 4-సిలిండర్ 1.2 లీటర్ కప్పా ఇంజిన్ ఉండటం పెద్ద విశేషం. దీనివల్ల కారు నడుపుతున్నప్పుడు ఇంజిన్ సౌండ్ రాదు, చాలా స్మూత్‌గా వెళ్తుంది. ఇది 83 bhp పవర్, 114 Nm టార్క్‌ను ఇస్తుంది.

పెట్రోల్ లో లీటరుకు సుమారు 19.4 కిలోమీటర్ల మైలేజీ రావడం మధ్యతరగతి వారికి గొప్ప ఊరట. ఇక CNG విషయానికి వస్తే, ట్విన్ సిలిండర్ టెక్నాలజీతో వచ్చిన ఈ కారు కేజీకి 27.1 కిలోమీటర్ల మైలేజీని ఇస్తుంది. దీనివల్ల లాంగ్ ట్రిప్స్ వేసినా పెట్రోల్ ఖర్చుల భయం ఉండదు.

కారు చిన్నదే అయినా ఫీచర్లు మాత్రం పెద్ద కార్లకు ఏమాత్రం తీసిపోవు. హ్యుందాయ్ ఎక్స్టర్ లో సెగ్మెంట్-ఫస్ట్ ఫీచర్లు చాలా ఉన్నాయి. ఉదాహరణకు, ముందు, వెనుక రికార్డింగ్ చేసే ఇన్-బిల్ట్ డ్యాష్‌క్యామ్ ఉంది, ఇది ప్రమాదాలు జరిగినప్పుడు ఆధారంగా ఉపయోగపడుతుంది.

అలాగే వాయిస్ కమాండ్‌తో పనిచేసే ఎలక్ట్రిక్ సన్‌రూఫ్, 8-అంగుళాల టచ్‌స్క్రీన్, ఫుల్లీ డిజిటల్ డ్రైవర్ డిస్‌ప్లే దీనికి ప్రీమియం లుక్ ఇస్తాయి. భద్రత పరంగా హ్యుందాయ్ అన్ని వేరియంట్లలో 6 ఎయిర్‌బ్యాగ్‌లను ప్రామాణికంగా ఇస్తోంది. ఇబిడితో కూడిన ఏబిఎస్, హిల్ స్టార్ట్ అసిస్ట్, రివర్స్ కెమెరా వంటి ఫీచర్లు ప్రయాణాన్ని మరింత సురక్షితం చేస్తాయి.

ఎక్స్టర్ డిజైన్ చూస్తే ఒక బాక్సీ ఎస్‌యూవీ లుక్ వస్తుంది. లోపల స్పేస్ కూడా చాలా విశాలంగా ఉంటుంది, కాబట్టి ఐదుగురు సభ్యులు ఉన్న కుటుంబానికి ఇది సరిగ్గా సరిపోతుంది. కారు గ్రౌండ్ క్లియరెన్స్ కూడా ఎక్కువగా ఉండటం వల్ల మన ఊర్లలో ఉండే గతుకుల రోడ్లపై కూడా సులభంగా దూసుకుపోతుంది. మొత్తానికి, టాటా పంచ్ ఫేస్‌లిఫ్ట్ రాకతో అప్రమత్తమైన హ్యుందాయ్, ఈ భారీ డిస్కౌంట్లతో మధ్యతరగతి ప్రజల మనసు గెలుచుకునేందుకు గట్టిగానే ప్రయత్నిస్తోంది.