ఫోన్ కొన్నంత ఈజీగా ఏడుగురు పట్టే కియా ఎలక్ట్రిక్ కారు కొనేయొచ్చు.. ఎలాగో తెలుసా?

ఎలక్ట్రిక్ కారు కొనాలని ఉందా.. కానీ భారీ ధర చూసి వెనక్కి తగ్గుతున్నారా? అయితే కియా తీసుకొచ్చిన కొత్త ఫైనాన్స్ పథకం మీకోసమే. కేవలం రూ.51 వేల డౌన్ పేమెంట్‌తోనే 7-సీటర్ ఎలక్ట్రిక్ కారును ఇంటికి తీసుకెళ్లే అవకాశం కల్పిస్తోంది. బ్యాటరీకి వేరు రుణం ఇవ్వడం ఈ పథకంలో అతిపెద్ద ప్రత్యేకతగా మారింది.

భారతదేశంలో ఎలక్ట్రిక్ వాహనాల వినియోగం పెంచేందుకు కియా ఇండియా ఒక సంచలన నిర్ణయం తీసుకుంది. మధ్యతరగతి ప్రజలకు కూడా ఎలక్ట్రిక్ కారు అందుబాటులోకి తీసుకురావాలనే లక్ష్యంతో, తన పాపులర్ 7-సీటర్ కేరెన్స్ క్లావిస్ ఈవీ (Kia Carens Clavis EV) కోసం బ్యాటరీ-యాజ్-ఎ-సర్వీస్ (BaaS) అనే కొత్త ఫైనాన్స్ ప్రోగ్రామ్‌ను ప్రవేశపెట్టింది. దీనివల్ల కారు కొనుగోలు చేసేటప్పుడు ప్రారంభ ధర భారీగా తగ్గి, సామాన్యుల బడ్జెట్‌లో ఇమిడిపోయేలా మారింది.

ఏమిటీ బ్యాటరీ-యాజ్-ఎ-సర్వీస్ (BaaS) మోడల్?
సాధారణంగా ఎలక్ట్రిక్ కార్లలో బ్యాటరీ ధర చాలా ఎక్కువగా ఉంటుంది. కియా ప్రవేశపెట్టిన ఈ కొత్త పద్ధతిలో కారు బాడీకి (ఛాసిస్), బ్యాటరీకి విడివిడిగా లోన్ అకౌంట్లు ఉంటాయి. అంటే మీరు కారు కొనేటప్పుడు కేవలం ఛాసిస్ ధరకు మాత్రమే డౌన్ పేమెంట్ కడితే సరిపోతుంది. బ్యాటరీ కోసం మీరు ప్రయాణించే కిలోమీటర్ల ఆధారంగా లేదా నెలవారీ అద్దె రూపంలో డబ్బులు చెల్లిస్తే సరిపోతుంది. దీనివల్ల కారు ప్రారంభ ధర దాదాపు 5 నుంచి 6 లక్షల రూపాయల వరకు తగ్గుతుంది.

ధరలు, డౌన్ పేమెంట్ వివరాలు
కేరెన్స్ క్లావిస్ ఈవీ స్టాండర్డ్ ప్యాక్ ఎక్స్-షోరూమ్ ధర రూ.17,99,000 గా ఉంది. ఈ కొత్త పథకం కింద కేవలం రూ.51,520 డౌన్ పేమెంట్‌తో కారును ఇంటికి తీసుకెళ్లవచ్చు. ఇందులో ఛాసిస్ ధర రూ.12.84 లక్షలుగా పరిగణిస్తారు. నెలవారీ ఈఎంఐ రూ.26,650 నుంచి మొదలవుతుంది. ఇక ఎక్స్‌టెండెడ్ ప్యాక్ (ఎక్కువ రేంజ్ ఇచ్చే మోడల్) ధర రూ.21,99,000 కాగా, దీనికి రూ.60,452 డౌన్ పేమెంట్ చెల్లించాల్సి ఉంటుంది. రెండు మోడళ్లలోనూ బ్యాటరీ సబ్‌స్క్రిప్షన్ ఛార్జీ కిలోమీటరుకు రూ.3.3గా నిర్ణయించారు.

ప్రముఖ బ్యాంకుల సహకారం
ఈ వినూత్న ఫైనాన్స్ ప్లాన్ కోసం కియా ఇండియా ప్రముఖ బ్యాంకులతో జతకట్టింది. హెచ్‌డిఎఫ్‌సి బ్యాంక్, ఐసిఐసిఐ బ్యాంక్, యాక్సిస్ బ్యాంక్, కోటక్ మహీంద్రా బ్యాంక్ మరియు బజాజ్ ఫిన్‌సర్వ్ ద్వారా ఈ లోన్ సౌకర్యం పొందవచ్చు. ఛాసిస్ కోసం 60 నెలల కాలపరిమితితో లోన్ ఇస్తుండగా, బ్యాటరీ కోసం ఏకంగా 96 నెలల (8 ఏళ్లు) సుదీర్ఘ కాలపరిమితిని బ్యాంకులు కల్పిస్తున్నాయి. దీనివల్ల నెలవారీ కట్టే కిస్తీ చాలా తక్కువగా ఉంటుంది.

చార్జింగ్ చింత అక్కర్లేదు
కియా యజమానుల కోసం మై కియా యాప్‌లో కె-ఛార్జ్ అనే ప్లాట్‌ఫారమ్‌ను అందుబాటులోకి తెచ్చారు. దీని ద్వారా దేశవ్యాప్తంగా 15,000 కంటే ఎక్కువ చార్జింగ్ పాయింట్ల వివరాలను లైవ్‌లో తెలుసుకోవచ్చు. ఎక్కడికైనా వెళ్లేటప్పుడు రూట్ ప్లాన్ చేసుకోవడం, యాప్ ద్వారానే పేమెంట్ చేయడం చాలా సులభం.

ఇప్పటికే కియా తన 100కు పైగా డీలర్‌షిప్‌ల వద్ద డిసి ఫాస్ట్ చార్జర్లను ఏర్పాటు చేసింది. తక్కువ తిరిగే వారికి, బడ్జెట్‌లో ఎలక్ట్రిక్ 7-సీటర్ కావాలనుకునే వారికి ఈ కియా క్లావిస్ ఈవీ ఇప్పుడు ఒక అద్భుతమైన ఆప్షన్‌గా నిలుస్తోంది.