ఫ్యామిలీతో కలిసి ప్రయాణించడానికి సౌకర్యవంతమైన 7 సీటర్ జీప్! మెరిడియన్ ట్రాక్ ఎడిషన్ లాంచ్

జీప్ ఇండియా (jeep india) ప్రీమియం SUV మార్కెట్‌లో తన ప్రభావాన్ని మరింత బలపరిచే దిశగా కొత్త అడుగు వేస్తోంది. ఈ ప్రయత్నంలో, కంపెనీ తన మెరిడియన్ SUVకి ప్రత్యేకమైన ఎడిషన్ జీప్ మెరిడియన్ ట్రాక్ ఎడిషన్ (Jeep Meridian Track Edition)ను పరిచయం చేసింది. పూణేలోని ఒక ప్రత్యేక కార్యక్రమంలో ఆహ్లాదకర వాతావరణంలో అధికారికంగా లాంచ్ చేసిన ఈ వాహనం, పరిమిత ఎడిషన్ మోడల్‌గా ఉండటంతో SUV ప్రేమికుల దృష్టిని వెంటనే ఆకర్షించింది. డిజైన్ పరంగా, ఈ ట్రాక్ ఎడిషన్ ప్రామాణిక మెరిడియన్ SUVతో పోలిస్తే గమనించదగిన ప్రత్యేకతలు కలిగి ఉంది.

ముందువైపున బోనెట్‌పై సిగ్నేచర్ ట్రాక్ ఎడిషన్ హుడ్ డెకాల్, గ్రిల్‌పై పియానో బ్లాక్ ఫినిష్, ప్రత్యేక ట్రాక్ ఎడిషన్ చిహ్నం, ప్రత్యేక బ్యాడ్జ్‌లు, బాహ్య మోల్డింగ్‌లు SUVకి మరింత స్ఫూర్తిదాయకమైన, ప్రీమియం లుక్ ఇస్తాయి. ఈ ఫీచర్లు వాహనాన్ని కేవలం ఒక SUVగా కాకుండా, ప్రత్యేక గుర్తింపు ఉన్న స్టేట్మెంట్ గా నిలుస్తాయి. స్టైలింగ్ మాత్రమే కాకుండా ఫంక్షనల్ విభాగంలో కూడా ఈ ఎడిషన్ వినియోగదారులను ఆకట్టుకుంటుంది.

18-అంగుళాల డైమండ్-కట్ అల్లాయ్ వీల్స్ ఈ SUVకి బలమైన, ప్రీమియం ప్రెజెన్స్ ఇస్తూ సాధారణ మెరిడియన్ నుండి స్పష్టంగా భిన్నంగా నిలుస్తాయి. జీప్ మెరిడియన్ ట్రాక్ ఎడిషన్ కేవలం లుక్‌కి మాత్రమే పరిమితం కాదు, అది వాస్తవికంగా ప్రయాణీకులకు మరింత సౌకర్యాన్ని అందించడానికి డిజైన్ చేయబడింది. ఇప్పుడు ఈ SUVలో కొత్తగా జోడించిన 140mm స్లైడింగ్ రెండవ వరుస సీటు ద్వారా క్యాబిన్ మరింత విస్తృతంగా, సౌకర్యవంతంగా మారింది.

ఈ మార్పు ద్వారా మూడవ వరుస సీట్లు చేరుకోవడం సులభమవుతుంది, అలాగే వెనుక ప్రయాణీకులకు ఎక్కువ కాలి స్థలం లభిస్తుంది. జీప్ కంపెనీ తెలిపినట్లుగా, ఈ మెరుగుదలలు కస్టమర్ల ఫీడ్‌బ్యాక్, లాంగ్-డ్రైవ్ కంఫర్ట్ అవసరాల ఆధారంగా నేరుగా SUVలో అమలు చేయబడ్డాయి. అంతేకాక, ఈ ప్రత్యేక సీటింగ్ సిస్టమ్ SUVని కేవలం ప్రీమియం లుక్ మాత్రమే కాకుండా, ప్రయాణీకుల సౌకర్యాన్ని ప్రధానంగా ఉంచిన వాహనంగా మార్చింది.

జీప్ మెరిడియన్ ట్రాక్ ఎడిషన్ శక్తివంతమైన టెక్నాలజీతో వచ్చింది. ఇది 2.0-లీటర్ మల్టీజెట్ II డీజిల్ ఇంజిన్ ద్వారా నడుస్తుంది, ఇది 170 hp శక్తి, 350 Nm పీక్ టార్క్‌ను ఉత్పత్తి చేస్తుంది. ఈ SUV సీగ్మెంట్‌లో మొదటి 9-స్పీడ్ ఆటోమేటిక్ ట్రాన్స్‌మిషన్ను అందిస్తుంది, ఇది 2WD, 4WD ఎంపికలతో అందుబాటులో ఉంది. ఆఫ్-రోడ్ సవాళ్ల కోసం, ఈ వాహనం జీప్ ప్రసిద్ధ సెలెక్ట్-టెర్రైన్ సిస్టమ్తో కూడా అందించారు.

మట్టి, రాళ్ల మార్గాలు లేదా చెట్లు ఉన్న రూట్లలో కూడా సులభంగా వెళ్లగలదు. ధరల విషయంలో, మెరిడియన్ ట్రాక్ AT వేరియంట్ రూ. 35,95,000, 4X4 AT వేరియంట్ రూ. 37,82,000 (ఎక్స్-షోరూమ్) వద్ద లభిస్తుంది. అదనంగా రూ. 9,200 AXS ప్యాక్ తప్పనిసరిగా వర్తించుతుంది. జీప్ మెరిడియన్ ట్రాక్ ఎడిషన్ కోసం బుకింగ్‌లు ఇప్పటికే భారతదేశం అంతటా జీప్ డీలర్‌షిప్‌లలో ప్రారంభమయ్యాయి.

జీప్ మెరిడియన్ ట్రాక్ ఎడిషన్ ఫీచర్ల పరంగా ఇందులో 10.1-అంగుళాల యుకనెక్ట్ వైర్‌లెస్ ఆపిల్ కార్‌ప్లే, ఆండ్రాయిడ్ ఆటో, ఇన్ఫోటైన్‌మెంట్ సిస్టమ్ ఉంది. 10.25-అంగుళాల డిజిటల్ ఇన్‌స్ట్రుమెంట్ క్లస్టర్, ఆడియో అనుభవం కోసం, SUV ప్రీమియం ఆల్పైన్ సౌండ్ సిస్టమ్ను కలిగి ఉంది. భద్రత పరంగా, ఈ వాహనం 10+ యాక్టివ్ సేఫ్టీ ఫీచర్లు, లెవల్ 2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్) వంటి మొదలగునవి ఉన్నాయి.