దేశంలోనే చౌకైన కారు.. భారీగా మైలేజీ ఇచ్చే కారు.. ధర కూడా రూ.5లక్షల లోపే.. అయినే దీన్ని కొనే దిక్కే లేదు

భారతదేశంలో కార్ల అమ్మకాల గురించి మాట్లాడాల్సి వస్తే అందరికీ మొదట గుర్తొచ్చే పేరు మారుతి సుజుకి. సామాన్యుడి బడ్జెట్ కారు దగ్గర నుంచి విలాసవంతమైన మోడళ్ల వరకు మారుతి హవా కొనసాగుతుంటుంది. కానీ, అదృష్టం ఎప్పుడూ ఒకేలా ఉండదు కదా. మారుతి సుజుకి గ్యారేజీలో ఉన్న ఒక కారు మాత్రం ప్రస్తుతం ఐసీయూలో ఉన్న రోగిలా విలవిలలాడుతుంది. అదే మారుతి సుజుకి ఎస్-ప్రెస్సో (Maruti Suzuki S-Presso). ఒకప్పుడు మార్కెట్లోకి ఎంతో ఆశలతో అడుగుపెట్టిన ఈ మోడల్ ఇప్పుడు కస్టమర్లు లేక వెలవెలబోతోంది.

తాజాగా విడుదలైన రష్ లైన్ గణాంకాల ప్రకారం... 2026 మార్చి నెలలో మారుతి సుజుకి ఎస్-ప్రెస్సో అమ్మకాలు అత్యంత దారుణంగా పడిపోయాయి. గడిచిన మార్చి నెలలో కేవలం 226 యూనిట్లు మాత్రమే అమ్ముడయ్యాయి. అదే 2025 మార్చిలో 1,788 కార్లు సేల్ అయ్యాయి. అంటే ఒక్క ఏడాది కాలంలోనే అమ్మకాలు ఏకంగా 87.36 శాతం పడిపోయాయి. ఒకప్పుడు నెలకు వేలల్లో అమ్ముడైన ఈ కారు, ఇప్పుడు వందల సంఖ్యకు పరిమితమవ్వడం మారుతి సుజుకి యాజమాన్యానికి పెద్ద షాక్ అనే చెప్పాలి.

భారతీయ ఆటోమొబైల్ మార్కెట్ ప్రస్తుతం పూర్తిగా మారిపోయింది. ఒకప్పుడు మిడిల్ క్లాస్ ప్రజలు చిన్న హ్యాచ్‌బ్యాక్ కార్ల (చిన్న కార్లు) వైపు మొగ్గు చూపేవారు. కానీ ఇప్పుడు అందరూ మైక్రో ఎస్‌యూవీలు లేదా కాంపాక్ట్ ఎస్‌యూవీలనే ఇష్టపడుతున్నారు. ఎస్-ప్రెస్సో కారును మారుతి కంపెనీ మైక్రో ఎస్‌యూవీ అని ప్రచారం చేసినప్పటికీ, దాని డిజైన్, లుక్ కస్టమర్లను పెద్దగా ఆకట్టుకోలేకపోయింది. దీనికి తోడు మార్కెట్లో ఉన్న టాటా పంచ్, హ్యుందాయ్ ఎక్స్టర్ వంటి కార్లు ఎస్-ప్రెస్సోను మార్కెట్ నుంచి దాదాపు తుడిచిపెట్టేశాయి.

ఎస్-ప్రెస్సో అమ్మకాలు తగ్గడానికి ప్రధాన కారణాలలో సేఫ్టీ(Safety) ఒకటి. గ్లోబల్ ఎన్‌క్యాప్ (Global NCAP) నిర్వహించిన క్రాష్ టెస్టుల్లో ఈ కారు ఆశించిన స్థాయిలో స్టార్ రేటింగ్ సాధించలేకపోయింది. నేటి కాలంలో కస్టమర్లు ధర కంటే ప్రాణాలకే ఎక్కువ ప్రాధాన్యత ఇస్తున్నారు. టాటా వంటి కంపెనీలు తక్కువ ధరలోనే 5-స్టార్ రేటింగ్ కార్లను అందిస్తుండటంతో, సేఫ్టీ తక్కువగా ఉన్న ఎస్-ప్రెస్సోను కొనడానికి ఎవరూ సాహసించడం లేదు.

ప్రస్తుతం మారుతి ఎస్-ప్రెస్సో ఎక్స్-షోరూమ్ ధర కేవలం 3.50 లక్షల రూపాయల నుంచే ప్రారంభమవుతుంది. టాప్ వేరియంట్ ధర కూడా 5.25 లక్షల రూపాయల లోపే ఉంది. మైలేజీ పరంగా చూస్తే ఇది లీటరుకు దాదాపు 24 నుంచి 25 కిలోమీటర్ల వరకు ఇస్తుంది. ఇంత తక్కువ ధర, ఎక్కువ మైలేజీ ఉన్నప్పటికీ, పాతకాలపు డిజైన్, నాసిరకం భద్రత కారణంగా ఇది ఫ్లాప్ మోడల్ గా మిగిలిపోయింది. మారుతి సుజుకి సెలేరియో, ఆల్టో కె10 వంటి కార్లు కూడా ఇలాంటి ఒడిదుడుకులనే ఎదుర్కొంటున్నాయి. రెనాల్ట్ క్విడ్ వంటి పోటీ కార్ల పరిస్థితి కూడా ఇంచుమించు ఇలాగే ఉంది.

మొదటిసారి కారు కొనాలనుకునే వారు లేదా సిటీల్లో తిరగడానికి చిన్న కారు కావాలనుకునే వారు ఎస్-ప్రెస్సోను పరిశీలించవచ్చు. అయితే మార్కెట్ ట్రెండ్ గమనిస్తే ఈ మోడల్‌ను మారుతి కంపెనీ త్వరలోనే అప్‌డేట్ చేయడమో లేదా నిలిపివేయడమో చేసే అవకాశం ఉందని విశ్లేషకులు భావిస్తున్నారు. కస్టమర్ల అభిరుచులకు తగ్గట్టుగా డిజైన్ మార్చకపోతే, భవిష్యత్తులో ఈ 226 కార్ల అమ్మకాలు కూడా సున్నాకు చేరుకోవడంలో ఆశ్చర్యం లేదు.