కొత్త చరిత్ర సృష్టించిన మారుతి.. ఫ్లెక్స్ ఫ్యూయల్ కారు డెలివరీ.. చెప్పడం కాదు చేసి చూపించింది

భారతదేశంలో ప్రత్యామ్నాయ ఇంధన వాహనాల విప్లవానికి మరో కీలక అడుగు పడింది. దేశంలోనే అతిపెద్ద కార్ల తయారీ సంస్థ అయిన మారుతి సుజుకి (Maruti Suzuki) ఇటీవల భారతదేశపు తొలి ఫ్లెక్స్ ఫ్యూయల్ హ్యాచ్‌బ్యాక్‌గా వ్యాగన్ఆర్(Wagonr)ను అధికారికంగా మార్కెట్లోకి తీసుకువచ్చిన సంగతి తెలిసిందే. ఈ కారు ఆవిష్కరణ జరిగిన వెంటనే డెలివరీలు ప్రారంభం కావడం ఇప్పుడు ఆటోమొబైల్ రంగంలో చర్చనీయాంశంగా మారింది. సాధారణంగా కొత్త టెక్నాలజీతో కూడిన వాహనాలు మార్కెట్లోకి వచ్చిన తర్వాత వాటి డెలివరీలు ప్రారంభం కావడానికి నెలలు లేదా కొన్ని సందర్భాల్లో సంవత్సరాల సమయం పట్టే అవకాశం ఉంటుంది. అయితే మారుతి మాత్రం ఈ విషయంలో అందరి అంచనాలను తారుమారు చేస్తూ, కారు విడుదలైన కొద్ది రోజుల వ్యవధిలోనే వినియోగదారులకు వాహనాలను అందించడం ప్రారంభించింది.

రూ.7.24 లక్షల ప్రారంభ ఎక్స్-షోరూమ్ ధరతో అందుబాటులోకి వచ్చిన వ్యాగన్ఆర్ బయోఫ్లెక్స్, భారత ప్రభుత్వ ఇథనాల్ బ్లెండింగ్ కార్యక్రమానికి మద్దతుగా రూపొందించబడిన ప్రత్యేక మోడల్. పెట్రోల్‌తో పాటు అధిక శాతం ఇథనాల్ మిశ్రమ ఇంధనంపై కూడా సమర్థవంతంగా పనిచేసే ఈ కారు, భవిష్యత్తులో దేశంలో ఇంధన దిగుమతులపై ఆధారపడటాన్ని తగ్గించడంలో కీలక పాత్ర పోషించనుంది. E20 నుంచి E100 వరకు వివిధ ఇథనాల్ మిశ్రమాలను ఉపయోగించే సామర్థ్యం దీనికి ఉంది.

వ్యాగన్ఆర్ బయోఫ్లెక్స్ తొలి డెలివరీలను ఇండియన్ షుగర్ అండ్ బయో-ఎనర్జీ మాన్యుఫ్యాక్చరర్స్ అసోసియేషన్(ISMA) సభ్యులకు అందజేయడం కూడా ప్రాధాన్యత సంతరించుకుంది. న్యూఢిల్లీలోని కరోల్ బాఘ్‌లో ఉన్న మారుతి సుజుకి షోరూమ్‌లో జరిగిన ప్రత్యేక కార్యక్రమంలో ఈ వాహనాలను అధికారికంగా అప్పగించారు. కేంద్ర ప్రభుత్వం గత కొన్ని సంవత్సరాలుగా ఇథనాల్ బ్లెండింగ్ కార్యక్రమాన్ని వేగంగా విస్తరిస్తోంది. ఈ నేపథ్యంలో ఫ్లెక్స్ ఫ్యూయల్ వాహనాల వినియోగాన్ని పెంచేందుకు ప్రత్యేక ప్రోత్సాహకాలు కూడా అందిస్తోంది.

ఆ లక్ష్యాలకు అనుగుణంగానే మారుతి సుజుకి అభివృద్ధి చేసిన వ్యాగన్ఆర్ బయోఫ్లెక్స్ ఇప్పుడు మార్కెట్లో అందుబాటులోకి రావడం ఒక ముఖ్యమైన పరిణామంగా పరిశ్రమ నిపుణులు పేర్కొంటున్నారు. పెట్రోల్ ధరల పెరుగుదల, ఇంధన దిగుమతులపై ఆధారపడటం వంటి సమస్యలకు ప్రత్యామ్నాయంగా ఇథనాల్ ఆధారిత వాహనాలు భవిష్యత్తులో కీలకంగా మారే అవకాశముందని వారు అభిప్రాయపడుతున్నారు. ప్రస్తుతం ప్రధాన నగరాల్లో వాణిజ్య వినియోగానికి అందుబాటులో ఉండగా, రానున్న రోజుల్లో దేశవ్యాప్తంగా విస్తరించే అవకాశం ఉంది.

వ్యాగన్ఆర్ బయోఫ్లెక్స్ కారు E85 (85 శాతం ఇథనాల్, 15 శాతం పెట్రోల్) వరకు ఉన్న ఇంధన మిశ్రమాలపై సులభంగా నడిచేలా రూపొందించారు. దీనికి మారుతి సుజుకి 1.2-లీటర్ K12N పెట్రోల్ ఇంజన్‌ను ఉపయోగించారు. ఈ ఇంజన్‌కు 5-స్పీడ్ మాన్యువల్ గేర్‌బాక్స్‌ను జత చేయడం వల్ల డ్రైవింగ్ అనుభవం మరింత సౌకర్యవంతంగా ఉంటుంది. ఈ ఫ్లెక్స్ ఫ్యూయల్ వెర్షన్ పనితీరు గణాంకాలను కంపెనీ ఇంకా అధికారికంగా వెల్లడించలేదు.

అయితే సాధారణ పెట్రోల్ వ్యాగన్ఆర్‌లో ఇదే ఇంజన్ 91 bhp శక్తి, 114 Nm టార్క్‌ను ఉత్పత్తి చేస్తుంది. ఫ్లెక్స్ ఫ్యూయల్ టెక్నాలజీ కారణంగా పవర్, టార్క్ గణాంకాల్లో స్వల్ప మార్పులు ఉండే అవకాశం ఉంది. అధిక ఇథనాల్ మిశ్రమాలతో పనిచేయడానికి ఇంజన్‌లో ప్రత్యేక మార్పులు చేశారు. ఇందులో కొత్త ఫ్యూయల్ ఇంజెక్టర్లు, మరింత సమర్థవంతమైన ఫ్యూయల్ పంప్, బలమైన ఫ్యూయల్ లైన్లు అమర్చారు.

అలాగే ఇంధనంలో ఎంత శాతం ఇథనాల్ ఉందో గుర్తించేందుకు అధునాతన ఇథనాల్ సెన్సార్‌ను కూడా ఏర్పాటు చేశారు. దీనికి అనుగుణంగా ECU సాఫ్ట్‌వేర్‌ను కూడా ప్రత్యేకంగా ట్యూన్ చేశారు. ఈ మార్పుల వల్ల వ్యాగన్ఆర్‌ బయోఫ్లెక్స్ పెట్రోల్‌తో పాటు అధిక ఇథనాల్ మిశ్రమాలపై కూడా సమర్థవంతంగా పనిచేస్తూ, భవిష్యత్తు గ్రీన్ మొబిలిటీ అవసరాలకు అనుగుణంగా రూపొందించిన కారుగా నిలుస్తోంది.