పెట్రోల్ ఖర్చు తగ్గించడానికి ఈ కార్లనే కొంటున్నారు! ప్రతి నాలుగింటిలో ఒకటి ఇదే.. 30+ కి.మీ మైలేజ్

భారతదేశ ప్యాసింజర్ వాహన మార్కెట్‌లో ఒక కీలక మార్పు నెమ్మదిగా కానీ స్పష్టంగా కనిపిస్తోంది. గత కొన్ని సంవత్సరాలుగా పెట్రోల్, డీజిల్ ధరలు పెరుగుతుండటంతో, కొత్తగా వాహనాలను కొనుగోలు చేయాలనుకునే వారు ఖర్చు పరంగా లాభదాయకమైన ప్రత్యామ్నాయాలను వెతుకుతున్నారు. ఈ నేపథ్యంలో ఎలక్ట్రిక్ వాహనాలతో పాటు సీఎన్‌జీ వాహనాలపై కూడా ఆసక్తి గణనీయంగా పెరుగుతోంది. ఇది కేవలం ఒక భావన మాత్రమే కాదు, గణాంకాల ద్వారా కూడా స్పష్టమవుతోంది. గత ఆర్థిక సంవత్సరాన్ని పరిశీలిస్తే, ప్యాసింజర్ వాహనాల రిటైల్ అమ్మకాలలో సీఎన్‌జీ వాహనాల వాటా గణనీయంగా పెరిగింది. FY25లో 19.60 శాతంగా ఉన్న ఈ వాటా, FY 2025-26 నాటికి 21.98 శాతానికి చేరుకుంది. ఇంకా ఆశ్చర్యకరమైన విషయం ఏమిటంటే, 2026 మార్చి నెలలో ఈ వాటా 23.76 శాతానికి పెరగడం.

అంటే ప్రతి నెలా సీఎన్‌జీ వాహనాలపై డిమాండ్ వేగంగా పెరుగుతోందని అర్థమవుతోంది. ఈ సంఖ్యలు ముఖ్యమైన విషయాన్ని తెలియజేస్తున్నాయి, ప్రస్తుతం భారతదేశంలో అమ్ముడవుతున్న ప్రతి నాలుగు ప్యాసింజర్ వాహనాల్లో దాదాపు ఒకటి సీఎన్‌జీతో నడిచేదే. అంటే వినియోగదారులు ఖర్చును తగ్గించుకోవడమే కాకుండా, పర్యావరణానికి తక్కువ హానికరమైన ఇంధనాన్ని ఎంచుకుంటున్నారు. 2025-26 ఆర్థిక సంవత్సరంలో మొత్తం 47,05,056 ప్యాసింజర్ వాహనాలు విక్రయించబడగా, వాటిలో 10.34 లక్షలు సీఎన్‌జీ వాహనాలే ఉండటం గమనార్హం.

అంటే వినియోగదారులు పెట్రోల్, డీజిల్ నుంచి క్రమంగా సీఎన్‌జీ వైపు మళ్లుతున్నారని సంఖ్యలు స్పష్టంగా చెబుతున్నాయి. అంతేకాదు, సీఎన్‌జీ వాహనాలు ఇప్పుడు డీజిల్‌ను కూడా వెనక్కి నెట్టి ముందుకు వచ్చాయి. డీజిల్ వాహనాల వాటా 18.08 శాతంగా ఉండగా, సీఎన్‌జీ వాటా దాన్ని దాటేసి మరింత బలంగా నిలిచింది. మరో ఆసక్తికరమైన విషయం ఏమిటంటే, ఎలక్ట్రిక్ వాహనాల విభాగంతో పోలిస్తే సీఎన్‌జీ మార్కెట్ దాదాపు ఐదు రెట్లు పెద్దదిగా మారింది.

పెట్రోల్ వాహనాలు ఇంకా మార్కెట్‌లో అగ్రస్థానంలో ఉన్నప్పటికీ, వాటి ఆధిపత్యం క్రమంగా తగ్గుతోంది. గత ఆర్థిక సంవత్సరంలో పెట్రోల్ కార్ల వాటా 47.48 శాతంగా నమోదైంది. ఇది, అంతకుముందు సంవత్సరంతో పోలిస్తే దాదాపు 3 శాతం తగ్గుదల. ఇక డీజిల్ వాహనాల పరిస్థితి చూస్తే, పెద్దగా మార్పు లేకపోయినా, స్వల్పంగా పడిపోయాయి. 2025 ఆర్థిక సంవత్సరంలో 18.23 శాతంగా ఉన్న డీజిల్ వాటా, 2026 నాటికి 18.08 శాతానికి తగ్గింది.

ఇక సీఎన్‌జీ వాహనాల ఎదుగుదల మాత్రం స్పష్టంగా కనిపిస్తోంది. 2025లో 19.60 శాతంగా ఉన్న వాటా, 2026లో 21.98 శాతానికి పెరగడం, వినియోగదారులు ఖర్చు తగ్గించే దిశగా తీసుకుంటున్న నిర్ణయాలకు నిదర్శనం. ఇదే సమయంలో హైబ్రిడ్ వాహనాల వాటా స్వల్పంగా తగ్గి 8.73 శాతం నుంచి 8.21 శాతానికి చేరింది. ఎలక్ట్రిక్ వాహనాల మార్కెట్‌ చిన్న శాతం మాత్రమే ఉన్నప్పటికీ, వాటి వృద్ధి వేగం మాత్రం గమనించదగ్గది.

భారత మార్కెట్‌లో సీఎన్‌జీ కార్ల డిమాండ్ పెరుగుతుండగా, మారుతి సుజుకి, టాటా మోటార్స్ ముందంజలో ఉన్నాయి. డీజిల్ ఆప్షన్లు తక్కువగా ఉండటంతో మారుతి సీఎన్‌జీ కార్లను ఎక్కువగా ప్రోత్సహిస్తోంది. పెట్రోల్ కార్లతో పోలిస్తే సీఎన్‌జీ కార్లు రూ.50 వేల నుంచి రూ.1 లక్ష వరకు ఖరీదైనా, తక్కువ ఇంధన ఖర్చుతో దీర్ఘకాలంలో లాభదాయకంగా ఉంటాయి. పెరుగుతున్న పెట్రోల్ ధరలు కూడా వినియోగదారులను సీఎన్‌జీ వైపు మళ్లిస్తున్నాయి.

మారుతి డిజైర్, వ్యాగన్‌ఆర్, ఆల్టో వంటి కార్లు సుమారు 33 కి.మీ మైలేజ్ ఇస్తాయి. అలాగే హ్యూందాయ్ నుంచి వచ్చే సీఎన్‌జీ మోడళ్లు కూడా మంచి ఎంపికలే. ఇదే విధంగా టాటా నెక్సాన్, పంచ్, టియాగో వంటి టాటా మోడళ్లూ ఈ సెగ్మెంట్‌లో మంచి ఎంపికలుగా నిలుస్తున్నాయి. మొత్తం మీద రూ.5 లక్షల నుంచే ప్రారంభమయ్యే సీఎన్‌జీ కార్లు, తక్కువ ఖర్చుతో ఎక్కువ ప్రయోజనం కోరుకునే వారికి బెస్ట్ ఆప్షన్‌.