షోరూంల వద్ద భారీ క్యూలు...3 నెలల్లో 80 వేల బుకింగ్స్..రికార్డుల వేటలో హ్యుందాయ్

హ్యుందాయ్ మోటార్ ఇండియా తన కాంపాక్ట్ ఎస్‌యూవీ మార్కెట్‌లో మరోసారి ప్రకంపనలు సృష్టిస్తోంది. 2025 చివరిలో లాంచ్ అయిన సరికొత్త హ్యుందాయ్ వెన్యూ (Hyundai Venue 2026) కేవలం మూడు నెలల్లోనే ఏకంగా 80,000 బుకింగ్స్ సాధించి సరికొత్త రికార్డు సృష్టించింది. హ్యుందాయ్ ప్రకటించిన తాజా త్రైమాసిక (Q3 FY26) ఫలితాల ప్రకారం.. ఈ కారుకు వస్తున్న క్రేజ్ చూస్తుంటే ఆటోమొబైల్ నిపుణులు కూడా ఆశ్చర్యపోతున్నారు.

భారతదేశంలో సబ్-4 మీటర్ ఎస్‌యూవీ సెగ్మెంట్‌లో హ్యుందాయ్ వెన్యూ ఎప్పుడూ ఒక ట్రెండ్‌సెట్టర్‌గా ఉంటుంది. అయితే, 2025 నవంబర్‌లో విడుదలైన సెకండ్ జనరేషన్ వెన్యూ ఈ సెగ్మెంట్‌ను నెక్ట్స్ లెవల్‎కు తీసుకెళ్లింది. కొత్త డిజైన్, అదిరిపోయే ఫీచర్లతో వచ్చిన ఈ కారును కేవలం 90 రోజుల్లోనే 80 వేల మంది బుక్ చేసుకున్నారు. ఆసక్తికరమైన విషయం ఏంటంటే, ఈ బుకింగ్స్ చేసుకున్న వారిలో దాదాపు 48 శాతం మంది తొలిసారి కారు కొంటున్నవారే. అంటే పాత కస్టమర్లనే కాకుండా, కొత్త తరానికి కూడా ఈ వెన్యూ బాగా నచ్చేసింది.

కొత్త వెన్యూ 2026 కేవలం కారు మాత్రమే కాదు, ఒక టెక్నాలజీ అద్భుతం. ఇందులో డ్యూయల్ 12.3-అంగుళాల కర్వ్డ్ డిస్‌ప్లేలు (ఒకటి ఇన్ఫోటైన్‌మెంట్, మరొకటి డిజిటల్ క్లస్టర్) ప్రధాన ఆకర్షణగా నిలిచాయి. ఇవి కేవలం ప్రీమియం లగ్జరీ కార్లలో మాత్రమే ఉండేవి. దీనికి తోడు లెవెల్-2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్) సేఫ్టీని మరో లెవల్‌కు తీసుకెళ్లింది. ఇందులో అడాప్టివ్ క్రూయిజ్ కంట్రోల్, లేన్ కీప్ అసిస్ట్ వంటి 16 రకాల డ్రైవర్ అసిస్టెన్స్ ఫీచర్లు ఉన్నాయి.

పాత మోడల్ కంటే కొత్త వెన్యూ మరింత పెద్దదిగా కనిపిస్తోంది. ఇది మునుపటి కంటే 48 మి.మీ ఎత్తు, 30 మి.మీ వెడల్పు ఎక్కువగా ఉండటంతో పాటు వీల్‌బేస్‌ను కూడా 20 మి.మీ పెంచారు. దీనివల్ల వెనుక సీట్లో కూర్చునే ప్రయాణికులకు లెగ్ రూమ్ పెరిగింది. హెచ్ ఆకారపు డ్యాష్‌బోర్డ్, వెంటిలేటెడ్ ఫ్రంట్ సీట్లు, 360-డిగ్రీల కెమెరా, 8-స్పీకర్ల బోస్ ఆడియో సిస్టమ్ ఈ కారును ఒక చిన్న లగ్జరీ హోమ్‌లా మార్చేశాయి.

హ్యుందాయ్ వెన్యూ ధర రూ. 7.89 లక్షల నుంచి ప్రారంభమై రూ. 15.48 లక్షల (ఎక్స్-షోరూమ్) వరకు ఉంది. కేంద్ర ప్రభుత్వం తీసుకొచ్చిన GST 2.0 సంస్కరణల వల్ల కూడా ఈ కారు ధరలు కొంచెం తగ్గడం అమ్మకాలకు ప్లస్ అయ్యింది. ఇంజిన్ పరంగా చూస్తే.. 1.2 లీటర్ పెట్రోల్, 1.0 లీటర్ టర్బో పెట్రోల్, 1.5 లీటర్ డీజిల్ ఆప్షన్లతో అందుబాటులో ఉంది. ఇది మాన్యువల్, ఆటోమేటిక్, 7-స్పీడ్ డీసీటీ గేర్‌బాక్స్‌లతో వస్తోంది.

హ్యుందాయ్ ఇండియా తన క్యూ3 ఫలితాల్లో రూ.1,79,735 మిలియన్ల ఆదాయాన్ని ఆర్జించినట్లు తెలిపింది. ఇది గత ఏడాదితో పోలిస్తే 8 శాతం వృద్ధి. ఇందులో వెన్యూ అమ్మకాలు కీలక పాత్ర పోషించాయి. ఎగుమతుల పరంగా కూడా 21 శాతం వృద్ధి సాధించి, హ్యుందాయ్ తన గ్లోబల్ మార్కెట్ వాటాను పెంచుకుంటోంది. మీరు కూడా మంచి ఫీచర్లు, సేఫ్టీ ఉన్న ఎస్‌యూవీ కోసం చూస్తుంటే వెన్యూ ఒక మంచి ఆప్షన్ అని చెప్పవచ్చు.