కి.మీకు కేవలం 1 రూపాయి మాత్రమే ఖర్చు! ఇన్నోవా కంటే రూ.7 లక్షలు తక్కువ.. అబ్బురపరుస్తున్న 7 సీటర్

భారత ఆటోమొబైల్ మార్కెట్లో అడుగుపెట్టిన కొద్దికాలంలోనే కియా మోటార్స్ (Kia Motors) తనదైన ముద్ర వేసుకుంది. దక్షిణ కొరియాకు చెందిన ఈ సంస్థ, కొత్త డిజైన్‌లు, ఆధునిక ఫీచర్లు, సరసమైన ధరలతో భారతీయ వినియోగదారులను ఆకట్టుకుంటూ వేగంగా ఎదిగింది. ముఖ్యంగా SUVలు, MPVలు, అలాగే EV సెగ్మెంట్‌లలో టాటా, మారుతి వంటి దిగ్గజాలకు గట్టి పోటీ ఇస్తూ తన స్థానం బలపరుచుకుంది. ఈ విజయయాత్రలో కీలక పాత్ర పోషించిన మోడళ్లలో కియా కారెన్స్ (Kia Carens) ఒకటి. కుటుంబ అవసరాలకు అనుగుణంగా రూపొందించిన ఈ MPV, విస్తృత స్థలం, సౌకర్యవంతమైన సీటింగ్, మంచి ఫీచర్లతో వినియోగదారుల మనసు గెలుచుకుంది. మార్కెట్లోకి వచ్చినప్పటి నుంచి స్థిరమైన డిమాండ్‌ను కొనసాగిస్తూ, ప్రతి నెలా మంచి అమ్మకాలను నమోదు చేస్తోంది.

తాజాగా విడుదలైన ఫిబ్రవరి 2026 అమ్మకాల గణాంకాలు చూస్తే, కియా కారెన్స్ మార్కెట్లో మరింత బలంగా నిలుస్తోందని స్పష్టమవుతోంది. ఆ నెలలో మొత్తం 6,815 యూనిట్లు అమ్ముడవడం, ఈ మోడల్‌కు ఉన్న డిమాండ్‌ను స్పష్టంగా చూపిస్తోంది. ఇది కేవలం ఒక సంఖ్య కాదు, ఈ వృద్ధి వెనుక వినియోగదారుల విశ్వాసం, బ్రాండ్‌పై ఉన్న నమ్మకం కనిపిస్తోంది. ఇదే సమయంలో, జనవరి 2026లో అమ్మకాలు 5,633 యూనిట్లుగా ఉన్నాయి.

ఈ గణాంకాలను పోలిస్తే, ఒక్క నెల వ్యవధిలోనే 1,182 యూనిట్ల పెరుగుదల నమోదు కావడం గమనార్హం. అంతేకాకుండా, ఇది ఫిబ్రవరి 2025లో 5,318 యూనిట్లకే పరిమితమయ్యాయి. ఏడాది ప్రాతిపదికన ఇప్పుడు 1,497 యూనిట్ల అదనపు అమ్మకాలు నమోదు కావడం, ఈ మోడల్ స్థిరంగా ఎదుగుతోందని చూపిస్తోంది. శాతం పరంగా చూస్తే, నెలవారీ పోలికలో సుమారు 20.98 శాతం వృద్ధి, ఏడాది ప్రాతిపదికన 28.15 శాతం పెరుగుదల నమోదు అయింది.

ప్రస్తుత పోటీ పరిస్థితుల్లో ఇలాంటి గ్రోత్ సాధించడం అంటే చిన్న విషయం కాదు. ఇది Kia Carens మార్కెట్లో ఎంత బలంగా నిలిచిందో, వినియోగదారులలో ఎంత ఆదరణ పొందిందో స్పష్టంగా తెలియజేస్తోంది. కియా భారత మార్కెట్లో వేగంగా ఎదుగుతున్న బ్రాండ్‌గా తన స్థానాన్ని మరింత బలపరుచుకుంటోంది. ముఖ్యంగా కారెన్స్ వంటి మోడళ్ల సక్సెస్‌తో, రాబోయే రోజుల్లో కూడా కంపెనీ ఇదే రీతిలో ముందుకు సాగుతుందని చెప్పడంలో ఎలాంటి సందేహం లేదు.

ప్రస్తుతం భారత మార్కెట్లో కియా కారెన్స్ మూడు వేర్వేరు వెర్షన్లలో వినియోగదారులకు అందుబాటులో ఉండటం ఈ మోడల్‌కు ఉన్న డిమాండ్‌ను మరింత పెంచుతోంది. కుటుంబ అవసరాలను దృష్టిలో పెట్టుకుని రూపొందించిన ఈ MPV, పెట్రోల్, డీజిల్ నుంచి ఎలక్ట్రిక్ వరకు విభిన్న ఎంపికలను అందిస్తూ విస్తృత శ్రేణి కస్టమర్లను ఆకర్షిస్తోంది. ఈ లైన్‌లో మొదటగా ఉన్నది స్టాండర్డ్ కియా కారెన్స్.

కియా కారెన్స్ బేస్ వేరియంట్ ధర రూ.10.99 లక్షలు. టయోటా ఇన్నోవా క్రిస్టా బేస్ వేరియంట్ రూ. 18.85 లక్షలు. ఈ లెక్కన కారెన్స్ ధర దాదాపు రూ.7 లక్షలు తక్కువ. సౌకర్యవంతమైన సీటింగ్, మంచి స్పేస్, అవసరమైన ఫీచర్ల వల్ల ఈ వెర్షన్‌కు స్థిరమైన డిమాండ్ ఉంది. కాస్త ప్రీమియం ఫీల్ కోరుకునే వారికి కారెన్స్ క్లావిస్ అందుబాటులో ఉంది. దీని బేస్ వేరియంట్ ధర రూ.11.21 లక్షలు.

డిజైన్, ఇంటీరియర్, ఫీచర్ల పరంగా ఇది స్టాండర్డ్ వెర్షన్ కంటే మెరుగ్గా ఉండటంతో, కస్టమర్లలో ప్రత్యేక ఆదరణ పొందుతోంది. అయితే ఈ లైన్‌లో అత్యంత ఆకర్షణీయమైనది కారెన్స్ క్లావిస్ ఈవీ. ఎలక్ట్రిక్ వాహనాలపై పెరుగుతున్న ఆసక్తిని దృష్టిలో పెట్టుకుని తీసుకువచ్చిన ఈ మోడల్, టెక్నాలజీతో పాటు భారీ ఖర్చు తగ్గింపును కూడా అందిస్తోంది. దీని బేస్ వేరియంట్ ధర రూ.17.99 లక్షలు (ఎక్స్ షోరూమ్).

ఇదిలా ఉంటే, ఈవీ కారుకు కిలోమీటరుకు కేవలం రూ.1.05 మాత్రమే ఖర్చవడం దీని ప్రధాన హైలైట్. ప్రస్తుత పెట్రోల్, డీజిల్ ధరల నేపథ్యంలో ఇది వినియోగదారులకు చాలా పెద్ద ప్రయోజనంగా మారుతోంది. మరింతగా చెప్పాలంటే, Kia Carens Clavis EV కూడా 7-సీటర్ ఆప్షన్‌లో అందుబాటులో ఉండటం వల్ల, ఎలక్ట్రిక్ సెగ్మెంట్‌లో ఫ్యామిలీ కారు కోరుకునే వారికి ఇది విలువైన ఎంపికగా నిలుస్తోంది.