తక్కువలో 7-సీటర్ కొనే సువర్ణావకాశం.. లక్షన్నరకు పైనే తగ్గింపు! ఫ్యామిలీతో లాంగ్ డ్రైవ్స్‌కు బెస్ట్ MPV

దక్షిణ కొరియాకు చెందిన ప్రముఖ ఆటోమొబైల్ సంస్థ కియా (Kia) భారత మార్కెట్లో తన ప్రత్యేక గుర్తింపును మరింత బలపరుచుకుంటోంది. ఇప్పటికే SUV సెగ్మెంట్‌లో మంచి విజయాలు సాధించిన ఈ కంపెనీ, ఇప్పుడు MPV విభాగంలో కూడా భారీ పోటీని సృష్టిస్తోంది. ముఖ్యంగా కియా కారెన్స్ క్లావిస్ (Kia Carens Clavis) అనే 7-సీటర్ మోడల్, కుటుంబ వినియోగదారుల మధ్య వేగంగా ఆదరణ పొందుతోంది. స్టైలిష్ డిజైన్, ప్రీమియం ఫీచర్లు, విశాలమైన క్యాబిన్, సౌకర్యవంతమైన ప్రయాణ అనుభూతితో ఈ MPV, మార్కెట్లో ఇప్పటికే మంచి క్రేజ్ సంపాదించుకుంది. మారుతి సుజుకి ఎర్టిగా, టయోటా ఇన్నోవా వంటి ప్రముఖ మోడళ్లకు గట్టి పోటీ ఇస్తూ, తక్కువ సమయంలోనే తనకంటూ ప్రత్యేక స్థానం ఏర్పరచుకుంది.

ఇప్పుడు ఈ కారును మరింత ఆకర్షణీయంగా మార్చేందుకు కియా కంపెనీ మే 2026 నెలలో భారీ ఆఫర్లను ప్రకటించింది. కారెన్స్ క్లావిస్ కొనుగోలు చేయాలని భావిస్తున్న వారికి ఇది నిజంగా ఒక సువర్ణావకాశంగా మారింది. ముఖ్యంగా 1.5-లీటర్ టర్బో పెట్రోల్ వేరియంట్లపై కంపెనీ రూ. 1.55 లక్షల వరకు ప్రయోజనాలను అందిస్తోంది. ఈ భారీ తగ్గింపులు కేవలం ధరల పరంగా మాత్రమే కాకుండా, యాజమాన్య ఖర్చులను కూడా తగ్గించేలా రూపొందించబడ్డాయి.

దీంతో ప్రీమియం MPV కొనాలనుకునే కుటుంబాలు ఇప్పుడు ఈ కారుపై మరింత ఆసక్తి చూపుతున్నాయి. అంతేకాకుండా, కియా కంపెనీ వినియోగదారులకు అదనపు నమ్మకాన్ని కలిగించేలా ప్రత్యేక వారంటీ ప్రయోజనాలను కూడా అందిస్తోంది. సాధారణంగా లభించే 3 సంవత్సరాల స్టాండర్డ్ వారంటీకి అదనంగా, మరో 2 సంవత్సరాల అపరిమిత కిలోమీటర్ల పొడిగించిన వారంటీని ఉచితంగా అందిస్తోంది. అంటే మొత్తం 5 సంవత్సరాల వారంటీ ప్రయోజనం లభించనుంది.

టర్బో పెట్రోల్ వేరియంట్లపై అత్యధిక ప్రయోజనాలు అందుబాటులో ఉండగా, డీజిల్, నాచురల్లీ ఆస్పిరేటెడ్ పెట్రోల్ వేరియంట్లపై గరిష్టంగా రూ. 85,000 వరకు ప్రయోజనాలను ప్రకటించింది. దీంతో ప్రతి రకమైన కస్టమర్‌కు అనుకూలమైన ఆప్షన్లు అందుబాటులోకి వచ్చాయి. విశాలమైన 7-సీటింగ్ సామర్థ్యం, ఆధునిక టెక్నాలజీ ఫీచర్లు, సౌకర్యవంతమైన ప్రయాణ అనుభూతి, ఇప్పుడు లభిస్తున్న భారీ ఆఫర్ల కారణంగా కియా కారెన్స్ క్లావిస్ ప్రస్తుతం MPV సెగ్మెంట్‌లో హాట్ టాపిక్‌గా మారింది.

కియా కారెన్స్ క్లావిస్ వినియోగదారుల అవసరాలను దృష్టిలో పెట్టుకొని మూడు విభిన్న ఇంజన్ ఆప్షన్‌లతో అందుబాటులోకి వచ్చింది. ఇందులో 1.5-లీటర్ నాచురల్లీ ఆస్పిరేటెడ్ పెట్రోల్, 1.5-లీటర్ టర్బో పెట్రోల్, అలాగే 1.5-లీటర్ డీజిల్ ఇంజన్ ఎంపికలు ఉన్నాయి. దీంతో మైలేజ్ కోరుకునే వారు, పనితీరును ఇష్టపడే వారు, అలాగే లాంగ్ డ్రైవ్‌ల కోసం శక్తివంతమైన MPV కావాలనుకునే వారికి వేర్వేరు ఆప్షన్లు లభిస్తున్నాయి.

ఇందులోని 1.5-లీటర్ నాచురల్లీ ఆస్పిరేటెడ్ పెట్రోల్ ఇంజన్ 115 bhp పవర్, 144 Nm టార్క్‌ను ఉత్పత్తి చేస్తుంది. నగర ప్రయాణాలు, కుటుంబ వినియోగానికి ఇది సాఫీగా పనిచేసే ఇంజన్‌గా నిలుస్తుంది. మరోవైపు, ఎక్కువ పనితీరు కోరుకునే వారికి 1.5-లీటర్ టర్బో పెట్రోల్ ఇంజన్ అందుబాటులో ఉంది. ఈ శక్తివంతమైన యూనిట్ 160 bhp పవర్, 253 Nm పీక్ టార్క్‌ను ఉత్పత్తి చేస్తూ డ్రైవింగ్‌లో అద్భుతమైన అనుభూతిని అందిస్తుంది.

ఇక ఎక్కువ మైలేజ్, టార్క్ కోరుకునే వారికి 1.5-లీటర్ డీజిల్ ఇంజన్ మంచి ఎంపిక. ఈ ఇంజన్ 116 bhp పవర్‌తో పాటు 250 Nm పీక్ టార్క్‌ను ఉత్పత్తి చేయగలదు. ట్రాన్స్‌మిషన్ ఎంపికల్లో టర్బో పెట్రోల్ వేరియంట్‌లో 6-స్పీడ్ మాన్యువల్‌తో పాటు 6-స్పీడ్ iMT,7-స్పీడ్ డ్యూయల్-క్లచ్ ఆటోమేటిక్ గేర్‌బాక్స్ ఎంపికలు ఉన్నాయి. డీజిల్ వేరియంట్ 6-స్పీడ్ మాన్యువల్ లేదా 6-స్పీడ్ టార్క్ కన్వర్టర్ ఆటోమేటిక్ ట్రాన్స్‌మిషన్‌తో అందుబాటులోకి వచ్చింది.