ఎర్టిగాను వద్దనుకున్న వారు ఈ కారునే కొంటున్నారు.. 7 మంది కూర్చోవచ్చు.. 3 లక్షల సేల్స్!

భారత ఆటోమొబైల్ మార్కెట్లో కియా (Kia) ప్రవేశించి కొద్ది సంవత్సరాలే అయినప్పటికీ, కంపెనీ తన ఉత్పత్తులతో వినియోగదారుల మనసులను గెలుచుకుంది. ముఖ్యంగా కుటుంబ అవసరాలకు అనుగుణంగా రూపొందించిన వాహనాలకు భారతదేశంలో ఎప్పుడూ మంచి డిమాండ్ ఉంటుంది. ఈ అవకాశాన్ని సరిగ్గా గుర్తించిన కియా, కారెన్స్ ఎంపీవీ (Carens MPV)ని మార్కెట్లోకి తీసుకువచ్చి మంచి విజయాన్ని అందుకుంది. స్టైలిష్ డిజైన్, విశాలమైన క్యాబిన్, ఆధునిక ఫీచర్లు, సరసమైన ధరల కారణంగా కారెన్స్ తక్కువ కాలంలోనే భారత కుటుంబాలకు ఫేవరెట్ ఎంపీవీగా మారింది.

ఎర్టిగా, ఇన్నోవా మధ్య ఒక మంచి 7-సీటర్ కోసం చూస్తున్న వారికి కారెన్స్ MPV సరైన సమాధానంగా నిలిచింది. ఎర్టిగా, ఇన్నోవా మధ్య ఒక మంచి 7-సీటర్ కోసం చూస్తున్న వారికి కేరెన్స్ MPV సరైన సమాధానంగా నిలిచింది.ఇప్పుడు ఈ మోడల్ మరో కీలక మైలురాయిని చేరుకుంది. 2026 మే నెల నాటికి కియా కారెన్స్ మొత్తం 3 లక్షల అమ్మకాల మార్క్‌ను దాటింది.

కంపెనీ విడుదల చేసిన వివరాల ప్రకారం, ఫిబ్రవరి 2022లో భారత మార్కెట్లో అడుగుపెట్టినప్పటి నుంచి ఇప్పటి వరకు కారెన్స్ 3,01,657 యూనిట్ల విక్రయాలను నమోదు చేసింది. కేవలం నాలుగేళ్లలోపు ఈ స్థాయిలో అమ్ముడవడం కారెన్స్‌కు ఉన్న ప్రజాదరణకు నిదర్శనంగా చెప్పవచ్చు. కారెన్స్ విజయాన్ని మరింత బలోపేతం చేస్తూ, గత ఏడాది కియా కొత్త తరం మోడల్ అయిన కారెన్స్ క్లావిస్‌ను కూడా పరిచయం చేసింది.

మరింత ప్రీమియం డిజైన్, అధునాతన ఫీచర్లు, కంఫర్ట్‌తో వచ్చిన ఈ మోడల్ మంచి స్పందనను పొందుతోంది. దీంతో కియా ఎంపీవీ సెగ్మెంట్‌లో తన స్థానాన్ని మరింత బలపరుచుకుంది. ప్రస్తుతం భారతదేశంలో కియా విక్రయిస్తున్న ఏడు మోడళ్లలో, సెల్టోస్, సోనెట్ తర్వాత అత్యధికంగా అమ్ముడవుతున్న మోడల్ కారెన్స్ కావడం విశేషం. తాజా 3 లక్షల అమ్మకాల మైలురాయి, భారత మార్కెట్లో కియా కారెన్స్ సాధించిన విజయానికి మరో పెద్ద గుర్తింపుగా నిలిచింది.

ఫిబ్రవరి 2022లో అడుగుపెట్టిన కారెన్స్, ప్రారంభమైన కేవలం 16 నెలల్లోనే 1 లక్ష అమ్మకాలను చేరుకుంది. ఆ తర్వాత కారెన్స్ తన స్థిరమైన వృద్ధిని కొనసాగిస్తూ 2 లక్షల యూనిట్ల అమ్మకాల మార్క్‌ను దాటింది. ఈ ఘనత సాధించడానికి మొత్తం 36 నెలలు పట్టింది. అనంతరం అమ్మకాల జోరు కొనసాగడంతో మరో 16 నెలల్లోనే అదనంగా 1 లక్ష యూనిట్లు విక్రయించి, మొత్తం 3,01,657 యూనిట్ల అమ్మకాల మైలురాయిని చేరుకుంది.

ఇదిలా ఉండగా, కారెన్స్ విజయాన్ని మరింత ముందుకు తీసుకెళ్లేందుకు కియా ఇటీవల కారెన్స్ క్లావిస్‌ను కూడా మార్కెట్లోకి తీసుకొచ్చింది. ఇది కారెన్స్‌కు మరింత ప్రీమియం వెర్షన్‌గా నిలుస్తోంది. కియా కారెన్స్ క్లావిస్ 6-సీటర్, 7-సీటర్ కాన్ఫిగరేషన్‌లలో అందుబాటులో ఉంది. వినియోగదారుల అవసరాలను దృష్టిలో ఉంచుకుని HTE, HTE(O), HTK, HTK+, HTK+(O), HTX, HTX+ వంటి పలు వేరియంట్లలో కంపెనీ దీనిని అందిస్తోంది.

ధరల విషయానికి వస్తే, ఈ ప్రీమియం ఎంపీవీ ప్రారంభ ధర రూ.10.99 లక్షలు (ఎక్స్-షోరూమ్) కాగా, టాప్ వేరియంట్ ధర రూ.20.71 లక్షల వరకు ఉంటుంది. ఆకర్షణీయమైన డిజైన్, విశాలమైన ఇంటీరియర్, ఆధునిక టెక్నాలజీ, భద్రతా ఫీచర్లతో కారెన్స్ క్లావిస్ ప్రస్తుతం భారతీయ కుటుంబాలకు అత్యంత ఆకర్షణీయమైన ఎంపీవీలలో ఒకటిగా నిలుస్తోంది. ఈ కారు పనితీరు కూడా చాలా అద్భుతంగా ఉంటుంది.

కియా కారెన్స్ క్లావిస్ 1.5-లీటర్ నాచురల్లీ ఆస్పిరేటెడ్ పెట్రోల్, 1.5-లీటర్ టర్బో పెట్రోల్, 1.5-లీటర్ డీజిల్ ఇంజిన్ ఆప్షన్‌లతో అందుబాటులో ఉంది. ఇందులో మాన్యువల్, iMT, DCT, ఆటోమేటిక్ గేర్‌బాక్స్ ఎంపికలు ఉన్నాయి. ఫీచర్ల విషయానికి వస్తే, 26.62-అంగుళాల పనోరమిక్ డిస్‌ప్లే, డిజిటల్ ఇన్‌స్ట్రుమెంట్ క్లస్టర్, కొత్త టూ-స్పోక్ స్టీరింగ్ వీల్, స్లైడింగ్ సెకండ్-రో సీట్లు వంటి ఆధునిక ఫీచర్లతో ఈ ఎంపీవీ వస్తోంది.