ఒక్కసారి ఛార్జ్ చేస్తే చాలు.. హైదరాబాద్ నుంచి వైజాగ్ వరకూ నాన్‌స్టాప్.. ఇదే కొత్త అయానిక్ మ్యాజిక్

భారతీయ ఎలక్ట్రిక్ వాహన మార్కెట్లో మరోసారి తన ఆధిపత్యాన్ని చాటుకునేందుకు హ్యుందాయ్ మోటార్ ఇండియా ముందుకు వచ్చింది. ఇప్పటికే ప్రీమియం ఎలక్ట్రిక్ ఎస్‌యూవీగా మంచి గుర్తింపు తెచ్చుకున్న హ్యుందాయ్ అయానిక్ 5 (Hyundai IONIQ 5)ను ఇప్పుడు మరింత పవర్ఫుల్‎గా, అడ్వాన్సుడ్ ఫీచర్లతో అప్‌డేట్ చేసి మళ్లీ మార్కెట్లోకి తీసుకొచ్చింది. ఏప్రిల్ 28, 2026న గురుగ్రామ్‌లో జరిగిన ఈ లాంచ్ ఈవెంట్‌లో కంపెనీ కొత్త వెర్షన్‌కు సంబంధించిన కీలక వివరాలను వెల్లడించింది.

కొత్త అయోనిక్ 5లో ప్రధానంగా ఆకట్టుకునే అంశం దాని బ్యాటరీ, రేంజ్. ఈసారి హ్యుందాయ్ పెద్దదైన 84 kWh బ్యాటరీ ప్యాక్‌ను అందించింది. దీనివల్ల ఈ కారు ఒకసారి ఫుల్ ఛార్జ్ చేస్తే సుమారు 690 కిలోమీటర్ల వరకు ప్రయాణించగలదు (ARAI ప్రమాణాల ప్రకారం). లాంగ్ జర్నీల్లో తరచుగా ఛార్జింగ్ అవసరం లేకుండా ఉండటం, ఈవీ వినియోగదారులకు ఉన్న రేంజ్ టెన్షన్‎ను పూర్తిగా తగ్గిస్తుంది. సిటీ ప్రయాణాలకే కాదు, లాంగ్ డ్రైవ్స్‌కూ ఇది సరైన ఎంపికగా మారింది.

డిజైన్ విషయానికి వస్తే.. అయోనిక్ 5 తన ఫ్యూచరిస్టిక్ లుక్‌ను మరింత మెరుగుపరుచుకుంది. పారామెట్రిక్ పిక్సెల్ డిజైన్ సిగ్నేచర్‌ను అలాగే కొనసాగిస్తూ, ముందు వెనుక భాగాల్లో చిన్నపాటి మార్పులు చేశారు. కొత్త బంపర్లు, స్పోర్టీ అలాయ్ వీల్స్, రియర్ స్పాయిలర్ ఇలా అన్నీ కలిసి కారుకు మరింత అగ్రెసివ్, మోడర్న్ లుక్‌ను ఇస్తున్నాయి. రోడ్డుపై ఇది కచ్చితంగా అందరి దృష్టిని ఆకర్షించేలా ఉంటుంది.

కారు లోపల అడుగుపెడితే ప్రీమియం అనుభూతి చాలా క్లియర్‎గా అర్థం అవుతుంది. డ్యూయల్ 12.3-ఇంచ్ డిస్‌ప్లేలు, కొత్త స్టీరింగ్ వీల్ డిజైన్, హై క్వాలిటీ మెటీరియల్స్ అన్నీ కలిసి ఒక లగ్జరీ క్యాబిన్ ఫీలింగ్ ఇస్తాయి. హీటెడ్, వెంటిలేటెడ్ సీట్లు, వైర్‌లెస్ ఛార్జింగ్, ఫిజికల్ కంట్రోల్స్ వంటి అంశాలు డ్రైవర్‌కు సౌకర్యాన్ని పెంచుతాయి. జర్నీ మొత్తం కంఫర్ట్, టెక్నాలజీ కలయికగా ఉంటుంది.

టెక్నాలజీ పరంగా కూడా ఈ కారు కొత్త స్టాండర్డ్స్ సెట్ చేస్తోంది. ccNC (Connected Car Navigation Cockpit) సిస్టమ్, ఓవర్-ది-ఎయిర్ అప్‌డేట్స్, వైర్‌లెస్ ఆండ్రాయిడ్ ఆటో, యాపిల్ కార్‌ప్లే వంటి ఫీచర్లు ఇందులో ఉన్నాయి. బ్లూలింక్ ద్వారా రిమోట్ కంట్రోల్ ఫీచర్లు, వాహనాన్ని ఎక్కడి నుంచైనా కంట్రోల్ చేసే సౌకర్యం వినియోగదారులకు అదనపు భద్రతను అందిస్తుంది.

సేఫ్టీ విషయంలో కూడా హ్యుందాయ్ రాజీ పడలేదు. పార్కింగ్ కొలిజన్ అవాయిడెన్స్, పార్కింగ్ డిస్టెన్స్ వార్నింగ్ వంటి ఫీచర్లు డ్రైవర్‌కు సహాయపడతాయి. అదనంగా ADAS లెవల్ 2 టెక్నాలజీతో డ్రైవింగ్ మరింత సురక్షితంగా మారుతుంది. ట్రాఫిక్ పరిస్థితుల్లో కూడా ఇది మంచి కంట్రోల్‌ను ఇస్తుంది.

ధర విషయానికి వస్తే, కొత్త అయోనిక్ 5 ప్రారంభ ధర సుమారు రూ.55.7 లక్షలు (ఎక్స్-షోరూమ్). గ్రావిటీ గోల్డ్, మిడ్‌నైట్ బ్లాక్, టైటాన్ గ్రే, ఆప్టిక్ వైట్ వంటి కలర్ ఆప్షన్లలో ఇది లభిస్తుంది. ప్రీమియం ఎలక్ట్రిక్ ఎస్‌యూవీ సెగ్మెంట్‌లో లగ్జరీ, రేంజ్, టెక్నాలజీ అన్నీ కలిపిన ఒక పూర్తి ప్యాకేజ్‌గా ఇది నిలుస్తోంది.

మొత్తం మీద చూస్తే కొత్త అయోనిక్ 5 కేవలం ఒక అప్‌డేట్ కాదు.. ఇది భారతీయ ఎలక్ట్రిక్ కార్ల మార్కెట్లో కొత్త దిశను చూపించే మోడల్. లాంగ్ రేంజ్, ఫ్యూచరిస్టిక్ డిజైన్, ప్రీమియం ఫీచర్లతో ఇది ఈవీ కొనాలనుకునే వారికి ఒక బెస్ట్ ఛాయిస్‌గా నిలుస్తోంది.